Read lumasaaba Ba Levi 16 Bible Online

Ba Levi 16 - lumasaaba bible

Ba Levi 16

¹Babaana ba Aroni babili abe baamala khaale khufwiila mu moni tsy'Omukasya, khulwe khuumuminyaalila.

²Kila umukasya lwanyuma lwayo alomela Musa ari, “Boolela wandaayo Aroni khuulekha khukhwiitsa mu shifwo shishifuura bukhosefu shishiili inyuma we ngubo isi basuunga, ibweeni we shitsoloŋo she khukhwiyakhilakho bibyoonako, buli mbuka isi aba wekanisiile ta. N'akhola isho, kane afwe. Khulwekhuuba ise imbonekhela mu mafuumbi nga ndi angaaki we shitsoloŋo isho.

³Nga Aroni atsya khukhwiingila mu shifwo shikhosefu, ali ni khuureera iwuunwa isoleeli nga isaayilo irusawo bibyoonako, ni limiiku, nga isaayilo intsoshe.

⁴Ali ni khuukwaara shikwaaro she khu ngaaki shishiili shikhosefu, ne nga mukari wakwaariiremo bikwaaro bibiindi. Ali ni khukhwibowa kumusipi, naluundi ebowe shishiindu imurwe. Biikwaaro bino bili bikhosefu, nashiryo ali ni khukhwisiinga nio abikwaare.

⁵Ali ni khuuyila khukhwaama mu lituuli lye ba Isiraeli, tsindurume tsibili nga tsisaayilo tsye khuurusawo bibyoonako, ni limiiku litweela, nga isaayilo intsoshe.

⁶“Aroni ali ni khuuwaanayo iwuunwa iyo nga isaayilo irusawo bibyoonako byeewe, nga eloombela umweene ni be muungo mweewe.

⁷Lwanyuma ayile tsimbusi tsana tsibili itsyo ibweeni w'Omukasya, iburaangisi we kumulyaango kwe liisari likhosefu.

⁸Atsikhupekho khaakokha, nga khatweela kh'Omukasya, ne khakhaandi kha Azazeli[2].

⁹Imbusi isi khakokha kh'Omukasya khawaambile, Aroni ali ni khuukiwaanayo nga isaayilo irusawo bibyoonako.

¹⁰Ne imbusi isi khaakokha khakwiilekho nga iya Azazeli, Aroni ali ni khuukireera mu moni tsyase nga ishiili inamu, akikholelekho kumukholo kwe khuurusawo bibyoonako bye babaandu, nio akelewo akisiindikhe itsye mu mubiimbi.

¹¹“Aroni umweene ali ni khuuwaanayo iwuunwa nga isaayilo, khuuloomba Umukasya amwiyakhile niye ni be muntsu yeewe, bibyoonako byaabwe.

¹²Lwanyuma abukule shipwakhuli nga shetsuule kamaanda kakeseŋeeŋile khukhwaama khu sheeso, atweela ni bikalabo bibili bye bubaani buunose, abireere mu shifwo shishiminyisa buukhosefu.

¹³Nga woolile iyo, abukule bubaani abure khu mulilo, nio akile shiifwo shiikhosefu shoosi shitsulemo lisuusi. Ali ni khuukhola shino, ne busa ta, kane afwiile ibweene iyo.

¹⁴Lwanyuma ali ni khuuraambisa lulwaala lweewe, abukule khu malasile k'ewuunwa, akasalaase luwaande lwe bwaamanyaanga we shitsoloŋo she khukhwiyakhila bibyoonako. Ne nga ali ibweeni we shitsoloŋo, ali ni khuusalaasa kimiluundi musaafu.

¹⁵“Aroni akelewo akhoonye imbusi iye saayilo ye khuurusawo bibyoonako bye babaandu. Areere kamalasile kaayo mu shifwo shikhosefu, nga n'akholile kamalasile k'ewuunwa. Akasalaase khu shitsoloŋo she khukhwiyakhila bibyoonako, n'ibweeni washo.

¹⁶Musaambo iyo, arusewo bibyoonako byeesi babaandu ba Isiraeli baakhola, mu shiifwo shikhosefu. Ikhaba ni liisari ly'Omukasya liliili ano akari enywe, ali ni khulikholakho nisho shitweela.

¹⁷Mbaawo umuundu ukuundi ufukiilisibwa khuuba mu liisari nga Aroni wengiilemo khukhwiloombela umweene, ni be muntsu yeewe, ni khuuloombela babaandu ta, khukhwoolesa nga waamalile khuurura antsye.

¹⁸Nga waamalile khuurura mu lisari, ali ni khuuwakha kamalasile ke iwuunwa ni k'embusi khu ntsika tsye shisheeso, khuushipyeluusa.

¹⁹Ali ni khuuraambisa lulwaala lweewe khuusalaasa kamalasile khu sheeso kimiluundi musaafu, nio abe nga waashipyeluusiile ilala khukhwaama khu byoonako bye babaandu.

²⁰“Lwanyuma lwe khuupyeluusa shifwo shikhosefu, lisari likhosefu, ni shisheeso sha buroonzi, ali ni khuureera imbusi iyo ishiili inamu, ibweeni we liisari.

²¹Akirekho kamakhono keewe koombi khu murwe kwayo, ebiyise bibyoonako bye babaandu byoosi. Arobore umuundu ayile imbusi iyo mu mubiimbi, niyo ibe iyila bibyoonako bye babaandu mu mubiimbi.

²²Imbusi yino isuta busiro bwe bibyoonako bye ba Isiraeli, bali ni khuukiyila bakilekhe ikendaane iyo busa mu mubiimbi.

²³“Lwanyuma Aroni ali ni khuukobola mu lisari likhosefu, eyabule bikwaaro biikhosefu byeesi akwaarire, nga n'engiile mu shifwo shikhosefu. Ali ni khuubilekha mu bweene umwo.

²⁴Ali ni khukhwisiingila mu shifwo shikhosefu, nio lwanyuma akwaare bikwaaro biikhosefu, atsye awaaneyo tsisaayilo tsintsoshe, nga khulikho iyeewe n'iye babaandu. Mu saambo iyo, abe aloombela babaandu ni naye umweene, Umukasya abeyakhile bibyoonako byaabwe.

²⁵Kiminaawa khukhwaama khu saayilo tsino tsitsirusawo bibyoonako, ali ni khuukyoshela khu sheeso.

²⁶“Umuundu uyila imbusi iyo waakilekhuula yaatsya wa Azazeli, ali ni khuusiinga bikwaaro byeewe, ni naye umweene, nio akobole mu kaambi.

²⁷Inyama iramire khu wuunwa n'imbusi byeesi barusirekho kamalasile, baakayila mu shifwo shishiminyisa bukhosefu, bali ni khuukisuta bakiyile ibulafu w'ekaambi. Lisyeelo, ni nyama iyo, ni byeenda, bali ni khuubyooshela busa mu mulilo.

²⁸Uyo uwoosha bibiindu ibyo, ali ni khuusiinga bikwaaro byeewe, naluundi umweene naye esiinge, nio akoboleyo mu kaambi.

²⁹“Lili likaambila liri, khu shifukhu she likhumi, mu mweesi kwe kumusaafu, mwabeene muli ni khukhwiiwa shitaambiso, nga simukhola kumulimo kwoosi ta. Ikhaba babeetswa babaamenya ni nanywe sibali ni khuukhola kumulimo ta.

³⁰Khulwekhuuba khu shifukhu isho, bakhaabaloombele inywe isi Umukasya, nio abeyakhile inywe bibyoonako byeenywe.

³¹Lino lili likaambila khukhwaama ari. Shino shili shifukhu sha Sabato, she khuuwola khuukhosefu. Muli ni khukhwiiwa biitaambiso.

³²Uyo yeesi isi baamala khaale khuubiita tsiikhabi nga umusaayi umukhulu, nga uwiila mu bikele bya paapa weewe, ali ni khuukwaara bikwaaro bikhosefu, aloombele babaandu isi Umukasya.

³³Ali ni khuuloombela shiifwo shikhosefu, lisari likhosefu, shisheeso sha buroonzi, basaayi boosi, atweela ni babaandu boosi.

³⁴Shino shili shifukhu she angaaki she khukhwiyakhila babaandu ba Isiraeli boosi bibyoonako. Nashiryo muli ni khuushikholatsaka buli kumwiiko.”