Read lumasaaba Ba Levi 18 Bible Online

Ba Levi 18 - lumasaaba bible

Ba Levi 18

¹Umukasya waalomela Musa ari,

²Boolela ba Isiraeli uri ise ndi niye Umukasya Wele waabwe.

³Nashiryo mukhaloondelela tsisaambo tsye ba Misiri tsyeesi mwabona nga mumenyayo ta. Namwe mukhaloondelela byeesi babaandu babaali mu Kanaani, isi indi khuubayila, bakhola ta. Mukhaloondelela intsibirisa yaabwe ta.

⁴Ise ndi Umukasya Wele weenywe, ni nashiryo muli ni khuuloondelela bilakilo byase, ni indeekela yase. Ise ndi Umukasya Wele weenywe.

⁵Nashiryo muli ni khuuloondelela biilakilo byaase n'indeekela yase.

⁶Ise ndi Umukasya Wele weenywe. Mbaawo umuundu yeesi uuli ni khukhwitubaasa n'umulebe weewe, waamukhola umukhasi namwe umuseetsa ta.

⁷Mbaawo khuuwaamba maayi woowo ukhusaala waamukhola umukhasi ta. Khulwekhuuba ukhwo khuba khuumalamo paapawo lukoosi lweewe, naluundi uyo ali maayi woowo.

⁸Mbaawo khuuwaamba umukhasi uwa paapawo, waamukhola umukhasi ta. Isho shimalamo paapawo lukoosi lweewe.

⁹Mbaawo khuuwaamba umukooko woowo umweene, namwe umukooko woowo uwa maayi woowo ukuundi, oba baamusalila aango namwe ibulafu, waamukhola khuuba umukhasi ta.

¹⁰Mbaawo khuuwaamba umwitsukhulu woowo umukhaana, waamukhola umukhasi ta. Khulwekhuuba ukhwo khuba khukhwiimalamo wamweene shiirifwa.

¹¹Mbaawo khuuwaamba umukooko woowo isi umukhasi uwa paapawo asaala n'umuundu ukuundi, waamukhola umukhasi ta. Khulwekhuuba ali umukooko woowo.

¹²Mbaawo khuuwaamba seenge woowo, waamukhola umukhasi woowo ta, khulwekhuuba ali uloondekhana ni paapa woowo.

¹³Mbaawo khuuwaamba wandaaye uwa maayi woowo, waamukhola umukhasi woowo ta, khulwekhuuba ali uloondekhana ni maayi woowo.

¹⁴Mbaawo khuuwaamba umukhasi wa wandaaye wa paapawo, waamukhola umukhasi ta, ukhwo khuba khuumumalamo lukoosi, naluundi aba ali maayi woowo.

¹⁵Mbaawo khuuwaamba umukhasi w'omwaana woowo, waamukhola umukhasi ta, ukhwo khuba khuumalamo umwaana woowo shiriifwa.

¹⁶Mbaawo khuuwaamba umukhasi wa wandaayo, waamukhola umukhasi uwoowo ta, ukhwo khuba khuumumalamo niye shiriifwa.

¹⁷Ukhawaamba umukhasi atweela n'umwaana weewe umukhaana, ni babeetsukhulu beewe bakhaana, waabakhola khuuba bakhasi boowo ta, khulwekhuuba bano baba balimo ni buulebe, naluundi shiba shishoonako she khukhwitubaasa ni baalebe.

¹⁸Nga umukhasi woowo ashiili umulamu, ukhayila wandaaye weewe khuuba umukhasi woowo ta, ukhwo khuba khuumalamo umukhasi woowo shiriifwa.

¹⁹Nga umukhasi ali i masaaba, aba alikho bunyaalu, nashiryo mbaawo umuundu khuuba ni naye, waamumalamo shiriifwa sheewe ta.

²⁰Mbaawo khuuwaamba umukhasi uwowasho waamukhola umukhasi uwoowo ta, awo uba wereere wamweene khuubakho she bunyaalu.

²¹Mbaawo khuuwaamba babaana beenywe mwaabawaanayo nga tsisaayilo isi wele Moleki ta. Khulwekhuuba isho shiba shiimalamo ise Umukasya Wele weenywe lukoosi.

²²Mbaawo umusaani khuuwaamba umusaani washe waamukhola khuuba umukhasi weewe ta, isho shili she mbikho.

²³Mbaawo umuundu khuuwaamba shishaayo waashikhola khuuba umukhasi weewe ta, aba wereereere umweene khuubakho she bunyaalu. Namwe ikhabawo umukhasi uwaamba shishaayo waashikhola khuuba umuseetsa weewe ta, isho shiba she mbikho.

²⁴Ikhabawo umuundu mus'iinywe ukhola bibiindu nga bino biri ta. Khulwekhuuba kamanaambo keesi ise ndi khuutimisa karure mu Kanani katsye, abe kakhola bye bunyaalu nga bibyeene ibyo.

²⁵Waakila liloba lyaabwe lyeetsula bye bunyaalu, nashiryo ise nabawa shitaambiso khulwe bibyoonako byaabwe. Nashiryo ise nabarusa nibo khu liloba ilyo, naafwaana busa nga umuundu n'alusaka byeesi amalile khaale khuulya.

²⁶Ne inywe, atweela ni babaandu beesi munyoolamo, ni babeetswa babaamenya ni nanywe, muli ni khuuloondelela kamakaambila kaase, ni biilakilo byaase.

²⁸Ni mwibirisa buubi, kane liiloba libekaane, libatuume ibulafu, nga umuundu n'aalusaka byeesi amalile khaale khuulya.

²⁹Khulwekhuuba umuundu yeesi ukhaakhole bibiindu nga ibyo, bali ni khuumutuuma ibulafu we lituuli lye babaandu baase.

³⁰Ise ndi Umukasya Wele weenywe, nashiryo muli ni khuuloondelela byeesi ise imbalakiile ndi, mukhakholakho biikholwa bye mbikho ibyo ta. Naluundi mukhewaambila mu biindu bibikila inywe mwaabakho she bunyaalu ta.