Read lumasaaba Ba Levi 5 Bible Online

Ba Levi 5 - lumasaaba bible

Ba Levi 5

¹Umuundu n'aba nga waaboone shishiindu shikholikha, namwe nga waawuliile busa, ne waaloba khuwayo bujulisi nga balikho bawotsesa kumusaango ukwo, aba woonakile.

²Namwe umuundu nawaamba khu shiindu she mbikho shoosi, oba shishaayo shishifwiile shonyene busa, namwe bisolo byoosi bibikyeendela khwiloba, ne abe yakhaba nga waakhushimanyakho ta, aba waasaalile kumusaango.

³Uyo yeesi uwaamba khu bunyaalu buburura mu mubili kw'omuundu, aba waasaalile kumusaango.

⁴Umuundu naayubakilisa khukhwitsuba khuukhola shiindu shoosi shiilayi, namwe shiibi, abe yakhaba nga waakhushimanyakho ta, ne waakelawo waashifuumbula, aba waasaalile kumusaango.

⁵Umuundu nga waasaalile kumusaango kwoosi mu biindu ibyo, ali ni khukhwibiiyisa bibyoonako byeesi akholele.

⁶Ali ni khuureera isaayilo ireera shishiyakhilo isi Umukasya, khulwe shishoonako sheesi akholele. Ili ni khuuba lisheese likhasi, namwe imbusi ikhasi. Umusaayi ali ni khuuwaanayo isaayilo iyo, nio musaambo iyo, abe wekoontseleele Umukasya khukhwiyakhila umuundu uyo byeesi onakile.

⁷Ne umuundu uyo n'aaba nga ali umutaambi, nga s'anyalisa khuureera lisheese ta, ali ni khuureera isi Umukasya kamawuusi kabili, namwe tsiniinga tsibili, khulwe bibyoonako byeesi akholele. Isaayilo indweela iba iye khukhwiyakhila bibyoonako, ne ikiindi iye shiwaanwa shishooshe.

⁸Ali ni khuuwa umusaayi binywiinywi ibyo byoombi, ari anyoowe awaaneyo isaayilo iye khukhwiyakhila bibyoonako. Ali ni khuukhaborora likosi, ne s'arusakho kumurwe ta.

⁹Ali ni khuusalaasakho kamafuki kamalala khu sheeso sha buroonzi, ne kakaaramire ali ni khuukalekha karonyake mwisina mwe shisheeso. Iyo ili isaayilo iye khukhwiyakhila bibyoonako.

¹⁰Nio lwanyuma awaaneyo khakhaakhola khabili, nga isaayilo intsoshe, khuuloondekhana ni likaambila nga ni liloma. Umusaayi ali ni khuuwaanayo isaayilo iyo, nio musaambo iyo, abe wekoontseleele Umukasya khukhwiyakhila umuundu uyo byeesi onakile.

¹¹Ne noola s'anyala waareera kamawuusi kabili namwe tsiniinga tsibili ta, ali ni khuureera buufu buunose naabi bubwoola ikilo ndweela, areere nga isaayilo khulwe khukhwiyakhila bibyoonako. Nashiryo sibuli ni khuutubaasibwamwo kamafura ke tsinyanyi, namwe bubaane bubuwunya buulayi ta.

¹²Ali ni khuubireera isi umusaayi, aryo abukulekho shikalabo shitweela abyookhele byoosi atweela khu sheeso, ni tsisaayilo tsitsiindi. Shino shili she khuushebulilakho shili buufu bwoosi, buli bw'Omukasya.

¹³Umusaayi ali ni khuuwaanayo isaayilo iyo, nio musaambo iyo, abe wekoontseleele Umukasya khukhwiyakhila umuundu uyo byeesi onakile. Buufu buburamire buba bw'omusaayi, nga shiwaanwa sheesi afuna khukhwaama mu bye likesa.

¹⁴Umukasya waalomela Musa ari,

¹⁵Niiba bari shishoonako sh'omuundu shili shiri waafuniaakile sheesi aasuubisa khuuwaanayo shishiindu shikhosefu isi Umukasya, ali ni khuureera isi Umukasya limiiku lilikhalikho buuleme bwoosi ta, nga libalibwamo kamapeesa kakaamala, khuuloondekhana ni shipimo she mu Lisaayilo. Isaayilo iyo ili iye khuurusawo bibyoonako.

¹⁶Ali ni khuuliyila umusaayi ibyo byeesi abe aakhasikhana khuuwaanayo, naluundi alooselekho kumutaango kukwoola shisiintsa shitweela she kharaano. Umusaayi ali ni khuuraambisa limiiku ilyo, khukhwikoontselela, nio akile Umukasya eyakhile umuundu uyo bibyoonako byeewe.

¹⁷Umuundu yeesi n'oneka mu moni tsy'Omukasya, ikhaba nga siwashitsililiile ta, ne aba woonakile, naluundi aba ali ni kumusaango.

¹⁸Ali ni khuubukula limiiku khukhwaama mu masheese keewe lilikhalikho buuleme bwoosi ta, nga lilekhaana ni n'ebyo bibiwaanibwayo nga tsisaayilo tsitsirusawo bibyoonako, aliyile isi umusaayi. Umusaayi ali ni khukhwikoontselela, nio akile Umukasya eyakhile umuundu uyo bibyoonako byeewe.

¹⁹Ili isaayilo iwaanibwayo khulwekhuuba umuundu woonakile, aba waasaalile kumusaango mu moni tsy'Omukasya.