Read lumasaaba Ba Levi 22 Bible Online

Ba Levi 22 - lumasaaba bible

Ba Levi 22

¹Umukasya waalomela Musa ari,

²lomela Aroni ni basoleeli beewe uri, ise ndi Umukasya. Ni nashiryo bali ni khukhwiisamo biwaanwa byeesi babaandu bareerire lukoosi, nio awo babe nga beesile lukoosi mu lisina lyase.

³Baboolele uri ikhabawo na mutweela khu be lisaaye lyaabwe, oba bali be kumuboolo shiina, uuli ni khukhwiitsa isi bibiindu bikhosefu byeesi ba Isiraeli bareerire nga alikho bunyaalu ta. Umuundu yeesi uukane akhole isho, kane atuumibwe ibulafu we lituuli lye babaandu baase.

⁴Khu be lisaaye lya Aroni, umuundu yeesi uuli ni buulwaale bwe lihaafu, namwe nga alikho ni isi arura kimiindu khukhwaama mwibili mweewe, akhalyakho khu biindu bibiili bikhosefu ta, khukhwoolesa nga wepyeluusile. Ikhaba abo babaamalile khukhwitiila khu mulaambo, n'umusaani yeesi isi kameetsi kakaasaala babaandu kaba kaarurire mwibili mweewe khu bwako busa.

⁵Namwe nga wawaambile khu shimusiru shoosi shishiilikho bunyaalu, namwe nga wawaambile khu muundu yeesi ulikho bunyaalu.

⁶Khulwekhuuba umuundu yeesi uwaamba khu biindu nga ibyo, kane abe alikho bunyaalu khukhwoolesa angoloobe. S'aali ni khuulyakho khu biindu bibiili bikhosefu ta, akhali nga waamalile khukhwisiinga.

⁷Khukhwoolisa nga inyaanga yaakwiile, nio anyalise khuuba nga umupyeluuse. Ari awo anyalisa khuulya khu biindu biikhosefu, khulwekhuuba biilyo ibyo bili bye lisaaye lye basaayi.

⁸Shishaayo shishiifwa shonyene busa, namwe sheesi isolo yirire, nibo bakhalyakho ta.

⁹Bali ni khuushimanya bari ise ndi Umukasya, ubawa nibo tsiikhabi. Nashiryo bali ni khuuloondelela byeesi ise imbalakila. Ni balekha khuukhola isho ta, kane babe baakholile bibyoonako, bye khuulekha khukhwiisa lukoosi mu shiifwo she khukhwisaayilamo ta.

¹⁰Basaayi bonyene nibo babaali ni khuulya khu biindu bibiili biikhosefu. Babaandu babaandi busa, namwe babeetswa, namwe baraambi baabwe, sibakhiile khuulya khu biindu biikhosefu ta.

¹¹Ne n'iiba bari umusaayi waamala khuukula umukulwa khuuba uweewe, anyala khuulyakho. Ikhaba babaandu be muntsu y'omusaayi nabo banyala khuulyakho.

¹²N'iiba bari umwaana umukhaana uw'omusaayi wakhwaalikha khu muundu ukhali umusaayi ta, umwaana uyo s'anyala waalya khu biindu biikhosefu ta.

¹³Ne n'iiba bari umwaana umukhaana uyo ali namulekhwa, namwe umuseetsa waamuloba waamwikaana, namwe nga s'aali n'umwaana ta, ne waayilayo muntsu iya paapa weewe, anyala khuulya khu biilyo bya paapa weewe ibyo.

¹⁴Umuundu ukuundi yeesi uulya khu biilyo nga siwashitsililiile ta, ali ni khuusasulila biilyo ibyo, nga alooselakho ni n'eebyo bibyoola khaasiintsa khatweela khe kharaano, abiwe umusaayi.

¹⁵Umusaayi ali ni khukhwiisa lukoosi mu biwaanwa bikhosefu byeesi ba Isiraeli bawaanayo isi Umukasya.

¹⁶Shino shibayeete nibo, balekhe khuba ni bibyoonako ta. Khulwekhuuba ise Umukasya, niye ukila nio biwaanwa ibyo byekela biikhosefu.

¹⁷Umukasya waalomela Musa ari,

¹⁸Tsya uboolele Aroni ni babaana beewe, ni ba Isiraeli boosi, bibiindu byeesi intsya khukhuboolela bino. Inyala yaabawo umu Isiraeli, namwe mutweela khu beetswa ukana khuuwaanayo isaayilo intsoshe isi Umukasya khu bweewe busa, namwe nga khukhwoolelesa shisuubiso sheesi abe aamala khaale khuukhola. Nga bakhola shino, bali ni khuuwaanayo

¹⁹shishaayo shiseetsa nga seshilikho buuleme bwoosi taawe. Ili ni khuuba iwuunwa, namwe limiiku, namwe indurume.

²⁰Umuundu yeesi n'awaanayo shishaayo shishiilikho buuleme bwoosi, Umukasya singane ashakaanile ta.

²¹Umuundu n'aaba nga awaanayo isi Umukasya isaayilo khukhwaama mu byaayo byeewe ireerawo lukoosi, namwe khukhwoolelesa shishiitsubo sheesi akhola, namwe nga umweene ekanisa busa, ili ni khuuba nga s'iliikho buuleme bwoosi ta. Ne busa Umukasya singane akyakaanile ta.

²²Bibyaayo bibyafwa tsiimoni, bibyalemala, byeesi basalakakho, bibiili ni buulwaale bwe lihaafu, mukhabiwaanayo isi Umukasya ta. Namwe mukhabiwaanilayo khu sheeso nga tsisaayilo isi Umukasya ta.

²³Nga umuundu awaanayo khu bweewe busa, anyala wawaanayo iwuunwa, namwe khamiiku khakhaali ni shikele nga shishiimbi khuuminyisa bibiindi. Ne akhawaanayo shishaayo shishifwaana shiryo, nga awaanayo isho sheesi amala khaale khusuubisa ta.

²⁴Shishaayo shoosi sheesi baamala khaale khuulata, namwe nga bashinyalula tsimiitso, namwe nga tsayonuukhamo, mbaawo khushiwaanayo isi Umukasya ta.

²⁵Ikhaba bibyaayo byeesi mwaamisa khu be kamanaambo kakaandi, mukhabiwaanayo isi Umukasya ta, singene abifukiilise ta. Shino shili khulwekhuuba ndi babeene be bibyaayo ibyo, baba baamala khaale khuubilata.

²⁶Umukasya waalomela Musa ari,

²⁷nga ikhaafu, namwe likheese, namwe imbusi, byasaalile, tsinyana tsyabyo tsinyala khuurama ni maawe khuumala bifukhu musaafu. Khu shifukhu shishikhola shinaane, munyala mwabyakaanisayo nga tsisaayilo tsye khukhwookhela khu sheeso. Ise kane imbyakaanile.

²⁸Mukhawaamba ikhaafu n'imoosi yayo, namwe lisheese n'imeeme yalyo, mwabiwaanayo byoombi nga tsisaayilo khu shifukhu shitweela ta.

²⁹Nga muwaanayo tsisaayilo tsye khuusiima isi Umukasya, muli ni khuushikhola musaambo ikanibwa nio ise imbyakaanile.

³⁰Ise ndi Umukasya Wele weenywe, ni nashiryo muli ni khuulya inyama iyo yoosi khu shifukhu ni shisheene. Mbaawo khuukilekha yaakonawo ta.

³¹Ise ndi Umukasya weenywe, ni nashiryo muli ni khuuloondelela kamakaambila kaase, mukhole nga ni kaloma.

³²Ise ndi Umukasya ubawa inywe tsiikhabi. Nashiryo muli ni khukhwiisa lukoosi mu lisina lyase, ilekhe khubawo ulilekelesa ta.

³³Ise niye uwabarusa inywe mu Misiri, naabareera ino ndi nio ise imbe Umukasya Wele weenywe.