Read lumasaaba Ba Levi 23 Bible Online

Ba Levi 23 - lumasaaba bible

Ba Levi 23

²boolela ba Isiraeli uri ise samweene naamalile khaale khuurobora biifukhu biikhulu, byeesi mukhaabuusanatsakilekho, nga muntsisaaya ise.

³Muli ni khuukhola buraambi khuumala biifukhu bisesaba. Ne shifukhu she kumusaafu, shili sha Sabato, shiifukhu sh'Omukasya. Shili shikhosefu she khuuwolelakho. Khu shifukhu isho muli ni khuubuusana muntsisaaye ise, nashiryo mbaawo khuukhola buraambi bwoosi muungo tsyeenywe ta.

⁴Bino nibyo biifukhu bibiindi biikhulu by'Omukasya, byeesi muli ni khuuba nabyo, mu mbuka inyene.

⁵Shiifukhu sha Pasika y'Omukasya, muli ni khuuba nasho khuunanikha angoloobe e shifukhu she likhumi na bine, mu mweesi kwe ba Isiraeli kukuunyoowa.

⁶Khu biifukhu likhumi na biraano bye kumweesi mwene ukwo, muli ni khuuba ni shifukhu sh'Omukasya she kimikaati kikikhalimo kamamela ta. Muli ni khuulya kimikaati ikyo khuumala biifukhu musaafu.

⁷Khu shifukhu shishinyoowa, mbaawo umuundu khuukhola buraambi bwe kamaani ta, muli ni khuuba ni lubuusano lwe khukhuuntsisaaya ise.

⁸Mu biifukhu ibyo byoosi musaafu, khu buli shifukhu muli ni khuuwaanayo isaayilo isi Umukasya. Ni khu shifukhu shishiseembayo, muli ni khuuba ni lubusano lwe khukhuuntsisaaya ise, mukhakhola buraambi bwe kamaani ta.

⁹Umukasya waalomela Musa ari,

¹⁰Boolela ba Isiraeli uri, nga beetsile khwoola khu liloba lyeesi ise intsya khubawa nibo, nga baamalile khuukesa biilimwa biikiboole, buli mutweela ali ni khuubowa kumurwe kwe bibyaamo, ayilile umusaayi.

¹¹Nga baabiyilile isi umusaayi khu shifukhu shishiloosela khu sha Sabato, umusaayi ali ni khuubisuta angaaki, abiwaaneyo isi ise, nio nase imbyakaanile.

¹²Khu shifukhu khweesi umusaayi asutila biilimwa ibyo angaaki mu moni tsyase, muli ni khuuwaanayo isi Umukasya, limiiku lilyaana, lilyoolesa kumwiiko mutweela, naluundi lilikhalikho buuleme bwoosi ta, nga isaayilo intsoshe.

¹³Muli ni khuureererakho buufu buunose naabi bubwoolisa tsikilo tsibili, nga baatubaasilemo ni kamafura ke kuusaala ku olivu. Bino bali ni khuubyooshela khu sheeso sh'Omukasya, nio isilikakha yiitukhe yiitse mu moni tsyase. Naluundi bali ni khuureererakho i lita indweela iy'eviini, nga isaayilo iye she khuunywa.

¹⁴Ise ndi Wele weenywe, nashiryo imbalakila ndi mbaawo khuulyakho biilimwa biyaakha, namwe byeesi bakholile khukhwaama mu bilimwa ibyo, nga simwanyooyile khureera biwaanwa ibyo isi ise ta. Likaambila lino liliwo khuumala biilo ni biilo, mu miboolo kyeenywe kyoosi.

¹⁵Khukhwaamila khu shifukhu shishiloosela khu Sabato isi muyiliile bye likesa isi umusaayi, muli ni khuubala tsisaabiiti tsimbuufu musaafu.

¹⁶Khu shifukhu she kamakhumi karaano, nga nisho shishiloondelela Sabato ikhola musaafu, muli ni khuuyila isaayilo iye biilyo bishaakha ibyo isi Umukasya.

¹⁷Khukhwaama muungo tsyeenywe, muli ni khuureera kimikaati kibili kyeesi umusaayi ali ni khuusuta angaaki, akyakaaniseyo isi ise. Buli kumukaati kuli ni khuuba nga kulimo kamamela, nga bakuteekha khukhwaama mu kilo tsibili tsye buufu buunose naabi, bubwaama mu likesa lishaakha.

¹⁸Khu mikaati ikyo, muli ni khuureererakho kamamiiku kamaana musaafu, nga shikalikho buuleme bwoosi ta, imoosi iwuunwa indweela, ni kamamiiku kabili. Bino bili ni khuuba nga nibyo tsisaayilo tsintsoshe tsitsiwaanibwayo isi Umukasya. Bali ni khuureererakho isaayilo iye biilimwa biikhupake, n'isaayilo iye she khuunywa. Atweela byoosi biikele isaayilo intsoshe ireera isilikakha isi Umukasya.

¹⁹Muli ni khuuwaanayo indurume indweela nga isaayilo irusawo bibyoonako, ni kamamiiku kamaana kabili nga buli litweela lyoolisa kumwiiko mutweela, nga isaayilo ireera lukoosi.

²⁰Umusaayi ali ni khuuwaamba kamamiiku kamaana ako atweela ni kimikaati ikyo, abisute angaaki, abiwaaneyo isi Umukasya. Biwaanwa ibyo bili bikhosefu, naluundi bili shiwaanwa shase sheesi imba basaayi.

²¹Khu shifukhu sheene isho, muli ni khuuba ni lubusano lukhosefu, lwe khukhwisaaya. Mbaawo khuukholakho buraambi bwoositsana ta. Shilakilo shino shili she biilo ni biilo muungo tsyeenywe, khuumala kimiboolo kyoosi.

²²Nga mukesa biilimwa byeenywe, mukhakesa ni mwoolela ilala khu ndulo khwe kumukuunda ta, namwe mukheela imukoongo khuukesa ibyo bibiramiremo ta. Ibyo mulekhela bataambi ni babeetswa babaamenya ni nanywe. Ise Umukasya Wele weenywe niye ulakiile.

²³Umukasya waalomela Musa ari,

²⁴Boolela ba Isiraeli uri, khu shifukhu shishinyoowa, mu mweesi kwaabwe kwe kumusaafu, shili ni khuuba shifukhu she khuuwola, akhali khuukhola khakhaandu khoosi ta. Nio lwanyuma uri bafuura tsifulumbeti, mubuusane atweela mwisaaye, naluundi muwaaneyo tsisaayilo tsyeenywe khu sheeso.

²⁵Khu shifukhu isho mbaawo khuukhola buuraambi bwoosi ta, muli ni khuuwaanayo isaayilo intsoshe isi Umukasya.

²⁶Umukasya waalomela Musa ari,

²⁷Shiifukhu shishikhola liikhumi she kumweesi kweenywe kwe kumusaafu, shili she khukhwiyakhilakho bibyoonako. Shili shifukhu she lubusano lukhosefu. Muli ni khuubuya intsala, khukhwookesanisa muri mwebiyisile bibyoonako byeenywe, naluundi muwaaneyo isaayilo intsoshe isi Umukasya.

²⁸Mbaawo khuukhola buuraambi bwoosi khu shifukhu isho ta, khulwekhuuba shili she khukhwiyakhilakho bibyoonako. Muli ni khuuwaanayo tsisaayilo, nio ise Umukasya, imbeyakhile inywe bibyoonako byeenywe.

²⁹Uyo yeesi uloba khuubuya intsala khu shifukhu isho, ikhaamutuume ibulafu we lituuli lye babaandu baase.

³⁰Uyo yeesi ukhola buraambi khu shifukhu sheene shino, uyo ise ikhaamwoonakise arurewo mu baandu baase.

³¹Mbaawo khuukhola buraambi bwoosi ta. Shino shili shilakilo she biilo ni biilo muungo tsyeenywe, khuumala kimiboolo kyoosi.

³²Shiifukhu isho shili ni khuuba shikhosefu sha Sabato, she khuuwola, naluundi buli mutweela ali ni khuubuya intsala. Muli ni khuukhola shino khukhwaamila angoloobe e shifukhu shishikhola syeenda, khukhwoola angoloobe e shifukhu shishikhola liikhumi.

³³Umukasya waalomela Musa ari,

³⁴“Boolela ba Isiraeli uri, shifukhu she likhumi na biraano she kumweesi kweenywe kwe kumusaafu, shili shifukhu she khukhwiisamo Umukasya lukoosi, she kamasari.

³⁵Khu shifukhu shishinyoowa khu biifukhu ibyo, mbaawo uuli ni khuukhola buuraambi ta. Muli ni khuuba ni lubusano lukhosefu, lwe khukhwisaaya Umukasya.

³⁶Muli ni khuuwaanayo tsisaayilo khu sheeso khuumala biifukhu musaafu. Shifukhu she shinaane muli ni khuuba ni lubusano lukhosefu lwe khukhwisaaya Umukasya, naluundi muwaaneyo tsisaayilo tsintsoshe. Mbaawo khuukhola buraambi bwoosi ta.

³⁷“Biifukhu bino nibyo byeesi ise Umukasya imalile khuurobora, khweesi babaandu baase bali ni khuubuusanilakho khukhwisaaya. Naluundi khu byeene ibyo, bali ni khuuwaanayo tsisaayilo tsintsoshe, ni tsye biilimwa, ni tsye bye khuunywa, nga buli isaayilo bakikhola khu shifukhu shishayo.

³⁸Bifukhu bye kamayiiya bino, bili ni khuuloosela busa khu biifukhu bya Sabato tsitsiiliwo, ni n'ebyo bye biwaanwa byeesi babaandu basuubisa, ni n'ebyo byeesi bawaanayo khu bwabwe busa, nga ni babiwaanayo isi Umukasya.

³⁹“Muli ni khuushimanya muri muli ni khuurakikha kamayiiya ke kamasari khu shifukhu she likhumi na biraano, mu mweesi kweenywe kwe kumusaafu, nga mwaamalile liikesa. Muli ni khuulya kamayiiya kano khuumala biifukhu musaafu, nga muntsisamo ise lukoosi. Shifukhu shishinyoowa ni shishimaliilisayo, mbaawo khuukholakho buuraambi bwosiitsana ta.

⁴⁰Khu shifukhu shishinyoowa, muli ni khuurema bibyaamo byeenywe biilayi naabi, ni tsisakya tse kamasheendu, mubireere mwikhoyele ni nabyo mu moni tsy'Omukasya, khuumala biifukhu musaafu.

⁴¹Buli kumwiiko muli ni khuulya kamayiiya k'Omukasya kano khuumala biifukhu musaafu. Lino lili likaambila liliili ni khuubawo mu miboolo kyoosi.

⁴²Inywe mumuuli ba Isiraeli mwabeene, muli ni khuumenya mu bisari khuumala biifukhu musaafu.

⁴³Shino shikile kimiboolo kikiitsa mu moni kimanye kiri ise nalekha ba Isiraeli baamenya mu masari, nga nio naabaamisile mu Misiri. Ise ndi niye Umukasya Wele weenywe.”

⁴⁴Nashiryo, mu saambo iyo, Musa waalakila ba Isiraeli khuulyatsaka kamayiiya ke bifukhu bye khukhwiisamo Umukasya shiriifwa.