Read lumasaaba Ba Levi 17 Bible Online

Ba Levi 17 - lumasaaba bible

Ba Levi 17

¹Umukasya waalomela Musa ari,

²boolela Aroni, ni basoleeli beewe, ni babaandu boosi, bibiindu bino.

³Umu Isiraeli yeesi n'erira iwuunwa, namwe lisheese limeeme, namwe imbusi mu kaambi, namwe ibulafu w'ekaambi,

⁴nga siwareerire shishaayo isho khuushiirira amulyaango kwe lisari likhosefu, nio akiwaaneyo isi Umukasya nga shiwaanwa ta, aba ali ni kumusango kwe khuutsukha kamafuki. Bali ni khuumutuuma ibulafu we lituuli lye ba Isiraeli.

⁵Shimanyisa shiri khukhwaama ari, nga umuundu awaanayo isaayilo iye shishaayo, ali ni khuukireera ibweeni we lisari likhosefu. Mbaawo khuukiirira mu kyeewa busa ta.

⁶Umusaayi ali ni khuusalaasa kamalasile khu sheeso sh'Omukasya, shishiili ibweeni we lisari likhosefu. Ali ni khukhwoosha kiminaawa kye shishaayo isho, nio akile kyaamekho isilikakha iwunya bulaayi.

⁷Ni nashiryo, khukhwaama ari, mbaawo babaandu khuuwaanayo tsisaayilo isi ba wele matsakha babaali nga tsiimbusi ta. Likaambila lino lili ni khuubawo khuumala kimiboolo kyoosi.

⁸Baboolele uri, umuundu yeesi umu Isiraeli, namwe umwiitswa ubamenyamo, uwaanayo isaayilo, namwe shiiwaanwa,

⁹nga siwashireerire amulyaango kwe lisari likhosefu khuukiwaanayo isi Umukasya ta, umuundu uyo bali ni khuumutuuma ibulafu we lituuli lye ba Isiraeli.

¹⁰Umukasya waaloma ari, umu Isiraeli yeesi, namwe umwiitswa yeesi ubamenyamo siinga alya kamalasile, kane ise imukhupe kumukoongo, indekhe khumwinaanayo ta. Naluundi kane ise imuruse khu lituuli lye babaandu babaaramire.

¹¹Buulamu bwe shishaayo buli mu malasile kaasho. Naluundi ise naabaweele inywe kamalasile kaasho khuukaraambisa khu sheeso nga she khuurusawo bibyoonako. Nashiryo, mu shifwo she khuuwaanayo buulamu bw'omuundu, kamalasile niko kakaaraambisibwa khuurusawo bibyoonako.

¹²Nashiryo ise naalomela ba Isiraeli indi, mbaawo umuundu mus'iinywe uuli ni khuulya kamalasile ta, ikhaba umwiitswa umenya ni nanywe.

¹³Abe ikhaba inywe mwabeene namwe babeetswa beesi mumenya ni nabo, ne nga weerire khanywiinywi namwe khasolo, uli ni khuukhenamisa kamalasile katsye kaweelemo ilala, ukabiimbekho ni liloba.

¹⁴Khulwekhuuba buulamu bwe shibuumbe shoosi, buli mu mafuki kaasho. Nashiryo ise nalomeele ba Isiraeli indi mukhalya kamafuki ke shiibuumbe shoosi ta. Uyo yeesi ukane akalye, kane atuumibwa ibulafu we lituuli lye babaandu baase.

¹⁵Umuundu yeesi oba Umwikhali umu Isiraeli, namwe umwiitswa, uulya shishaayo shishifwiile shonyene busa, namwe shishaayo sheesi isolo iye mwiiswa yiirire, ali ni khuusiinga bikwaaro byeewe, naluundi umweene esiinge. Kane arame nga alikho bunyaalu khukhwoolesa angoloobe.

¹⁶Ne singa alekha khusiinga bikwaaro, namwe waalekha khukhwisiinga umweene ta, aba ali ni kumusango khulweesho sheesi akholile.