Read lumasaaba Ba Levi 24 Bible Online

Ba Levi 24 - lumasaaba bible

Ba Levi 24

¹Umukasya waalomela Musa ari,

²Boolela ba Isiraeli uri bali ni khuureera kamafura ke kuusaala ku olivu kamalayi kameene, ukatsukhe mu taala, nio buwaanga buramatsake nga buburukha busheele.

³Buli angoloobe Aroni ali ni khuuwaambisa tsitaala, tsirame nga tsyaaburukhila ibweeni we sanduuku iye indakaano, mu moni tsy'Omukasya, khukhwoolesa kumutikhinyi. Isho nisho shifwo shishifuurisa bukhosefu. Kimiboolo kyoosi kili ni khuuloondelela likaambila lino.

⁴Aroni ali ni khuubona ari, aliinda tsitaala itsyo tsitsiili khu kusiindi kwe zaabu, naluundi ali ni khuubona ari tsyaaburukhila busheele mu moni tsy'Omukasya.

⁵Umukasya waalomela Musa ari, “Bukula buufu buunose naabi bubwoola tsikilo likhumi na tsibili, uteekhemo kimikaati likhumi na kibili.

⁶Lwanyuma kimikaati ikyo ukirewo mu minyele kibili, nga buli kumunyele kulimo kimikaati kisesaba. Uli ni khuukira khu meetsa isi baawakhakho izaabu yonyene busa, ili mu moni tsy'Omukasya.

⁷Naluundi mu buli kumunyele kwe kimikaati, uli ni khuuramo bubaani bubweene busa, buyile shiifwo she kimikaati kyeesi waakaanisileyo isi Umukasya.

⁸Buli shifukhu sha Sabato, Aroni ali ni khuukhola aryo, mu moni tsy'Omukasya, akhali khukhwakama ta. Ali ni khuukhola shino nga indakaano iye biilo ni biilo, mu lisina lye ba Isiraeli boosi.

⁹Kimikaati ikyo kili kya Aroni ni basoleeli beewe, naluundi bali ni khuukiliila mu shifwo shikhosefu, khulwekhuuba isho nisho shisiintsa shishiminyisa buukhosefu, mu bilyo byeesi baakaanisayo isi Umukasya.”

¹⁰Ari, abe iliwo umusaani mutweela nga maayi weewe ali umu Isiraeli, ne paapa weewe ali umu Misiri. Shifukhu shitweela, umusaani uyo waatsya waasoolanila mu kaambi n'umusaani ukuundi uwaba umu Isiraeli.

¹¹Umusaani uyo uwaba nga maayi weewe ali umu Isiraeli, waaloma biilomo bye khuutsuba nga akhomyaasa lisina ly'Omukasya. Lisina lya maayi w'omusaani uyo abe bari Shelomisi, umukhaana uwa Dibiri, khukhwaama mu shikuuka sha Dani. Nashiryo bawaamba umusaani tsana uyo, baamuyila isi Musa.

¹²Baamuliinda nga ali umubowe, nga bashiliindiilila abe sheesi Umukasya atsya khukhalawo khu lomo iyo.

¹³Kila Umukasya alomela Musa ari,

¹⁴“Yila umusaani uyo usaalile kumusaango ukwo ibulafu w'ekaambi. Khayo abo boosi babaamuwuliile nga aloma bibiindu ibyo, bamurekho kamakhono kaabwe khu murwe kweewe, nio lwanyuma lituuli lye babaandu lyoosi limukhupe kamabaale. “Ari kamakaambila kano, niko keesi uli ni khuuwa ba Isiraeli, nga ubalomela uri,

¹⁵‘Umuundu yeesi ukhomyaasa Wele, umweene kumusaango kuba kwaamufuurire.

¹⁶Uyo yeesi ukhomyaasa lisina ly'Omukasya, ali ni khukhwiiribwa. Oba ali umu Isiraeli, namwe nga ali umwiitswa, ne nga waakhomyaasile Umukasya, lituuli lye babaandu lyoosi lili ni khuumwiira.’

¹⁷“Uyo yeesi uwiira uwashe, naye bali ni khuumwiira.

¹⁸Uyo uwiira shishaayo sh'owashe, ali ni khuumuliyila shishiindi. Nga ni erire shishibeele shiilamu, ali ni khukhwiisawo isho shishiili shiilamu.

¹⁹Uyo yeesi uwoolisa khu washeewe butsiina, naye bali ni khuumukholakho sheesi akholile khu washeewe uyo.

²⁰Nga waamufunile likuumba, naye bali ni khuumufuna likuumba, nga waamukhupile imoni, naye bamukhupa imoni, nga waamukhupile liliino, naye bamukhupa liliino. Naye bali ni khumwoolisakho butsiina nga bweesi olisile khu washeewe.

²¹Uyo uwiira shishaayo shabeene, ali ni khuuliyila umweene uwasho, uyo uwiira umuundu, naye bali ni khuumwiira.

²²Likaambila lyeene nilyo liliili ni khuuraambisibwa khu ba Isiraeli, ni khuubo babaali babeetswa, khulwekhuuba ise ndi Umukasya Wele weenywe.”

²³Nashiryo lwanyuma lwayo, Musa waatsya waaboolela ba Isiraeli byeesi Umukasya alomile. Kila bawaamba umusaani tsana uyo, baamuyila ibulafu w'ekaambi, baamukhupa kamabaale, baamwiira. Ba Isiraeli baakhola nga Umukasya n'alakila Musa.