Read lumasaaba Ba Levi 27 Bible Online

Ba Levi 27 - lumasaaba bible

Ba Levi 27

¹Umukasya waalomela Musa ari,

²Boolela ba Isiraeli kamakaambila kano. Nga umuundu wawaanibwileyo isi Umukasya mu khwoolelesa shishitsubo sheesi mutweela aamala khaale khuukhola, banyala bawaanayo bibiindu bino, baamusikula:

³Khuuloondekhana ni shipimo shishifukiilisibwa: Umusaani umukhulu, uwoolisa kimiiko kamakhumi kabili khukhwoolesa khu makhumi kasesaba, bawaanayo tsifeetsa kamakhumi karaano, umusoleeli ushiili umuhele, khukhwaama khu miiiko kiraano khukhwoolesa kamakhumi kabili, bawaanayo tsifeetsa kamakhumi kabili, umukhasi umukhulu, bawaanayo tsifeetsa kamakhumi kataru, umukhaana ushiili umuhele, kimiiko kiraano khukhwoola khu makhumi kabili, bawaanayo tsifeetsa kamakhumi kabili, umukhaana ushiili, bawaanayo tsifeetsa liikhumi, umwaana umusiinde uuli aasi e kimiiko kiraano, bawaanayo tsifeetsa tsiraano, umwaana umukhaana ushiili, bawaanayo tsifeetsa tsitaru, umusaani utuumisa kimiiko kamakhumi kasesaba, bawaanayo tsifeetsa likhumi na tsiraano, umukhasi uli angaaki e kimiiko kamakhumi kasesaba, bawaanayo tsifeetsa liikhumi.

⁸N'iiba bari uyo uwamala khaale khuukhola shishitsubo nga ali umutaambi naabi, nga s'aanyala khuusikula umuundu weewe khuuloondekhana ni shiipimo shishifukiilisibwa ta, ali ni khuureera umuundu uyo isi umusaayi. Umusaayi ali ni khuukhalawo shiipimo shikeekhekho, sheesi umuundu uyo anyala waasasula khuusikula umuundu weewe.

⁹N'iiba bari shishitsubo isho shiwaamba khu shaayo shishifukiilisibwa khuuba isaayilo isi Umukasya, shiba indi buli shiwaanwa sheesi balomela Umukasya shili shikhosefu.

¹⁰Nashiryo umuundu uwakhola shishitsubo, s'anyala waashuusamo shishaayo shishiindi ta. N'akhola isho, iba indi bibyaayo byoombi bili ni khuuweebwa Umukasya.

¹¹Ne n'iiba bari shishitsubo isho waashikholela khu shaayo shishikhanyala shaawaanibwayo isi Umukasya nga isaayilo ta, aba umuundu uyo ali ni khuuyila shishaayo isho isi umusaayi.

¹²Umusaayi ali ni khuukhalawo ari shishaayo isho shili shilayi namwe shili shiibi, akhalewo ni shiipimo shasho. Sheesi aba waakhalilewo, nisho sheesi bali ni khuutsiilakho.

¹³Ne umuundu uyo n'aba bari akana khuushisikula, ali ni khuuwayo buukusi bwasho bubweene, alooselekho ni bisiintsa kamakhumi kabili khu buli shitoondo.

¹⁴Nga umuundu waawaanayo intsu yeewe isi Umukasya ari ibe ikhosefu, umusaayi ali ni khuukhalawo buukusi bwayo khuuloondekhana oba ili imbi namwe indaayi. Sheesi umusaayi akhalawo, nisho sheesi bali ni khuutsiilakho.

¹⁵Ne umuundu uyo n'aaba bari akana khuukisikula, ali ni khuuwayo buukusi bwayo bubweene, alooselekho ni bisiintsa kamakhumi kabili khu buli shitoondo.

¹⁶Umuundu nga waakhalilekho shisiintsa she liloba lyeewe waashiwaanayo isi Umukasya, buukusi bwalyo bali ni khuubukhala khuuloondekhana ni buukali bwe bumiitso bubunyala bwaaweelamo mu khumiitsa. Bali ni khuushiyila bari buli tsikilo kamakhumi kabili tsya seyiri, tsikula tsifeetsa liikhumi.

¹⁷N'iiba bari umuundu waaweeleyo liloba lyeewe isi Umukasya, khaangukho nga nio kumwiiko kwe khuusikula bibiindu kwaaweele, nga alisikula ali ni khuuwaanayo buukusi bwalyo bwoosi.

¹⁸N'iiba bari waaliwaanileyo lwanyuma lwayo, umusaayi ali ni khuubalilila buukusi bwalyo, khuuloondekhana ni kimiiko kikiramire khukhwoola khu mwiiko kwe khuusikula bibiindu, akhalewo buukusi bwe aasikho.

¹⁹N'iiba bari uyo uwawaanayo liloba ilyo akana khuulisikula, ali ni khuusasula buukusi bwalyo, ni khuulooselakho shisiintsa she kamakhumi kabili khu shitoondo.

²⁰Ne n'iiba bari s'akana khuusikula liloba ilyo ta, namwe nga waalikulisa khaale khu muundu ukuundi, shimanyisa ndi s'anyala waalisikula ta.

²¹Nga kumwiiko kwe khuusikula bibiindu kwoolile, liloba ilyo liba likhosefu, nga lili ly'Omukasya. Nashiryo lili ni khuuba ly'omusaayi.

²²N'iiba bari umuundu waakulile busa liiloba ne waaliwaanayo isi Umukasya, nga abe liiloba ilyo selili lyeesi baamuwa nga lye shikuuka ta,

²³umusaayi ali ni khuubalilila buukusi bwalyo khuuloondekhana ni kimiiko kikiramire khukhwoola khu mwiiko kwe khuusikula bibiindu. Umuundu ali ni khuulisasulila shifukhu sheene isho. Byeesi asasuule, biba by'Omukasya.

²⁴Nga kumwiiko kwe khuusikula bibiindu kwoolile, liiloba ilyo bali ni khuulikoboselayo uyo uwalikulisa, isi abe baaliwa nga lye shikuuka, namwe ta baliwe be lisaaye lyeewe.

²⁵Buli bipimo byoosi, bili ni khuuloondekhana ni bipimo bibifukiilisibwa.

²⁶Ne shonyene indi, shiikiboole she shishaayo, shili ni khuuba sh'Omukasya, nashiryo mbaawo unyala waashiwaanayo luundi isi Umukasya nga shiwaanwa ta. Oba ili imoosi, namwe lisheese lilyaana, bili by'Omukasya.

²⁷Ne nga inyana iye shishaayo shishikhafukiilisibwa isi Umukasya ta, umweene uwasho ali ni khuushisikula nga asasula kamapeesa kakaafukiilisibwa, naluundi alooselekho shishoolana ni she kamakhumi kabili khu buli shitoondo shitweela. Namwe banyala baashikulisa umuundu ukuundi khu buukusi bubufuukiilisibwa.

²⁸Mbaawo umuundu uuli ni khuukulisa namwe waasikula isho sheesi umweene eweeleyo busa, waashakaanisa isi Umukasya ta. Sheesi aweeleyo shoosi, oba ali umuundu, namwe shishaayo, namwe liloba lye shikuuka, mbaawo khuubikulisa namwe waabisikula ta. Isho shiba shishiindu shishiili shikhosefu isi Umukasya.

²⁹Ikhaba umuundu uwaweebwayo busa mu khwikanisa isi Umukasya, mbaawo khuumusikula ta, bali ni khukhwiiribwa.

³⁰Khukhwaama khu bilimwa byeenywe, oba bili bye biilyo bibulungule, namwe bibyaamo busa, ibyo bili by'Omukasya.

³¹N'iiba bari iliwo uli khuukana khu bisikula, ali ni khuusasula buukusi bubufuukiilisibwa, naluundi alooselekho bisiintsa kamakhumi kabili khu buli shitoondo.

³²Mu byaayo byeenywe, khu buli bibyaayo likhumi, shishaayo shitweela shili sh'Omukasya. Nga babala bibyaayo, buli shishikhola likhumi, shili shikhosefu, shiba sh'Omukasya.

³³Mbaawo khuuromboosamo oba shishaayo isho shili shilayi namwe ta, naluundi mbaawo khuushusaŋanamo ta. N'aaba waashusaŋanilemo, bibyaayo ibyo byoombi bili ni khuuba by'Omukasya, naluundi s'anyala waabisikula ta.

³⁴Kano niko kamakaambila keesi Umukasya aawa Musa nga ali khu lukiingi Sinaayi, ari awe ba Isiraeli.