Read lumasaaba Ba Levi 4 Bible Online

Ba Levi 4 - lumasaaba bible

Ba Levi 4

¹Umukasya waalomela Musa ari,

²“Boolela lituuli lye ba Isiraeli uri: Umuundu n'alekha khutsiila khu byeesi Umukasya akhuboolela ta, ne waakhola shishoonako nga siwatsiililiile ta, ali ni khuuloomba shishiyakhilo.”

³Nga umusaayi uwabiitibwa ikhabi niye ukholile shishoonako, aba waareerire kumusaango khu baandu boosi. Nashiryo khulwe shishoonako isho sheesi akholele, ali ni khuuwaanayo iwuunwa inyana, nga s'ilikho buuleme bwoosi ta.

⁴Umusaayi uyo ali ni khuureera iwuunwa iyo imulyaango kwe lisari lyeesi Umukasya abonekhelamo, atiile kumukhono kweewe khu wuunwa iyo, lwanyuma akiirire mu moni tsy'Omukasya.

⁵Umusaayi tsana ali ni khuubukulakho kamalasile ke khaafu iyo, akareere mu lisari mukari,

⁶asiikhemo lulwaala lwe kumukhono kumulayi, lulukobolela khu lukhuumwa, asalaasekho kamalala kimiluundi musaafu mu moni tsy'Omukasya, ibweeni we ngubo ikhiisa shiifwo shikhosefu.

⁷Lwanyuma awakhe kamalasile khu ntsika tsyoosi tsine tsye khu sheeso she khukhwookhelakho bubaani, shishiili mu lisari lyeesi Umukasya abonekhelamo. Shino ali ni khuushikholela mu moni tsy'Omukasya. Kamalasile kakaaramire k'ewuunwa tsana, ali ni khuukatsukha mwisina mwe shisheeso she tsisaayilo tsintsoshe, shishiili amulyaango kwe lisari lyeesi Umukasya abonekhelamo.

⁸Ali ni khuurusakho kiminaawa kikibotoosheleele kamala, ni neekyo kikiili khu mala,

⁹atubaasekho ni tsimbiko tsyoombi, ni kiminaawa kikiilikho, ni inyama isi kane akhale khu shini atubaase khu mbiko.

¹⁰Ali ni khuukhola nga ni bakhola khu nyama tsy'esaayilo iwuunwa ireera lukoosi akari aase ni nabo. Umusaayi ayile bino byoosi, abyookhele khu sheeso she tsisaayilo tsintsoshe.

¹¹Ne lihaafu, ni tsinyama tsitsiramire, ni kumurwe, ni bileenge, ni kamasisye,

¹²ali ni khuubisuta abiyile ibulafu w'ekaambi, mu shifwo shiimiliwu, isi batsukha likoshe. Akyookhele yoosi khu mulilo, ilale iwewo.

¹³Ne linaambo lye ba Isiraeli lyoosi ni likhola shishoonako mu moni tsy'Omukasya, ne nga sibaashitsiililiile ta, linaambo lyoosi liba lili ni kumusaango.

¹⁴Khukhwaama ni bashifuumbula bari boonakile, lituuli lyoosi lili ni khuuloomba shishiyakhilo nga liwaanayo iwuunwa inyana. Bali ni khuukireera imulyaango kwe lisari lyeesi Umukasya abonekhelamo,

¹⁵baraangirisi be bikuuka bakirekho kamakhono kaabwe khu murwe kwayo, nio bakiirire mu moni tsy'Omukasya.

¹⁶Lwanyuma umusaayi abukulekho kamalasile k'ewuunwa iyo, akareere mu lisari mukari,

¹⁷asiikhemo lulwaala lwe kumukhono kumulayi, lulukobolela khu lukhuumwa, asalaasekho kamalala kimiluundi musaafu mu moni tsy'Omukasya, ibweeni we ngubo ikhiisa shiifwo shikhosefu.

¹⁸Lwanyuma awakhe kamalasile khu ntsika tsyoosi tsine tsye khu sheeso she khukhwookhelakho bubaani, shishiili mu lisari lyeesi Umukasya abonekhelamo. Shino ali ni khuushikholela mu moni tsy'Omukasya. Kamalasile kakaaramire k'ewuunwa tsana, ali ni khuukatsukha mwisina mwe shisheeso she tsisaayilo tsintsoshe, shishiili amulyaango kwe lisari lyeesi Umukasya abonekhelamo.

¹⁹Ali ni khuurusakho kiminaawa kyoosi, akyookhele khu sheeso.

²⁰Nashiryo, tsinyama itsyo ali ni khuutsikhola shitweela busa nga tsy'ewuunwa iye khuureerawo lukoosi. Mu saambo iyo, umusaayi kane ekoontselele khulwaabwe, Umukasya abeyakhile shishoonako isho.

²¹Lwanyuma ali ni khuusuta inyama iramire, akiyile ibulafu w'ekaambi, akyooshe nga ni okhile inyoowa. Yino ili isaayilo iye khukhwiyakhila lituuli bibyoonako byalyo.

²²Nga umuraangirisi woonakile mu moni tsy'Omukasya, ne abe nga sashitsililiile ta, aba waasaalile kumusaango.

²³Khukhwaama naashifumbula ari woonakile, ali ni khuuwaanayo shiwaanwa sh'embusi indurume, ikhalikho buuleme bwoosi ta.

²⁴Ali ni khuukirakho kumukhono kweewe khu murwe, bakiirire mu moni tsy'Omukasya, mu shifwo sheesi beeriramo tsisaayilo tsye khukhwoosha. Iyino ili isaayilo irusawo bibyoonako.

²⁵Lwanyuma umusaayi abukulekho khu malasile ke isaayilo iye khurusawo bibyoonako iyo, nga araambisa lulwaala lweewe, awakhe khu ntsika tsye shisheeso she tsisaayilo tsintsoshe. Kamalasile kakaaramire ali ni khuukatsukha mwisina mwe shisheeso isho.

²⁶Kiminaawa kyayo kili ni khukhwookhebwela khu sheeso, musaambo niyo indweela nga isaayilo ireerawo lukoosi. Nashiryo musaambo iyo, umusaayi uyo kane abe wekoontseleele Umukasya khukhwiyakhila umuraangirisi uyo byeesi onakile.

²⁷Nga abe umuundu uwa busheele woonakile mu moni tsy'Omukasya, ne nga abe sashitsililiile ta, aba waasaalile kumusaango.

²⁸Khukhwaama nga waashifumbuule ari woonakile, ali ni khuureera isaayilo iy'embusi ikhasi, nga s'ilikho buuleme bwoosi ta, khulwe shishoonako isho.

²⁹Ali ni khuura kumukhono kweewe khu murwe kwe isaayilo iye shishoonako iyo, bakiirire mu shifwo mweesi bawaanilayo tsisaayilo tsintsoshe.

³⁰Lwanyuma umusaayi abukulekho khu malasile ke isaayilo iye khuurusawo bibyoonako iyo, nga araambisa lulwaala lweewe, awakhe khu ntsika tsye shisheeso she tsisaayilo tsintsoshe. Kamalasile kakaaramire ali ni khuukatsukha mwisina mwe shisheeso isho.

³¹Umusaayi ali ni khuurusakho kiminaawa, musaambo isi bakhola kh'usaayilo ireera lukoosi. Lwanyuma umusaayi akyookhele khu sheeso, nio bishe bituukhe isilikakha iwunyila Umukasya buulayi. Mu saambo iyo, umusaayi kane abe waalombeele umuundu uyo shishiyakhilo, ni nase kane imbe naamwiyakhiile.

³²Umuundu uyo n'aba bari mu shifwo sh'embusi waareerire lisheese lilyaana nga isaayilo iyinyusawo bibyoonako, ali ni khuureera likhasi, nga shililikho buuleme bwoosi ta.

³³Ali ni khuura kumukhono kweewe khu murwe kwe isaayilo iye shishoonako iyo, bakiirire mu shifwo mweesi bawaanilayo tsisaayilo tsintsoshe.

³⁴Lwanyuma umusaayi abukulekho khu malasile ke saayilo iye khuurusawo bibyoonako iyo, nga araambisa lulwaala lweewe, awakhe khu ntsika tsye shisheeso she tsisaayilo tsintsoshe. Kamalasile kakaaramire ali ni khuukatsukha mwisina mwe shisheeso isho.

³⁵Umusaayi ali ni khuurusakho kiminaawa, musaambo isi bakhola khu saayilo ireera lukoosi. Lwanyuma umusaayi akyookhele khu sheeso, nio bishe bituukhe isilikakha iwunyila Umukasya buulayi. Mu saambo iyo, umusaayi kane abe waalombeele umuundu uyo shishiyakhilo, ni nase kane imbe naamwiyakhiile.