Read lumasaaba Ba Levi 6 Bible Online

Ba Levi 6 - lumasaaba bible

Ba Levi 6

¹Umukasya waalomela Musa ari,

²Umuundu anyala woonaka khuubirira mu khufuniaaka kamakaambila, namwe nga waalyakhaane uwashe, namwe waanuulile, namwe nga waamiinikhilisile uwashe.

³Namwe lukanile nga wangaale shishiindu sha beene ne waashibisa, namwe wetsuba busa mu biikhalimo ta.

⁴Nga bibiindu bino byaakholikhile biryo, uyo ushikholele ali ni khuuliha byeesi aalyakhana, namwe byeesi aafunila mu khumiinikhilisa, namwe sheesi baamubiikhisa, namwe shishiindu sheesi angaale.

⁵Ikhaba nga wetsubile busa bibikhalimo ta, umuundu ali ni khuuliha. Mu byoonako ibyo byoosi, ali ni khuuliha nga esayo shishiindu sh'omweene, naluundi nga alooselakho khasiintsa khatweela khe kharaano.

⁶Ali ni khuulooselakho nga ayila isi umusaayi limiiku lilikhalikho buuleme bwoosi ta, khuuwaanibwayo isi Umukasya. Umusaayi niye uuli ni khuukhalawo limiiku nga ni lyoola.

⁷Lwanyuma umusaayi ali khukhwikoontselela Umukasya, eyakhile umuundu uyo bibyoonako byeewe. Ni nashiryo, kane Umukasya amurusekho bibyoonako ibyo byoosi.

⁸Umukasya waalomela Musa ari,

⁹“Boolela Aroni ni babaana beewe kamakaambila kakawaambakana ni tsisaayilo tsye khukhwoosha: Bali ni khuura shishaayo mu shifwo mweesi bashookhelamo, khu sheeso shikonekho, khukhwoolesa kumutikhinyi. Kumulilo kwe khu sheeso kuli ni khukhwaburukha shiilo shoosi.

¹⁰Kumutikhinyi nga bwasheele, umusaayi ali ni khuukwaara bikwaaro bye busaayi, atweela ni bikwaaro bye mukari, abukule likoshe lilyaamile mu khwookhebwa khwe isaayilo, alire andulo e shisheeso.

¹¹Lwanyuma ali ni khuurusamo bikwaaro ibyo, akwaare bibiindi, asute likoshe aliruse ibulafu w'ekaambi, alire mu shifwo shimiliwu.

¹²“Kumulilo kwe khu sheeso sikuli ni khuusima ta, nashiryo bali ni khuurakho tsiikhu buli kumutikhinyi. Lwanyuma, antsekho tsisaayilo buulayi, atweela ni kiminaawa kyatsyo, abyookhele atweela.

¹³Kumulilo kwe khu sheeso kuli ni khuurama nga busheele kwaaburukha, kukhasimakho ta.”

¹⁴Umukasya waaloma ari, kano kamakaambila kakawaamba khu saayilo tsye khuukhusiima ise, nga umusaayi khukhwaama mu lulyo lwa Aroni n'ali ni khuubireera khu sheeso, mu moni tsy'Omukasya.

¹⁵Umuundu ali ni khuutahakho shikalabo shitweela she buufu buunose buulayi, nga bulimo ni kamafura ke tsinyanyi, nga waareererekho ni bubaani. Khukhwookesanisa ari isaayilo iyo yoosi ili iyase Umukasya, ali ni khuukira khu sheeso, akyooshe nio lisuusi liliniina nga isilikakha, liitse isi ise.

¹⁶Bibiiramire, Aroni ni babaana beewe bali ni khuukholamo kimikaati kikikhalimo kamamela ta, bakiliile khu lwaanyi lwe lisari likhosefu.

¹⁷Mbaawo khuuramo kamamela nga bateekha ta. Ise naweeleyo shisiintsa isho isi basaayi, khukhwaama khu byaakaanisibwileyo isi ise khu sheeso. Kumukaati kuno kuli kumukhosefu naabi, kuli busa nga tsisaayilo tsyeesi bawaanayo nga baakholile bibyoonako.

¹⁸Khu baandu be muungo mwa Aroni, b'eseetsa bonyene, nibo babaali ni khuulya khu mikaati ikyo. Bali ni khuunyoowa bakhole byeesi kamakaambila kalakila, nio bawaambekho. Khulwekhuuba, buli uwaamba khu mikaati ikyo, ekyela umukhosefu. Likaambila lino lilyaama isi Umukasya, liliwaamba khu saayilo, lili ni khuuramawo liryo biilo ni biilo.

¹⁹Umukasya waalomela Musa ari,

²⁰“Khu shifukhu sheesi Aroni ni babaana beewe babiitibwila tsiikhabi, bali ni khuuwaanayo isi Umukasya bibiindu bino: Buli busheele, kumutishinyi ni angoloobe, ikilo indweela iye buufu buunose naabi.

²¹Bali ni khuutubaasamo kamafura ke kusaala ku olivu, bakuteekhele khu sefuluya imaambali busa. Lwanyuma bakumenyulakemo busiintsa bufwiiti, babwooshe, bwituukhe lisuusi lilimbunyila ise isilikakha indayi.

²²Buli musaayi khukhwaama mu lisaaye lya Aroni ubiitibwa tsikhabi, ali ni khuukhola bibiindu bino nga ni bikanibwa. Ali ni khuubona ari kumukaati ukwo kusha kuweelewo ilala. Shino bali ni khuushikhola biilo ni biilo.

²³Buli isaayilo iye khuusiima Umukasya khukhwaama isi umusaayi, ili ni khukhwookhebwa iweelewo ilala, mbaawo khuukilyakho ta.”

²⁴Umukasya waalomela Musa ari,

²⁵“Boolela Aroni ni babaana beewe likaambila liliwaamba khu shiwaanwa shishirusawo bibyoonako. Isaayilo iye khuurusawo bibyoonako, ili ni khukhwiiribwira mu shifwo nisho shitweela nga isaayilo intsoshe, khulwekhuuba isaayilo yino ili ikhosefu naabi.

²⁶Umusaayi uwaanayo isaayilo iyo, ali ni khuukiliila mu shifwo shikhosefu, nga nimwo mu lwaanyi lwe lisari likhosefu.

²⁷Buli uyo yeesi namwe isho shoosi shishitiilakho khu saayilo iyo, kane shikele shikhosefu. Namwe nga kamalasile khukhwaama khu saayilo iyo kaakwiilekho khu ngubo iy'omusaayi, bali ni khuukisiingila mu shifwo shikhosefu.

²⁸Nga inyama iye isaayilo iyo baakiteekheele mu saatsi, bali ni khuukikhupaka. Ne noola bakiteekheele mu shiteekha sha buroonzi, bali ni khuukiseenela ilala, lwanyuma bakisiinge ni kameetsi.

²⁹Isaayilo yino ili ikhosefu naabi, nashiryo basaayi bonyene nibo babaali ni khuukilyakho.

³⁰Mbaawo khuulya inyama khukhwaama khu saayilo tsyeesi kamalasile kayilibwile mu lisari likhosefu ta. Tsisaayilo itsyo tsili ni khukhwookhebwa ni kumulilo tsiweelewo ilala.”