Read lumasaaba Ba Levi 9 Bible Online

Ba Levi 9 - lumasaaba bible

Ba Levi 9

¹Nga biifukhu musaafu ibyo byaaweele, uri khu shifukhu shishikhola shinaane, Musa walaanga Aroni, ni basoleeli beewe, ni baraangirisi be ba Isiraeli, beetsa atweela.

²Kila Musa alomela Aroni ari, “Bukula iwuunwa isoleeli, ni limiiku, nga byoombi sibilikho buuleme bwoosi ta. Waanayo iwuunwa iyo isi Umukasya, nga isaayilo irusawo bibyoonako, ne limiiku uliweyo, nga isaayilo intsoshe.

³Boolela ba Isiraeli uri bali ni khuuwaanayo tsisaayilo tsino: Bali ni khuuwaanayo imbusi indurume, nga isaayilo irusawo bibyoonako, n'imoosi atweela ni lisheese lilyaana, byoombi nga buli shishibira shoolisa kumwiiko mutweela, naluundi nga sibilikho buuleme bwoosi ta, bibe nga isaayilo intsoshe.

⁴Bawaaneyo iyeeyi ni limiiku, nga isaayilo ireerawo lukoosi, atweela ni biilimwa bibulungule nga baatubaasilemo ni kamafura ke kuusaala ku olivu. Bali ni khuuwaanayo tsisaayilo tsino khulwekhuuba Umukasya anababonekhela nibo lwe shaleelo.”

⁵Babaandu baareera bibiindu bino byoosi byeesi Musa aabalomela, mu lisari ly'Omukasya. Kila babaandu boosi baatsya beema iburaangisi w'Omukasya.

⁶Musa waaloma ari, “Ishino nisho sheesi Umukasya abalakiile inywe khuukhola, kane mubone shiriifwa sh'Omukasya.”

⁷Lwanyuma Musa waalomela Aroni ari, “Yisyeenda aambi ni shisheeso waakaaniseyo isaayilo yoowo, irusawo bibyoonako n'intsoshe, wiloombele wamweene ni babaandu, shishiyakhilo she bibyoonako. Umukasya waalakila ari shili ni khuuba shiryo.”

⁸Nashiryo Aroni wesyeenda aambi ni shisheeso, waakhoonya imoosi iye isaayilo irusaawo bibyoonako, khu luwaande lweewe.

⁹Kila basoleeli ba Aroni bamwakaanisa kamalasile, waasiikhamo lulwaala, waakawakha khu ntsika tsye shisheeso. Kamalasile kakaaramire waakatsukha mwisina mwe shisheeso.

¹⁰Ne kiminaawa, ni tsimbiko, ni luwaande lwe aasi lwe shiini, bibyaama khu saayilo irusawo bibyoonako, waabyookhela khu sheeso, shaaba nga Umukasya n'alakila Musa ari shikholikhe shiryo.

¹¹Inyama iramire yoosi ni lihaafu, Aroni waatsya waabyookhela ibulafu w'ekaambi.

¹²Lwanyuma, Aroni waakhoonya limiiku, nga isaayilo intsoshe. Basoleeli beewe baamuyilila kamalasile, waakawaanyaka khu soonda tsiine tsye shisheeso.

¹³Kila bamwakaanisa bisiintsa bye tsinyama tsye isaayilo intsoshe, nga khulikho ni kumurwe, waabyookhela byoosi khu sheeso.

¹⁴Waasiinga byeenda ni bileenge bye nyuma, nabyo waabyookhela atweela ni isaayilo iye khu sheeso.

¹⁵Lwanyuma Aroni waakhoonya imbusi indurume, nga niyo isaayilo irusawo bibyoonako bye babaandu babaaramire. Waakiwaanayo musaambo isi aawaanayo isaayilo iyanyoowa.

¹⁶Nashiryo Aroni wookhela isaayilo yino khu sheeso, musaambo abe ikanibwa.

¹⁷Mu khuloosela khu saayilo tsya busheele tsye kumutishinyi, waawaanayo isaayilo iye biilimwa biikhupake, nga abukulakho shikalabo shitweela she buufu, wabwookhela khu sheeso.

¹⁸Ikhumaliilisa waakhoonya iyeeyi ni limiiku, nga bili nibyo isaayilo iye babaandu ireera lukoosi. Basoleeli beewe baamwakaanisa kamalasile, waakahanyaka khu soonda tsiine tsye shisheeso.

¹⁹Bawaamba kiminaawa kye iyeeyi ni ke limiiku, ni tsimbiko, ni luwaande lwe aasi lwe shiini,

²⁰baabira khu nyama tsye shiifuba, baabyooshela byoosi khu sheeso.

²¹Ne tsinyama tsye shifuba, ni shiinama sh'etakho she luwaande luseetsa, ibyo Aroni waabisuta waabiniinisa angaaki, khukhwookesanisa bari byaawanibwileyo isi Umukasya. Shino shakholikha nga abe Umukasya n'amala khuulakila Musa ari shili ni khuuba shiryo.

²²Lwanyuma Aroni wenyusa kamakhono keewe mu ngaaki, waawa babaandu tsiikhabi. Nga waamalile khuuwaanayo isaayilo irusawo bibyoonako, intsoshe, n'ireera lukoosi, Aroni waakobola.

²³Kila Aroni ni Musa beengila mu lisari likhosefu. Ni baakobola antsye, baawa babaandu tsiikhabi. Nio shiriifwa sh'Omukasya shaabonekhela babaandu boosi.

²⁴Umukasya waasiindikha kumulilo kweekha aasi, kwaamila isaayilo intsoshe, ni kiminaawa kikyaba khu sheeso. Babaandu ni baabona shino, boosi baakhupa liyoombo, kila buli mutweela enamisa bubweeni atiila khwiiloba, nga besaaya Umukasya.