Read lumasaaba Ba Levi 12 Bible Online

Ba Levi 12 - lumasaaba bible

Ba Levi 12

¹Umukasya waalomela Musa ari,

²“Boolela ba Isiraeli boosi uri, nga umukhasi waasaalile umwaana umusiinde, ali ni khuuba umunyaalu khuumala biifukhu musaafu. Kane abe busa umunyaalu, nga n'aba nga ali khuutsya i masaaba.

³Khu shifukhu shishikhola shinaane, bali ni khuukheba umwaana uyo imbalu.

⁴Ne umukhasi uyo ali ni khukhwiiloosela khukhwipyeluusa khuumala biifukhu kamakhumi kataru na bitaru. Mu biifukhu ibyo, sawaambakho shishiindu shoosi shikhosefu ta, namwe si eetsa mu shifwo shikhosefu ta, khukhwoolesa nga biifukhu ibyo byaaweelekho.

⁵Ne naaba bari waasaalile umwaana umukhaana, awo ali ni khuurama nga ali umunyaalu khuumala tsisaabiiti tsibili. Ali ni khukhwiiloosela khukhwipyeluusa khuumala biifukhu kamakhumi kasesaba na bisesaba.

⁶“Lwanyuma nga umukhasi waamalile biifukhu byeewe bye khukhwipyeluusa, oba asaala umusiinde namwe umukhaana, ali ni khukhwiitsa iburaangisi we liisari likhosefu. Ali ni khuureerera umusaayi lisheese lilyaana lye kumwiiko mutweela, nga isaayilo intsoshe, ni liwuusi namwe khakuungu, nga isaayilo irusawo bibyoonako.

⁷Lwanyuma lw'omusaayi khuwaanayo tsisaayilo itsyo isi ise Umukasya, umukhasi uyo kane abe wepyeluusile bibiwaambakana ni khuurura khwe kamafuki.

⁸Nga s'anyala waareera likheese lilyaana ta, anyala khuureera kamawuusi kabili, namwe bikuungu bibili, nga khatweela khali khe isaayilo intsoshe, ne khakhaandi khe isaayilo iyinyusawo bibyoonako. Umusaayi kane ekoontselele mu lisina ly'omukhasi uyo, lwanyuma kane abe waapyelusibwile.”