Read lumasaaba Yeremiya 10 Bible Online

Yeremiya 10 - lumasaaba bible

Yeremiya 10

¹Inywe babaandu ba Isiraeli, muwuliilise buulayi biilomo byeesi Umukasya abalomela inywe.

²Umukasya aloma ari, “Mukhatsya mwaloondelela isaambo isi kamanaambo kakaandi kebirisamwo ta, namwe mukhariisibwa lwe bubonelo bwe tsisaambo tsitsikhali ndweela mwikulu ta, abe yakhaba nga kamanaambo kakaandi katsya kariisibwa lwe bubonelo bweene ibwo.

³Lwekhuuba idiini iye babaandu bano shiili iya ŋali nakhari ta, batsya barema kuusaala mu shisaali, aryo umubeetsi naye waakubeetsa waakuŋoona buulayi.

⁴Lwanyuma babaandu baawakha izaabu ni feetsa khu shibeetse isho, baryo baraambisa kimisumaali ni nyoondo, baashikhwiikha akhuundu isi shikhanyala sharusiwawo ta.

⁵Bibeetse ibyo bili bibiriisaka busa, ne nga sibinyala khuukanikha ta; bali ni khuubisuta busa khuubiyila isi bili ni khuutsya, lwekhuuba sibinyala khuukyeenda bibyeene ta. Ni nashiryo mukhabirya ta; lwekhuuba sibinyala byaabakholakho buubi bwoosi, namwe abe yakhaba khuubakholakho buulayi bwoosi ta.”

⁶Iwe Umukasya weefwe, uli Umukhulu luundi lisiina lyoowo lili lye kamaani, mbaawo ukuundi uuli nga iwe ta.

⁷Iwe uli Umuyiinga uwe kamanaambo, naanu umweene ukhanyala wakhwiisamwo iwe lukoosi? Buli mutweela yeesi khu shibala aakha khuukhuwa iwe shiriifwa. Lwekhuuba mu be kamakhula boosi, mu manaambo ni mu buyiinga bwoosi, mbaawo na mutweela ufwaananakho ni nawe ta.

⁸Boosi bali baasilu luundi sibalimwo kamakyesi ta, lwekhuuba baleekebwela ni bifwaani byaabwe bibikhalimwo nakhari ta.

⁹Bifwaani byaabwe babiwakhakho ifeetsa iili imiliise buulayi nga bakyaamisa i Tarushishi, ni zaabu khukhwaama i Ufazi. Ne ate nga bino byoosi bikholebwa ni babaandu be kamakhula ke ngaaki busa. Lwanyuma baabikwaarisa ni tsingubo tse raangi imbuusi ni tsinandaafu;

¹⁰Ne Umukasya niye ali Wele uwa ŋali, ali umulamu, luundi ali Umuyiinga uwe biilo ni biilo. Niye n'aba nga waakhalaale, shiibala shoosi shinikina busa, ni kamanaambo koosi sikanyala kenyindaalila lirima lyeewe.

¹¹Iwe tsya ubaboolele shino uri, ba wele bano sibali nibo babaabuumba likulu ni shiibala ta, baryo bakhaahelele ilala khukhwaama khu shibala.

¹²Ne Wele niye uwabuumba shiibala nga araambisa kamaani keewe, niye aaraambisa kamakhula keewe waarawo shiibala, waabalaayisa likulu lwe khuumanya khweewe khuukali.

¹³Niye nga waarusile likono lyeewe, kameetsi kakaali mwikulu koosi kakuula, niye ukila namufweeli waaniina khukhwaama isi shiibala shaakama. Niye ureera khuumulikha khweetsila atweela ni fula, naluundi waarumana imbewo khukhwaama isi aakibiikha.

¹⁴Nio buli muundu yeesi ubona shino wewulila ari ali umusiru, luundi ari s'alikho ni kamakyesi koosi ta. Buli muundu yeesi ukhola bifwaani aswaala busa ni bifwaani byeesi akholile. Lwekhuuba bifwaani bino sibili bya ŋali ta, naluundi sibilimwo kumuukha kwe buulamu ta.

¹⁵Bibuumbe ibyo sibilimwo na khari ta, naluundi bili bye kumwinyawo busa. Nga shifukhu she kumutaambo sheetsile khwoola, nabyo bikhaahele biwewo.

¹⁶Ne Wele wa Isiraeli niye s'ali nga nibyo ta, lwekhuuba niye uwabuumba bibiindu byoosi, nga waayililemo ni Isiraeli shikuuka she buusikha bweewe, Umukasya uwe kamahe, umunyali wa byoosi nilyo lisiina lyeewe.

¹⁷Inywe babaandu ba Yerusalemu babaamenya mu bubowe, yinyukha aasi mubuusanise bibiindu byeenywe.

¹⁸Lwekhuuba Umukasya umweene aloma ari atsya khubakholowa ibulafu we shiibala shino; atsya khuubamiinila mu mutaambo kumukali, khukhwoolesa nikane mwinyoole nga mwaweelewo.

¹⁹Babaandu be mu Yerusalemu nabo beelamwo bari, “Nga khwaatsiinisibwile naabi, ni kamakoontsyo keefwe kabonekha buubi naabi. Ne ate ndi nafwe fabeene khwelomela khuri kane khwinyindaalile butsiina ibwo bwoosi!

²⁰Kamasari keefwe koonakisibwile kaweelewo, ni kimikosi kikibowa kamasari keene bakikhalakile. Ni babaana beefwe beene nabo baakhururirekho baweelewo, mbaawo na mutweela uramilewo khuukhuyeeta khuubowa kamasari keefwe luundi ta, mbaawo na mutweela uramilewo khuukhwoombekhela nakhari ta.”

²¹Ne nase naabeelamwo ndi, “Baaraangilisi nibo babaakhalimwo kamakyesi nakhari ta, nibo sibatsya bereebakho isi Umukasya khuufuna khu makyesi ke khuubawo ta. Shino nisho shishiikila babaandu beefwe baasalanila busa nga kamasheese.

²²Reekeresa! Iliwo kamawulile kakaali khukhwiitsa! Bari iliwo khuuyeengukhana khuukali mu shibala shishiili khu lubeka lwe ngaaki. Shino shishinakila biriimba bya Yuda biwumbukhake bikwe, biikyele buumenyo mweesi bisolo patuukha bimenya.”

²³Umukasya, ise naamanya ndi mbaawo umuundu na mutweela uwula buulamu bweewe umweene ta; mbaawo umuundu ukyeenda na mutweela unyala khukhwiraangilila umweene ta.

²⁴Ise ikhuloomba ungolomose ise, O Umukasya, ne ushikhole mu bwaŋali bwoowo; Ukhaamba ise shitaambiso nga uli ni lirima ta, lwekhuuba isho shinyala shaamalilawo ilala.

²⁵Ari tsukhiilila lirima lyoowo khu manaambo kakaakhakhumanyile iwe ta, ni kha baandu abo boosi babaakhakhwisaaya iwe ta. Lwekhuuba nibo baahesa babaandu ba Yakobo, baabahesa baabamalilawo ilala, baryo baalekha shiibala sheefwe shaaba kamawuumbu busa.