Read lumasaaba Ba Levi 8 Bible Online

Ba Levi 8 - lumasaaba bible

Ba Levi 8

¹Umukasya waalomela Musa ari,

²“Yila Aroni atweela ni babaana beewe. Yililakho ni bikwaaro bye busaayi, kamafura ke khuubiita basaayi, iwuunwa iye isaayilo irusawo bibyoonako, kamamiiku kabili, ni shishiipo nga shilimo kimikaati kikikhalimo kamamela ta.

³Lwanyuma ubuuse lituuli lye ba Isiraeli lyoosi a mulyaango we liisari likhosefu.”

⁴Musa waakhola nga Umukasya n'amulomela, waabusaasa ba Isiraeli boosi, a mulyaango we liisari likhosefu.

⁵Nga babaandu boosi baamalile khuubuusana, Musa waabalomela ari, “Umukasya waalakiile ari khukhole shishiindu shino.”

⁶Musa waaloma Aroni ni basoleeli beewe besiinga, khuuloondekhana ni bye kimisilo abe nga ni biloma.

⁷Lwanyuma waakwaarisa Aroni shikwaaro she busaayi, waamubowakho ni kumusipi kwakhwo, waalooselakho ni shikwaaro shileeyi, ni she khu ngaaki, waabibowela atweela ni bukosi bubwabakho.

⁸Waamukwaarisa ni she khu shifuba, waashiramo Urimu ni Sumimu[1].

⁹Kila amubowa ingubo iye khu murwe. Ibweeni we ngubo iye khu murwe, abe baaruungilakho khakhuuma khaanyelele khe zaabu, khakhookesanisa khari ali umukhosefu. Musa waakhola nga Umukasya n'amulakila.

¹⁰Lwanyuma Musa waabukula kamafura ke khuubita, waabiita isaanduuku iye indakaano ni bibyabamo byoosi, waabiikesa bikhosefu.

¹¹Kila asalaasakho kamafura kamalala khu sheeso sha buroonzi kimiluundi musaafu, waasalaasa ni khu biindu bibiraambisibwilakho, atweela ni pwaakhuli imboofu iya buroonzi, ni mu shisina shayo.

¹²Kila atsukhakho kamafura kamalala khu murwe khwa Aroni, waamubiita khuuba umukhosefu, isi Umukasya.

¹³Lwanyuma Musa waareera basoleeli ba Aroni, waabakwaarisa bikwaaro bye khu ngaaki, waababowa ni kimisipi, waabarakho tsingofwiila khu mirwe, nga Umukasya abe ni aalakila Musa.

¹⁴Lwanyuma Musa waayila iwuunwa iye isaayilo irusawo bibyoonako. Aroni ni basoleeli beewe baakitiilakho kamakono kaabwe, khu murwe kwayo.

¹⁵Nga baamalile khuukikhoonya, Musa waabukulakho kamalasile, waasiikhamo lulwaala lweewe, waatsya waawakha khu ntsika tsiine abe tsitsiili khu sheeso sha buroonzi, lwanyuma waatsukha kakaaramire mwisina mwe shisheeso. Mu saambo iyo, wekesa shisheeso khuuba shikhosefu, nga bali ni khuushiraambisa khuuwaanayo tsisaayilo.

¹⁶Waabukula kiminaawa khukhwaama khu by'enda, ni luwaande lwe aasi lwe shiini, ni tsiimbiko tsyoombi, atweela ni kiminaawa kikiitsilikho, waabira khu mulilo, waabyoosha.

¹⁷Ne lihaafu, n'inyama yoosi, ni kamasisye, waabiyila waabyookhela ibulafu we kaambi, nga abe Umukasya n'alakila Musa.

¹⁸Lwanyuma Musa waareera limiiku lye isaayilo intsoshe. Aroni ni babaana beewe baalirakho kamakhono kaabwe, khu murwe kwalyo.

¹⁹Musa waalikhoonya, waawaanyaka kamalasile khu sheeso.

²⁰Nga baatanyakilemo inyama iyo, Musa waabukula kumurwe ni kiminaawa waabyookhela khu sheeso.

²¹Lwanyuma nga baamalile khuusiinga byeenda ni bileenge, Musa woosha inyama iramire yoosi, yaaba isaayilo intsoshe, isilikakha yayo yaaniina mu ngaaki, khukhwikhoyesa Umukasya. Shino shakholikha musaambo isi Umukasya aalakila Musa.

²²Musa weelakho waareera limiiku liliindi, nga lino lili lye khuuraambisibwa khuubiita basaayi tsiikhabi. Aroni ni basoleeli beewe baara kamakhono kaabwe khu murwe kwe limiiku ilyo.

²³Musa waalikhoonya, kila abukulakho kamalasile ni lulwaala lweewe, awakha khu luwaande lwe khu khuru khuuseetsa khukhuloleleele aasi, ni khu lwaala lukhuumwa lwe kumukhono kumulayi, ni khu lwaala lukhuumwa lwe shikele shiilayi.

²⁴Musa waareera basoleeli ba Aroni, nabo buli mutweela waamukholako shishiindu nisho shitweela. Lwanyuma waawaamba kamalasile waakasalaasa khu soonda tsine tsye shisheeso.

²⁵Waabukula kiminaawa kikiili khwisyeembe, ni kye khu byeenda, ni luwaande lwe aasi lwe shiini, ni tsiimbiko tsibili atweela ni kiminaawa kikiilikho, ni shinama sh'etakho, she luubeka luulayi.

²⁶Khukhwaama mu shiipo she kimikaati kikikhalimo kamamela ta, nga shili ibweeni w'Omukasya, waabukula kimikaati kitaru, nga abukula mutweela khukhwaama khu buli shikuuka, abe bibyakholebwa khukhwaama mu bufu buunose naabi, waabira khu minaawa, ni khu nyama tsana iye shiinama.

²⁷Bibiindu bino byoosi, Musa waabira mu makhono ka Aroni ni ke basoleeli beewe, baabyakaanisayo isi Umukasya, nga biwaanwa.

²⁸Nio lwanyuma Musa waabibukula khukhwaama mu makhono kaabwe, waabyookhela khu sheeso, atweela ni isaayilo intsoshe, nga isaayilo iye khuubita basaayi tsiikhabi. Isaayilo intsoshe yino, yaamamo isilikakha, yaaniina mu ngaaki nga iwunyila Umukasya buulayi.

²⁹Musa waabukula inyama iye shifuba, waakisuta angaaki waakiwuutsa, khukhwookesanisa ari yaawaanibwileyo isi Umukasya. Iyo yaba kumukabo kwa Musa khukhwaama khu nyama iye limiiku lye khuubita basaayi tsiikhabi. Isho shaba nga Umukasya n'alakila Musa ari akhole aryo.

³⁰Ikhumaliilisa, Musa waabukulakho khu mafura ke khuubita tsiikhabi, ni khu malasile abe kakaali khu sheeso, waakahanyaka khu Aroni ni bikwaaro byeewe. Waakhola nisho shitweela ni khu basoleeli beewe. Musaambo iyo, Musa waaba waaroboore Aroni ni basoleeli beewe, ni bikwaaro byaabwe, nga ababiitakho tsikhabi.

³¹Musa waalomela Aroni ni basoleeli beewe ari, “Ni mututubisile inyama iyo amulyaango we liisari likhosefu, lwanyuma mwikhale abweene awo mukilye, nga muliilakho kimikaati kikiili mu shiipo she biwaanwa bye khuubita basaayi tsikhabi. Umukasya waayindakila ise ari, ‘Aroni ni basoleeli beewe nibo babaali ni khuulya inyama iyo.’

³²Ne inyama iramakho, muli ni khuukyookhela mu mulilo, ilale iwewo.

³³Muli ni khuurama amulyaango we liisari likhosefu, khuumala biifukhu musaafu, khukhwoolesa nga bye kimisilo kye khuubiita basaayi tsiikhabi kyaaweele. Khulwekhuuba shikhaayile biifukhu musaafu, khuubabiita inywe tsiikhabi tsye busaayi.

³⁴Umukasya waamala khuukhulakila ifwe khuukhola byeesi khukholile lwe shaleelo, nio akile abarusekho inywe bibyoonako byeenywe.

³⁵Umukasya waanomeele ise ari, inywe muli ni khuurama amulyaango we liisari likhosefu, kumuusi ni shiilo, khuumala biifukhu musaafu, nga mukhola buuraambi bweesi Umukasya abaweele inywe. Ne busa ta, mwiitsa khufwa.”

³⁶Nashiryo Aroni ni basoleeli beewe baaloondelela ibyo byoosi, byeesi Umukasya aalakila Musa ari bakhole.