Read lumasaaba Ba Levi 15 Bible Online

Ba Levi 15 - lumasaaba bible

Ba Levi 15

¹Umukasya waalomela Musa ni Aroni ari,

²“Boolela ba Isiraeli muri, nga umusaani ali ni buulwaale bubukila kimiindu kyaarura khukhwaama mu mbalu yeewe, aba alikho bunyaalu.

³Abe kimiindu ikyo kyaakhaba nga kishiirura, namwe nga kyaayakama, aba alikho bunyaalu.

⁴Buulili bweesi umuundu akonakho, ni khu buli shishiindu sheesi ekhalakho shoosi, nabyo biikela binyaalu.

⁵Umuundu uwaamba khu bulili bw'omuundu uyo, ali ni khuusiinga bikwaaro byeewe, esiinge kumubili kwoosi. Kane arame nga alikho bunyaalu khukhwoolesa angoloobe.

⁶Uyo yeesi uwaamba khu shiindu shoosi sheesi umuundu uyo awaambilekho, ali ni khuusiinga bikwaaro byeewe, naluundi esiinge. Kane arame nga alikho bunyaalu khukhwoolesa angoloobe.

⁷Uyo yeesi uwitiila khu muundu uyo, ali ni khuusiinga bikwaaro byeewe, naluundi esiinge. Kane arame nga alikho bunyaalu khukhwoolesa angoloobe.

⁸Siinga umusaani urura kimiindu uyo afuutsa kamare khu muundu ukuundi, uyo isi bafutsilekho ali ni khuusiinga bikwaaro byeewe, naluundi esiinge. Kane arame nga alikho bunyaalu khukhwoolesa angoloobe.

⁹Shishiindu shoosi sheesi uwe buulwaale ubwo ara khu shaayo, ne wekhalakho nga shishaayo isho shaamusutile, shiikela shishiilikho bunyaalu.

¹⁰Uyo yeesi uwaamba khu sheesi umulwaale uyo amalile khukhwikhalakho, kane abe ni bunyaalu khukhwoolesa angoloobe. Uyo yeesi usuta shishiindu nga shisheene isho, ali ni khuusiinga bikwaaro byeewe, naluundi esiinge. Kane arame nga alikho bunyaalu khukhwoolesa angoloobe.

¹¹Uyo yeesi isi umusaani uuli ni buulwaale ubwo awaambakho, nga umulwaale uyo siwanyoowile khusaaba kamakhono keewe ta, ali ni khuusiinga bikwaaro byeewe, naluundi esiinge. Kane arame nga alikho bunyaalu khukhwoolesa angoloobe.

¹²Bibiindu byoosi bibyabuumbibwa mu liloba lye tsinyuungu byeesi umulwaale uyo awaambakho, bali ni khuubyaraakaka. Ne buli bipwakhuli byeesi bakhootsa khukhwaama mu kuusaala byeesi awaambakho, bali ni khuubisiinga.

¹³“Umusaani umulwaale uyo, nga waamalile khuuwona, ali ni khuubala biifukhu musaafu, lwanyuma asiinge bikwaaro byeewe. Ali ni khuutsya esiinge mu luutsi, abe nga waarusibwilekho bunyaalu.

¹⁴Khu shifukhu shishikhola shinaane, ali ni khuureera buwuusi bubili namwe bikuungu bibili, imulyaango kwe lisari likhosefu, abiwe umusaayi.

¹⁵Umusaayi ali ni khuuwaanayo khatweela nga isaayilo irusawo bibyoonako, ne khakhaandi nga isaayilo intsoshe. Musaambo iyo, umusaayi amuloombele isi Umukasya khulwe buulwaale ubwo.

¹⁶“Umusaani yeesi isi kameetsi kakaasaala babaandu kaba kaarurire mwibili mweewe khu bwako busa, kane ayilibwe nga ulikho bunyaalu, khukhwoolesa angoloobe.

¹⁷Shikwaaro shoosi sheesi baakhola khukhwaama mu ngubo namwe mu lihaafu ly'esolo sheesi umusaani uyo awaambakho, shiba sheekelile shinyaalu, khukhwoolesa angoloobe.

¹⁸Umusaani nga wetubaasile n'umukhasi, boombi bali ni khukhwisiinga lwanyuma lwayo. Ne shitweela busa baba bekelile banyaalu khukhwoolesa angoloobe.

¹⁹“Nga umukhasi ali mu biseela byeewe bye khuutsya i masaaba, aba wekelile umunyaalu khuumala biifukhu musaafu. Uyo yeesi uwitiila khu mukhasi uyo, ali ni khukhwisiinga, ne shitweela busa aba wekelile umunyaalu khukhwoolesa angoloobe.

²⁰Shishiindu shoosi sheesi akonakho nga buulili mu mbuka iyo, na buli shoosi sheesi ekhalakho, shikela shinyaalu.

²¹Umuundu yeesi uwitiila khu bulili bw'omukhasi uyo, ali ni khukhwisiinga. Ne shitweela busa aba wekelile umunyaalu khukhwoolesa angoloobe.

²²Umuundu yeesi uwitiilakho khu shiindu sheesi umukhasi uyo ekhaalekho, oba buli buulili, namwe sheesi ekhaalekho shoosi, ali ni khuusiinga bikwaaro byeewe, naluundi esiinge umweene. Ne kane abe wekelile umunyaalu khukhwoolesa angoloobe.

²⁴Umusaani yeesi uwitubaasa n'umukhasi uuli khuutsya i masaaba, ekela ulikho bunyaalu khuumala biifukhu musaafu. Ni buulili bwoosi bweesi umusaani uyo akonakho, bwikela bunyaalu.

²⁵“Umukhasi yeesi uba nga s'aali khuutsya i masaaba ta, ne nga arura kamafuki, aba alikho bunyaalu nga bw'oyo uuli khuutsya i masaaba, khukhwoolesa kamafuki ako ni kane kaakame.

²⁶Shishiindu shoosi sheesi akonakho nga buulili mu mbuka iyo, na buli shoosi sheesi ekhalakho, shikela shinyaalu, musaambo niyo indweela nga n'aaba ali khuutsya i masaaba.

²⁷Uyo yeesi uwaamba khu biindu byeesi umukhasi aba wetiililekho, ali ni khuusiinga bikwaaro byeewe, naluundi esiinge umweene. Ne aba wekelile ulikho bunyaalu, khukhwoolisa angoloobe.

²⁸Ne nga waawonesebwele, ali ni khuubala biifukhu musaafu biwe, nio abe nga s'ashiilikho bunyaalu ta.

²⁹Khu shifukhu shishikhola shinaane, ali ni khuuyila kamawuusi kabili, namwe bikuungu bibili, amulyaango we liisari likhosefu, abiwe umusaayi.

³⁰Umusaayi ali ni khuuwaanayo khanywiinywi khatweela nga isaayilo irusaawo bibyoonako, ne khakhaandi nga isaayilo intsoshe. Mu saambo iyo, umusaayi ali ni khuuloombela umukhasi uyo khulwe khukhwibeena ukhwo, isi Umukasya.

³¹“Ni nashiryo, muli ni khuubona muri babaandu ba Isiraeli sibaabakho bye bunyaalu ta. Khulwekhuuba ni beetsa aambi n'isaanduuku yase iye indakaano nga balikho bunyaalu, kane linaambo lyoosi lihele liwewo.

³²“Likaambila lino liwaamba khu musaani ufumukha kimiindu, ni n'oyo isi kameetsi ke basaani karura konyene busa,

³³n'umukhasi uuli khuutsya i masaaba. Naluundi liwaamba khu muundu yeesi uwibeena, n'umusaani uwitubaasa n'umukhasi uba nga alikho bunyaalu.”