Read lumasaaba Ba Levi 21 Bible Online

Ba Levi 21 - lumasaaba bible

Ba Levi 21

¹Umukasya waalomela Musa ari, boolela basaayi nga nibo babaali basoleeli ba Aroni uri, ne muwaamba khu mulaambo kw'omuundu, kane mube mwerereere bunyaalu.

²Akhali unyala wawaamba khu mulaambo kwa maayi woowo, paapa woowo, umwaana woowo, wandaayo,

³namwe umukooko woowo ushiili khukhwalikha ta, khulwekhuuba s'aali n'umuseetsa ta.

⁴Ni mutsya khusiikha umuundu yeesi uuli uwe buulebe khuubirira mu khuyilana, muba mwereereere bunyaalu.

⁵Mukhabekakho litsuune lyeenywe, namwe khu ndulo khwe bunwaanwa bweenywe, namwe mwesalaka kimibili kyeenywe bari mwokesanisa khuulila baafu ta.

⁶Ise ndi Umukasya Wele weenywe, naluundi ise nabarobora inywe mwenyene khukhuuntsakaanisa ise tsisaayilo tsye bibiliibwa, khu sheeso. Ni nashiryo muli ni khuuba baakhosefu.

⁷Mukhayilatsaka umukhasi ukhola buyeyani, namwe umukhasi uwetubaasatsakakho n'umuundu ukuundi ta. Namwe mukhayila umukhasi isi umuseetsa aamala khaale khuuloba ta. Khulwekhuuba inywe muli bakhosefu isi ise Wele.

⁸Babaandu bali ni khuuyila umusaayi nga umukhosefu, khulwekhuuba niye uwaanayo kimikaati isi Wele weenywe. Umusaayi ali ni khuuba umukhosefu, khulwekhuuba ise Umukasya, ubawa tsiikhabi, indi umukhosefu.

⁹Umwaana umukhaana uw'omusaayi n'aba bari waakholile buyeyani, woonakisile shiriifwa sha paapa weewe, bali ni kumwookhela busa mu mulilo afwe.

¹⁰Uyo uuli umusaayi umukhulu mu baashe, akhalekha litsuune lyeewe lyaasakalala busa ta. Namwe akhonuula bikwaaro byeewe khukhwookesanisa kumutaambo, nga umuundu wafwiile ta.

¹¹Umusaayi umukhulu akhatsya aambi ni kumulaambo, waakila weereerera umweene bunyaalu ta. Abe ikhaba kumulaambo kwa paapa weewe namwe kwa maayi weewe.

¹²Namwe akharura mu shiifwo shikhosefu, namwe waareerera shifwo shikhosefu bunyaalu, bari atsya khusiikha umuundu ta. Niye ali uwabiitibwa ni kamafura ka Wele.

¹³Nga ayila umukhasi, ali ni khuuyila umukhaana indungubaasi,

¹⁴khukhwaama mu baandu babeewe babeene. Akhayila namulekhwa, namwe umukhasi yeesi isi umuseetsa aamala khaale khuuloba, namwe uyo ukhola bye buyeyani ta.

¹⁵Shino kane shiliinde babaana beewe nga sibali banyaalu ta, nio banyalise khukhuuntsakaanisa ise. Ise ndi Umukasya, niye uwabarobora nibo.

¹⁶Kila Umukasya alomela Musa luundi ari,

¹⁷“Boolela Aroni uri, mbaawo khu be lisaaye lyoowo ulikho buuleme bwoosi ufukiilisibwa khukhuuntsakaanisa ise nga umusaayi ta.

¹⁸Uyo yeesi ulikho buuleme, nga khuuba umubofu, umuleme, uyo uwe tsimbaaso mu moni, namwe bikele bikhalekhaana ta,

¹⁹uyo uwalemala kumukhono namwe shikele,

²⁰ulikho shiruumba, uwembiya naabi, isi tsiimoni tsikhabona buulayi ta, uuli ni buulwaale bwe lihaafu, namwe uyo isi baanyalula tsimiitso tsye busaani.

²¹Babaandu be saambo nga iyo, babaalikho buuleme, bakheetsa isi ise Umukasya, khuuwaanayo tsisaayilo ni biwaanwa ta.

²²Babaandu babaali nga abo, banyala baakabanana ni babaandi khu bilyo byeesi babaandu baba baareerire mu shifwo shikhosefu.

²³Ne bakhengila mu shifwo shikhosefu, namwe beetsa khu sheeso khukhuuntsakaanisa ise ta, khulwekhuuba balikho buuleme, banyala baakila shiifwo shikhosefu shaabamo bunyaalu. Khebulila muri ise Umukasya, niye uuwa basaayi tsikhabi, nio waakila baaba bakhosefu.”

²⁴Nashiryo, Musa waaboolela Aroni, ni basoleeli beewe, ni ba Isiraeli boosi bibiindu bino.