Read lumasaaba Isaaya 9 Bible Online

Isaaya 9 - lumasaaba bible

Isaaya 9

¹Ne isi abo babaamala khaale khuubira mu mutaambo ukwo, sibakhaabekho ni butsiina ibwo luundi ta. Bisiintsa bya Zebuluuni ni bya Nafutali bibiili mu Galilaaya nibyo bibyanyoowa khuubiyilwa naabi. Ne shiibala she banaambo shino shishiili shanjelekha we luluutsi Yorudaani, ni kumukhoosi kukuuli khu ndulo khwe nyaantsa imboofu Meditereniani, kukhaabe kwe shiriifwa naabi.

²Babaandu babaakyeendatsakila mu shiilima ari baboone buuwaanga buukali naabi. Abo babaamenyatsaka mu shibala shishiilimwo shishiilima namukoto, ari buwaanga bwaabeetsiile.

³Uryo waabalaayisile linaambo lyaabwe, waalooselekho kumwikhoyo kwaabwe. Babaandu bekhoyela isi uli, ni kumwikhoyo kwaabwe kwafwaana nga kukuubawo nga balikho bakyesa biilime, naluundi nga n'ubona basaani ni bekhoya nga balikho bakabanana bibiindu byeesi bayaayile busa.

⁴Lwekhuuba iwe waafuniaakaka buusiro bwe buukulwa bweesi baabarakho, waabenyusakho shisutwa shisiro she khuutaambisibwa. Waafuniaakaka khuumiinilisibwa ukhwo khwoosi, shafwaanakho nga ni washikhola khu mbuka isi waheselakho liiye lya Midiani lyoosi.

⁵Biilaalo bye basoolani babeetsa khukhwibwakala, na buli shikwaaro shoosi shishiilikho kamafuki ke bye busoolo, bakhaashooshe ni kumulilo.

⁶Lwekhuuba umwaana wasaalikhile isi khuli. Umusooleli waakhuweebwile isi khuli. Ni naye umweene akhaabe umuwuli weefwe. Naluundi akhalaangibwe lisiina bari: Umubooleleli Umukhulu naabi, Wele Uwe Kamaani, Paapa Ukhawawo ta, luundi Umukhulu we Luukoosi.

⁷Buwuli bweewe bukheloosele luukali naabi, atweela ni luukoosi lweewe, sibikhaawewo na khakyeekhe ta. Niye akhaawule babaandu beewe nga eela mu bikyele bya kuuka weewe Dawudi, babe buulayi. Niye akhaawule nga ali ni bwaŋali ni khuutubaasa babaandu. Umukasya umunyali wa byoosi waakhaliilewo ilala ari bino byoosi bikhaakholikhe.

⁸Umukasya waarumanisile buurume bwe khuureewula isi babetsukhulu ba Yakobo, kumusaango kweewe kwakwiile khu baandu ba Isiraeli.

⁹Ni babaandu be mu Isiraeli boosi, atweela ni naabo boosi babaamenya mu shiriimba sha Samariya bakhaashimanye buulayi. Ne nibo lwekhuuba beyiingayiinga luundi bali ni bunywaanywa mu myoyo kyaabwe, baloma bari,

¹⁰“Abe yakhaba nga bibyombekhe bye kamatofwaali byawumbukhile byaakwiile aasi, ari khutsya khwiisawo bibiindi nga khubyoombekha ni kamabaale kamabeetse buulayi, ni mu shifwo mumwaba kimisaala kimisukamoli, ari khutsya khwiisamo kimisaala kimi kedali.”

¹¹Ne Umukasya atsya khuwa baasiku babaali khu luwaande lwa Rezini kamaani, beetse bebwakale Isiraeli, naluundi asuluuse ni baasiku babaandi nabo beetse khuubebwakala.

¹²Ba Asiriya baamile khu luwaande lwe Bwaamanyaanga, ni ba Firisitiya nabo beetse khukhwaamila luwaande lwe Bukwanyaanga, beetse nga baalulumile ni buurafu buukali, batukhuunye Isiraeli bamumalewo! Ne abe shakhaba nga shili shiryo, lirima ly'Omukasya singene liwewo ta. Niye ashinyusa kumukhono kweewe mu ngaaki akana khubalibula luundi.

¹³Ne bakhaba nga baafuna shitaambiso baryo, babaandu ba Isiraeli baalobela ilala khushuukha bebiyiise. Bekaanila ilala khukhwiilayo baweentse Umukasya Uwe Kamahe, Umunyali wa byoosi.

¹⁴Nashiryo, khu shifukhu sheene shitweela shonyene, Umukasya atsya khubawa shiitaambiso, nga abakhalakho kumurwe ni kumukhiinga kweene, abarusekho tsisakya tse kamasheendu atweela ni luukholo lwe aasi lweene.

¹⁵Basakhulu ni baaraangilisi babaandi be shiiriifwa nibo kumurwe, ni baŋoosi babaawombesa nibo kumukhiinga.

¹⁶Lwekhuuba baaraangilisi batsya baborosa babaandu bano. Baryo batsya baabayila khu mukhoosi kumubi, baabakosaasa.

¹⁷Isho nisho shishikila Umukasya waalekha khusangaalila basaani bahele ta, naluundi waalekha ni khukhwookesanisa bubweela bweewe isi banamulekhwa ni baafuubi ta. Lwekhuuba bano boosi bemunyakasa busa sibalimwo ni shiriifwa sha Wele ta, bakhola bubwoonaki bwonyene. Ni nashiryo lwashino, lirima ly'Omukasya silinyala lyawawo ta. Niye ashinyusa busa kumukhono kweewe mu ngaaki, akana khubalibula luundi.

¹⁸Bubwoonaki bwe babaandu bano bwaaburukha bwaatindiima nga kumulilo ni kwoosha kamasakari ni kamawa. Kumulilo ukwo kwaaburukha nga kumulilo ni kwoosha shisaali, lwanyuma lisuusi lyaabowelela nga liniina mu ngaaki.

¹⁹Lwekhuuba lirima ly'Omukasya uwe Kamahe, Umunyali wa byoosi, lili liikali naabi, shiibala shoosi shitsya khusha shiweelewo ilala. Babaandu babeene nibo babaatsya khuba nga kamafura kakaaburusa kumulilo, naluundi silibawo umuundu na mutweela ulisaasila uwashe ta.

²⁰Umwesanwa mutweela aliibwakala umwesanwa weewe uwe khu mukhono kweewe kumulayi, ne alirama busa nga ashikana. Lwanyuma ndi ashuukhe ebwakale umwesanwa weewe uwe khu mukhono kumunyeletsi, ne silibawo khukhwikura nakhari ta. Nashiryo buli muundu aliilya inyama iye kumubili kw'omulebe weewe umweene.

²¹Babaandu ba Manase balitsya bebwakale babaandu ba Efurayimu, ni babaandu ba Efurayimu balitsya bebwakale babaandu ba Manase, lwanyuma bano boosi betubaase atweela batsye bebwakale babaandu ba Yuda. Ne abe byakhaba biryo, lirima ly'Omukasya sililiwawo ta. Niye ashinyusa kumukhono kweewe mu ngaaki, akana khubalibula luundi.