Read lumasaaba Ba Levi 19 Bible Online

Ba Levi 19 - lumasaaba bible

Ba Levi 19

¹Umukasya waalomela Musa ari,

²Boolela lituuli lye ba Isiraeli uri bali ni khuuba baakhosefu, khulwekhuuba ise Umukasya Wele weenywe indi umukhosefu.

³Ise ndi Umukasya Wele weenywe, ni nashiryo buli mutweela ali ni khukhwiisamo paapawe ni maayi weewe shiriifwa. Naluundi buli mutweela ali ni khukhwiisamo shifukhu sha Sabato lukoosi.

⁴Ise ndi niye Umukasya Wele weenywe, nashiryo mbaawo khuubuumba bifwaani busa nga ba wele ta.

⁵Nga umuundu akaanisayo isaayilo ireera lukoosi isi Umukasya, shitsilililwa shili ni khuuba shiri nio Umukasya akaanile khuuloomba khw'omuundu uyo.

⁶Isaayilo iyo bali ni khuukiliilawo khu shifukhu isho, namwe khu shifukhu shishiilakho. Ne iramakho yoosi khukhwoolesa khu shifukhu shishikhola khataru, bali ni khuukyoosha busa ni kumulilo ilale, iwewo.

⁷Ni mukilya khu shifukhu shishikhola khataru, isho shiba she imbikho, ise singana ifukiilile isaayilo iyo ta.

⁸Uyo yeesi ulya khu saayilo iyo aba waasaalile kumusaango, khulwekhuuba aba wafwotsoole shishiindu shishiili shikhosefu isi Umukasya. Umuundu uyo bali ni khuumutuuma ibulafu we lituuli lye ba Isiraeli.

⁹Nga mukesa biilyo khukhwaama mu mukuunda, muli ni khuulekhakho bye khu ndulo khwe kumukuunda, ni n'ebyo bibikwa aasi mukhabyangala ta.

¹⁰Nga mukesa kimizabibu kyeenywe, mukhamalilakho ilala ta, namwe mwangala ikyo kikikwiile aasi ta. Muli ni khuulekhela abo babaali bataambi, namwe babeetswa. Ise ndi Umukasya Wele weenywe.

¹¹Mukheebatsaka shabeene, namwe mwaakanikha bye bubeeyi, namwe mwaalyakhana ta.

¹²Ise ndi Umukasya Wele weenywe, nashiryo mukharaambisa lisiina lyase nga mwitsuba byeesi mukhali khuutsya khukhwoolelesa ta.

¹³Mukhamiinikhilisatsaka basheenywe, namwe mwaanuula bibiindu byaabwe ta. Muli ni khuusasula kumukheemba kw'omuundu ubaraambiire kumulimo, khu shifukhu shisheene sheesi araambiire.

¹⁴Mukhatsubatsaka umuundu uuli umumiinyi ta. Namwe mukharawo shishiindu shaareka umuundu uuli umubofu ta. Isho muli ni khuushikhola khulwe khukhuuntsisamo ise lukoosi, khulwekhuuba ise ndi Umukasya Wele weenywe.

¹⁵Nga mukhala kimisaango, mbaawo khukhwikhupila lubeka lutweela ta, akhali muli ni khukhwookesanisa bwaŋali isi basheenywe, oba bali bataambi namwe bayiinda.

¹⁶Ukhakyeendaana busa mu baandu nga usalanisa kamatsi ta. Naluundi mukhaloba khuuwayo bujulisi bubunyala bwaayeeta umuundu mu musaango ta.

¹⁷Ukhawaambila uwashoowo liirima waamubiikha mu mwoyo kwoowo ta. Naluundi nga umuundu waakhukhalasile, ukharya khuumulomakho ta. N'ulekha khukhola isho ta, kane ube waakholile shishoonako.

¹⁸Ise ndi Umukasya Wele weenywe. Nashiryo mukhelihaasa ibyo byeesi babaakholilekho, namwe mwaaba ni likoko isi basheenywe ta. Akhali muli ni khuukana basheenywe nga ni mwikana mwabeene.

¹⁹Muli ni khuuloondelela biilakilo byaase, mubone muri, mbaawo umuundu uwaamba shishaayo she isaambo ikiindi, ari shisaale inyana mu shaayo she isaambo ikiindi busa ta, namwe ikhabawo ubyaala biilimwa bye bikuuka bibili mu mukuunda mutweela ta. Naluundi mbaawo khuukwaara ingubo isi baarukha mu buwutsi bwe tsisaambo tsibili ta.

²⁰Umusaani n'awaamba umukulwa uwekhasi isi umuundu ukuundi aamala khaale khuuselela, waamukhola umukhasi uweewe, babaandu babili bano sibeeribwa ta, akhali umusaani ukholile isho ali ni khuuliha. Khulwekhuuba umukhasi abe ashiili umukulwa.

²¹Umusaani ukholile isho, ali ni khuuyila limiiku, nga isaayilo iye khukhwinyusawo bibyoonako, isi Umukasya. Ali ni khuukiyila ibweeni we lisari likhosefu,

²²umusaayi araambise limiiku ilyo khuuloomba ari Umukasya eyakhile umuundu uyo bibyoonako byeewe. Musaambo iyo, kane Umukasya eyakhile umuundu uyo bibyoonako byeewe.

²³Nga mwoolile khu liloba lyeesi ise intsya khubawa inywe, muli ni khuubyaala kimisaala kikyaama bibyaamo bye khuulya. Ne mu miiko kikinyoowa kiitaru, mukhalyakho bibyaamo byakyo ibyo ta.

²⁴Mu mwiiko kukuukhola khane, bibyaamo ibyo muli ni khuubiwaanayo musaambo iya buraawa nga biikhosefu, nga musiima Umukasya.

²⁵Ne mu mwiiko kukuukhola kharaano, bikhaame bibyaamo biikali naabi, nio mulye khu byeene ibyo. Ise ndi Umukasya Wele weenywe.

²⁶Mukhalya shishaayo, mwaalya ni kamalasile kaasho ta. Mukhewaambila mu bye bufumu ni khuulakula ta.

²⁷Mukhawaamba litsuune lyeenywe mwaalibowela inyuma khu ngoolo, namwe mwaabeka khu ndulo khwe bunwaanwa bweenywe ta.

²⁸Mukharona khu mibili kyeenywe bari khulwe khuulila baafu ta. Ise ndi Umukasya Wele weenywe.

²⁹Mukhawaanayo babaana beenywe bakhaana khuukhola bye buyeyani mu masaayilo ta. Ni mukhola isho, kane babaandu boosi bashuukhe beele khu ba wele babaandi, nio akile shiibala sheenywe shitsulemo bubwoonaki.

³⁰Ise ndi Umukasya, nashiryo muli ni khukhwiisa shiriifwa mu shifukhu sha Sabato ni shiifwo shase shiikhosefu.

³¹Ise ndi Umukasya Wele weenywe, ni nashiryo mukhatsya khukhwireeba khu baandu babaakanikha khuubirira mu bakuuka babaafwa khaale ta. Abo baboonakisa busa, mbaawo shiilayi shishibaamamo ta.

³²Babaandu baakhulu boosi, muli ni khuubesamo lukoosi. Naluundi muli ni khukhuuntsisaaya ise Wele weenywe, khulwekhuuba ise ndi Umukasya.

³³Nga iliwo umuundu uwe linaambo liliindi uwiitsile khuumenya ni nanywe mu shibala sheenywe, mukhamumiinikhilisa ta.

³⁴Muli ni khuubirisa umwiitswa musaambo isi mubirisamo babeekhali be mu shibala sheenywe, mumukane nga ni mukanana mwenyene. Khulwekhuuba nanywe lutweela mwaba babeetswa mu Misiri. Ise ndi Umukasya Wele weenywe.

³⁵Nga mupima buuleeyi, namwe buusiro, namwe buukali bwe shishiindu, mukhalyaakhana ta.

³⁶Muli ni khuuraambisa bipimo bituufu mu buli sheesi mupima. Ise ndi Umukasya Wele weenywe, uwabamusa inywe khukhwaama khu liloba lya Misiri.

³⁷Ise ndi Umukasya, nashiryo muli ni khuuloondelela biilakilo byase ni indeekela yase, mukhole nga ni biloma.