Read lumasaaba Isaaya 7 Bible Online

Isaaya 7 - lumasaaba bible

Isaaya 7

¹Nga Ahazi umusooleli wa Yosamu, umwitsukhulu wa Uziya, ali umuyiinga wa Yuda, umuyiinga Rezini uwa Siriya ni Peka umusooleli wa Remaliya, nga niye umuyiinga wa Isiraeli, beetsa nga bakana khukhwiibwakala Yerusalemu. Ne shonyene ndi sibaanyalisa khuushiwaamba ta.

²Ne kamakhuuwa kano ni koola muungo mw'omuyiinga wa Yuda, nga kaloma kari, “Siriya betubaasile khu Isiraeli, nga bakana beetse khuusoolana ni nafwe,” umuyiinga wa Yuda atweela ni babaandu belulukha naabi, nga banikina lwe khuurya, bafwaana busa nga kimisaala kikitengaala lwe mbewo.

³Kila Umukasya alomela Isaaya ari, “Yila umusooleli woowo Sheyajashubu, utsye waakanaanemwo n'umuyiinga Ahazi. Kane umunyoole nga ali isi kumufureki kwe kameetsi kwaakamila, kukuutsukhiilila mu Litibo lye Ngaaki, liliili khu luguudo luluutsya mu mukuunda isi basiingila tsingubo.

⁴Tsya uboolele Ahazi akamise khukhwiyembelela. Muboolele uri akhabakho ni khuurya khwoosi isi umuyiinga Rezini uwa Siriya, n'umuyiinga Peka umusooleli wa Remaliya ta. Naamanyile indi baakhalaale naabi, ne bali busa nga kumulilo kukuutindiima nga kutsya khusima.

⁵Lwekhuuba Siriya atweela ni Efurayimu, n'umusooleli wa Remaliya balikho bakhola luwomelo nga baloma bari,

⁶babeene batsye bebwakale Yuda, bashiwaambe, lwanyuma barewo umusooleli wa Tabeeli khuuba niye nga umuyiinga washo.

⁷“Ne sheesi Umukasya uwe kamahe, umunyali wa byoosi aloma nisho shino ndi, khukhwibwakalibwa khuno sikhunyala khwaakholebwa ta, ate sikhukhaabewo ta.

⁸Lwekhuuba shiriimba Damasiko shili busa shiriimba shiikhulu sha Siriya, n'umuyiinga Rezini niye awula mu Damasiko mwoonyene. Ne isi Isiraeli, mu miiko kamakhumi kasesaba, batsya khushoonakisa, babahese baweelewo ilala.

⁹Shiriimba Samariya shili busa shiriimba shiikhulu sha Isiraeli, n'umuyiinga Peka, umusooleli wa Remaliya, aawula mu Samariya mwoonyene. Nashiryo siinga mulekha khuuba ni khuufukiilila khukhuumala, singene munyale khukhwinyindaalila ta.”

¹⁰Luundi ndi Umukasya waarumanisa buurume bubuundi isi umuyiinga Ahazi, nga buloma buri:

¹¹“Loomba khaabonelo khakhaaŋaŋasa khukhwaama isi Umukasya Wele woowo. Loomba shishiindu shishinyala shakhoolekha aasi imakoombe wa naleme, namwe iyo mu ngaaki mwikulu.”

¹²Ahazi naye weelamwo ari, “Taawe! Ise sinyala naloomba khaabonelo khoosi ta. Ise sinyala naakhaka Umukasya ta.”

¹³Kila Isaaya elamwo ari, “Ni mureekerese buulayi inywe baawuli be muuntsu ya Dawudi. Sishiba shiilayi khuukila babaandu bawaamwo khukhwikhalilikha khwaabwe ta. Ari ne oba nga shiryo, shiina kila mukhakilisa Wele waakila waawamwo khukhwikhalilikha?

¹⁴Ninashiryo, Umukasya umweene atsya khuubawa khaabonelo. Bona, umukhaana, akhaabe shisoombo, lwanyuma asaale umwaana umusiinde. Balimutwiikha lisiina bari Imanueli.

¹⁵Imbuka isi umwaana uyo alyoolela khuumanya khuukhalawo shiilayi ni khukhwikaana shiibi, akhaabe nga anywa kamabeele naluundi nga alya bubuushi bwe ntsukhi.

¹⁶Ne nga imbuka ishiili khukhwoola isi umwaana umusiinde uyo alinyalila khukhwiikaana shiibi, ni khuukhalawo isho shishiili shiilayi, linaambo lye baayiinga baabili lyeesi murya naabi ilyo, likhaabe nga lyaarama busa awo.

¹⁷“Lwanyuma Umukasya akhaabareerere inywe be mu Yuda biikosi, atweela ni babaandu beenywe, ni buyiinga bweenywe bwoosi, abe byeesi mushiili khuumanyakho ta, bibifuurakho ibyo byeesi mwafuna nga Isiraeli yaawukhana ni Yuda. Akhaabareerere umuyiinga wa Asiriya abebwaakale.

¹⁸Nga imbuka iyo yoolile, Umukasya alifuura ifiriimbi nio kamahe keetse khukhwaama imwaalo wa Misiri, ni kamahe kakaandi khukhwaama mu Asiriya. Boosi bakheetse bawuuma busa nga tsisame namwe nga intsukhi.

¹⁹Kamahe kano kakheetsile atweela mu bukali, katsye kebuuse khuumya tsindeeyi tsinyene, ni muufwa tse lulwaanda, naluundi kebuuse mu bisaala bye kamawa byoosi, ni mu bifwo bye kamaayilo byoosi.

²⁰“Nga imbuka iyo yeetsile khwoola, Umukasya akhaapaangise kumubano kumubekelo khukhwaama shanjelekha we Luluutsi Efurati, nga niye umuyiinga wa Asiriya, khukhwiitsa ababekekho liitsuune lyoosi khukhwaama khu mirwe kyeenywe, ni buubwooya bwoosi bubuuli khu bikyele byeenywe, ni khuubarusakho buunwaanwa bweenywe nabwo.

²¹“Khu shifukhu isho, umuundu umulimi akhaanyalise khuuramakho ni khaafu imoosi indweela, atweela ni tsimbusi tsibili.

²²Nashiryo bino bikhaakile ibewo kamabeele mu bukali, kakaakhamale khuunyweesa babaandu boosi, lwekhuuba bakhaabe baramawo bakyeekhe bari mu shibala. Babaandu bakyeekhe bano bakhaanywe kamabeele, balye ni bubuushi bwe ntsukhi.

²³“Khu shifukhu isho, kimikuunda kye kimisabibu kikyabamwo bisina bye kimisabibu shikana shitweela (1,000), nga bisina bino byoolamwo shikana shitweela she feetsa, kikhaasibe busa ni bunyaasi ni kamawa.

²⁴Lwekhuuba kimikuunda kino kikhaabe kyaasiba busa, babaandu bakheetse ni buyiingo ni bufumo, khuuyiimamwo tsisolo tse mwirome.

²⁵Tsingoongo khweesi baalimatsaka tsikhaasiimbekho bunyaasi ni kamawa. Mukhaarye khuutsyayo, ni tsikhaafu tseenywe, ni kamasheese keenywe atweela ni tsimbusi, mukhaabilekhuule busa bitsye byaayile khubweene ukhwo.”