Read lumasaaba Isaaya 8 Bible Online

Isaaya 8 - lumasaaba bible

Isaaya 8

¹Lwanyuma Umukasya waanomela ari, “Bukula luubawo lwe khuuronakho, uronekho buulayi lisiina uri Maheri-Shalali-Hashi-Bazi[3].

²Kane inaangeyo bajulisi babili, nga nibo umusaayi Uriya, ni Zekariya umusooleli wa Jeberekiya, nga bano boombi bali basaani babeyikinwa, khuubawo nga bajulisi, nga shishiindu shino shikholebwa.”

³Indyo naatsya naakona n'umukyelama wase, naye waaba shisoombo, lwanyuma waasaala umwaana umusiinde. Kila Umukasya anomela ari, “Umwaana yuno mutwiikhe lisiina uri Maheri-Shalali-Hashi-Bazi.

⁴Nga Umwaana oyu ashiili khutsowa khukhwoolesa imbuka isi anyalila khuulaanga ari ‘Paapa,’ namwe ‘Maayi’ ta, umuyiinga wa Asiriya akheetse asutake bye buyiinda bya Damasiko, ni bye buyiindifu bya Samariya byoosi.”

⁵Luundi ndi Umukasya waanganikhayo nga aloma ari,

⁶“Babaandu ba Yuda bano baakhalilewo khukhwikaana kameetsi ka Shilowa kakaakwalaala busa, baatsya beela khu lubeka lw'Omuyiinga Rezini n'Umuyiinga Peka umusooleli wa Remaliya.

⁷Nashiryo, ise ndi khuutsya khubeyaangisa nga isiindikha kameetsi ke kamaani ke luluutsi Efurati, nga niko umuyiinga uwa Asiriya, ni shiriifwa sheewe shoosi. Kameetsi iko katsya khukhwitsula kafuuntsakilile tsintsakha tsako tsoosi.

⁸Baasiku abo bakheetse balebanise babaandu ba Yuda, bafwaane nga kameetsi kaketsuule khukhwoola mu milo. Karyo kabalaayise tsindaaha tsako, kamile shiibala shoosi, khukhwaama khu lubeka lutweela khukhwoola khu luundi, O Imanueli.”

⁹Inywe kamanaambo nimwibuuse atweela nga mwariire naabi! Nimurekeerese inywe biibala bibiili aleeyi. Nimwirekekhe lwe buusoolo, naluundi mube mu mutaambo kumukali naabi! Ilala nimwirekekhe lwe buusoolo luundi mube mu mutaambo kumukali naabi.

¹⁰Nimukhole tsiŋoonaŋoona tseenywe tse busoolo, ne mumanye muri sitsikhabiremo ta. Nimukhole tsiŋoonaŋoona tseenywe, ne sitsikhabiremo ta, lwekhuuba Wele ali ni nafwe.

¹¹Umukasya anganikhayo ni buunyala bweewe buukali naabi, nga andeewura ise ni kamaani keene ari ikheelayo luundi nambaasa nga babaandu babaandi ni bakhola ta. Niye anomela ise ari,

¹²“Ukhalaanga shishiindu shoosi khuuba tsimbomelo tse buumiinyi, lwekhuuba babaandu babaaramile bashilaanga baryo ta. Naluundi ukharya shishiindu shoosi lwekhuuba nibo bariire ta.

¹³Ne Umukasya uwe kamahe niye uwe buunyala, umweene uyo niye uuli umukhosefu mu buulamu bweenywe. Umweene uyo niye isi mwaakha khuurya. Umweene niye isi mwaakha khukhwiwunamila nga munikina.

¹⁴Niye kane abe bubwilukhilo bweenywe mube buulayi. Ne isi Isiraeli ni Yuda, niye akhaabe nga libaale lilikila babaandu betuya, libaale lilikila nibo baakwa aasi. Ni isi babaandu be mu Yerusalemu, akhaabe nga kumureko mweesi bawaambikhila.

¹⁵Bakali khu nibo bakhaatilyaate lwanyuma bakwe aasi, balekhe khunyalisa khukhwinyukha luundi na khafwiiti ta. Bakhaawaambikhile mu mureko.”

¹⁶Inywe baalekelwa baase, ni mwiliinde naabi khuubona muri muliinda buurume bweesi Wele ambeele ise khuureera.

¹⁷Ise kane iniindiilile Umukasya, akhaba nga waakhalilewo khukhwaantsukha babetsukhulu ba Yakobo. Ise kane imwiyikinile ilala niye.

¹⁸Ari ise atweela ni babaana beesi Umukasya ambeele, khuli busa nga bubonelo ni she khureewula isi ba Isiraeli, khukhwaama isi Umukasya uwe kamahe Umunyali wa byoosi, umenya khu lukiingi Sayuuni.

¹⁹Inyala yaabayo umuundu unyala waabalomela ari, “Khakhutsye khwireebekho wa mayuuya, ni we baalosi babaanyala khuukhukanikhila isi kimyoyo kyaabo babaafwa khaale. Nibo kane batsye nga bemoonyelesa, luundi nga bebetsakalisa banyalise khukhuboolela ifwe shiina she khuukhola.” Kane babalomele bari, “Shibonekha nga shaakhila babaandu khuutsya khukhwireeba khu misaambwa. Babaandu baalamu banyala baatsya beereebakho isi abo babaafwa khaale.”

²⁰Ni nawe kane ubeelemo uri, “Shiba shiilayi khuurekeeresa biilakilo bya Wele ni kamakaambila keewe! Babaandu babaatsya nga bakanikha, ne nga sibatsiila khu lomo ya Wele ta, singene babe baalamu khuubona buwaanga bwe kumutikhinyi ta.”

²¹Babaandu balikyeendaana busa khukhwaama mu shifwo shitweela khuutsya mu shiindi, nga baaluwile luundi nga intsala ibalya. Ni lwekhuuba ndi bali ntsala, bakhaakyeende nga betsuule lirima, batsye nga batsuba umuyiinga waabwe atweela ni Wele waabwe. Bakhenyuse tsimoni tsaabwe mu ngaaki;

²²bashuukhe balole aasi khu shibala, ne nga buli aandu oosi isi balola, ikhaabewo buukosi ni kumutaambo kumukali, atweela ni ingunyi ingali naabi. Baryo bakhaatuumibwe ibulafu mu shiilima.