Read lumasaaba Ba Levi 7 Bible Online

Ba Levi 7 - lumasaaba bible

Ba Levi 7

¹Umukasya waalomela Musa ari, “Isaayilo iwaanibwayo nga umuundu waasaalile kumusaango, ili ikhosefu naabi.

²Isaayilo yino bali ni khuukikhoonyela mu shifwo nisho shitweela mweesi bakhoonyela tsisaayilo tsintsoshe. Kamalasile ke shishaayo isho, bali ni khuukasalaasaka khu sheeso sha buroonzi.

³Kiminaawa kye shishaayo isho kyoosi, ikhaba kye khu mushiinga, ni nakyo kikiili khu byeenda, kili ni khuuwaanibwayo.

⁴Bali ni khuuwaanayo tsimbiko tsyoombi ni kamafura kakaatsilikho, ni sheesi bakhala kh'umbiko.

⁵Khukhwaama yino n'ili isaayilo iy'omuundu usaalile kumusaango, umusaayi ali ni khuukira khu sheeso, akyooshe, lisuusi ly'esilikakha indayi liniine isi ise ndi.

⁶Isaayilo yino ili ikhosefu naabi. Basaayi bonyene nibo babaali ni khuukilyakho, nga bakiliila mu lwaanyi lwe lisari likhosefu.

⁷“Isaambo iye khuuwaanayo isaayilo iye babasaalile kimisaango, ili shitweela busa ni iye khuurusawo bibyoonako. Umusaayi uwakaanisileyo isaayilo yino, ali niye yenyene uuli ni khuulya kh'unyama iyo.

⁸Umusaayi yeesi uwaanayo isaayilo intsoshe khu lw'omuundu ukireerire, ali ni khuuyila lihaafu lye shishaayo sheesi akaanisileyo.

⁹Ikhaba isaayilo iye biilimwa isi bateekheele mu shibya, namwe mu sefuluya, namwe khu sefuluya imaambali busa, iba iy'omusaayi ukiwaanileyo.

¹⁰Ne isaayilo yoosi khukhwaama mu biilyo bibulungule busa, oba baatubaasilemo kamafura ke kuusaala ku olivu namwe ta, iyo bali ni khuukikabananisamo mu baana ba Aroni, nga buli mutweela ayila shisiintsa shishilekhaana ni sho'washe.”

¹¹Umukasya weloosela waalomela Musa ari, “Bino nibyo biilakilo bibiwaamba khu saayilo tsyeesi muwaanayo isi Umukasya, tsitsireera lukoosi.

¹²Nga umuundu awaanayo isaayilo iye khuusiima, ali ni khuureererakho kimikaati kye tsisaambo tsitaru, kikikhalimo kamamela ta. Kimikaati kye tsisaambo tsibili, bali ni khuutubaasamo kamafura ke kuusaala ku olivu, ne kumukaati mutweela kumubaambali busa, bali ni khuuwakhakho busa kamafura ako.

¹³Nga umuundu areera isaayilo ireera lukoosi, nga ili iye khuusiima, ali ni khuureera isaayilo yeewe nga khulikho ni bukaati bufwiiti bubuulimo kamamela.

¹⁴Ali ni khuureera shiwaanwa nga abukula kumukati mutweela khukhwaama khu buli saambo tsine itsyo tsye kimikaati. Umusaayi uwaanya kamalasile ke isaayilo ireera lukoosi khu sheeso sha buroonzi, niye uuli ni khuuyila biwaanwa ibyo.

¹⁵Inyama iye isaayilo ireera lukoosi, bali ni khuukilya khu shifukhu khweesi bakholeele isaayilo. Mbaawo khuulekha inyama yaakonawo khukhwoolesa shifukhu shishiilakho ta.

¹⁶Ne n'iiba bari umuundu alikho awaanayo isaayilo khulwekhuuba waakhola shisuubiso, namwe wekanisile busa, inyama iyo bali ni khuukilya khu shifukhu sheene isho. Ne iramirekho, bakilye khu shifukhu shishilooselakho.

¹⁷Ne inyama iye saayilo iramakho yoolisa khu shifukhu shishikhola khataru, bali ni khuukyoosha busa ni kumulilo, ilale iwewo.

¹⁸Nga baaliile inyama iye isaayilo ireera lukoosi khu shifukhu shishikhola khataru, Wele singane akaanile umuundu uwaanileyo isaayilo iyo ta. Kane ifwaane busa nga ukhareerire isaayilo yoosi ta. Shino shikhaabe she kumusilo, naluundi ukiliilekho, akhaabe waasaalile kumusaango.

¹⁹“Mukhalya inyama yoosi iyitiilile khu shiindu shishiili shinyaalu ta, akhali muli ni khuukyoosha ni kumulilo iwewo yoosi. Abo babaali baapyeluuse bonyene, nibo babaanyala khuulya inyama iyo.

²⁰Umuundu yeesi nga siwepyeelusile ta, ne waalya khu saayilo y'Omukasya ireera lukoosi, umuundu uyo ali ni khuutuumibwa ibulafu we lituuli lye babaandu ba Wele.

²¹Umuundu uwaamba khu shiindu shinyaalu shoosi, oba bunyaalu bubwaama khu muundu, namwe khu shaayo, namwe she mbikho, ne waalya khu nyama iye isaayilo y'Omukasya, ireera lukoosi, umuundu uyo bali ni khuumutuuma ibulafu we lituuli lye babaandu ba Wele.”

²²Umukasya weloosela waaboolela Musa ari,

²³“Boolela ba Isiraeli uri, mukhalya kiminaawa kye bibyaayo bino ta: Tsikhaafu, kamasheese, ni tsiimbusi.

²⁴Kiminaawa kye shishaayo shishifwiile khu bwasho busa, namwe sheesi isolo yirire, kinyala kyaarambisibwa mu biindu bibiindi, ne mbaawo khuukilya ta.

²⁵Uyo yeesi ulya kiminaawa kye shishaayo shishinyala shaarambisibwa mu khuwaanayo isaayilo intsoshe isi Umukasya, bali ni khuumutuuma ibulafu we lituuli lye babaandu ba Wele.

²⁶Ni khuuminyisilawo ilala, mbaawo khuulya kamalasile ke khanywiinywi, namwe shishaayo shoosi she muungo ta.

²⁷Uyo yeesi ulya kamalasile, bali ni khuumutuuma ibulafu we lituuli lye babaandu ba Wele.”

²⁸Umukasya weloosela waalomela Musa ari,

²⁹“Boolela ba Isiraeli uri umuundu yeesi uwaanayo isi Umukasya isaayilo ireera lukoosi, ali ni khuureera isaayilo isi Umukasya. Nga umuundu areera isi Umukasya isaayilo ireera lukoosi,

³⁰umweene ali ni khuukireera isi Umukasya, akyooshe ni kumulilo. Ali ni khuureera kiminaawa, atweela n'inyama iye shiifuba, akiwaaneyo nga shiwaanwa sha buraawa isi Umukasya.

³¹Kiminaawa ikyo, umusaayi ali ni khuukyooshela khu sheeso, ne inyama iye shifuba, ili ni khuuweebwa Aroni ni basoleeli beewe.

³²Khukhwaama khu saayilo ireera lukoosi, bali ni khuubukulakho shinama sh'etakho she luwaande luulayi, bashiwe umusaayi.

³³Umusaayi uwaanayo kiminaawa ni kamalasile k'esaayilo ireera lukoosi, kumukabo kweewe kuli ni khuuba shiinama sh'etakho, she luwaande luulayi.

³⁴Iyo isi bawaanayo buraawa ni shinama isho, ise naabirusire khukhwaama mu ba Isiraeli, naabiweele Aroni umusaayi, ni basoleeli beewe, nga she khuuwaanayo she biilo ni biilo, khukhwaama mu ba Isiraeli.

³⁵Shisiintsa isho khukhwaama khu saayilo tsintsoshe tsitsiwaanibwayo isi Umukasya, shaaweebwa isi Aroni ni basoleeli beewe, khukhwaama khu shifukhu sheesi baaroborebwa khukhwakaanisa nga basaayi b'Omukasya.

³⁶Umukasya waalakila ba Isiraeli ari shisiintsa isho bashiwe Aroni ni lisaaye lyeewe. Shino shili ni khuuba shiryo biilo ni biilo, mu miboolo kyoosi.”

³⁷Bino nibyo biilakilo bibiwaamba khu saayilo tsintsoshe, tsye bilimwa bibulungule, tsitsinyusawo bibyoonako, tsye khukhwiwaanayo isi Umukasya, ni tsitsiireera lukoosi,

³⁸byeesi Umukasya aalakila Musa, nga ali khu lukiingi Sinaayi. Bino byakholikha khu shifukhu sheesi Musa aalakila ba Isiraeli khuureera biwaanwa byaabwe isi Umukasya, nga bali mu mubiimbi kwa Sinaayi.