Read lumasaaba Yeremiya 11 Bible Online

Yeremiya 11 - lumasaaba bible

Yeremiya 11

¹Ilomo y'Omukasya iyeetsa isi Yeremiya yaaloma iri,

²“Wuliilisa bibiindu bibikanibwa mu ndakaano, utsye ubikanikhile babaandu ba Yuda, atweela ni naabo boosi babaamenya mu Yerusalemu.

³Utsye ubalomele uri, sheesi ise Umukasya Wele wa Isiraeli inoma nisho shino, ‘Atsubibwe naabi umuundu yeesi ukhakane atsiile khu bilomo bibiili mu ndakaano yino ta.’

⁴Niyo ili indakaano isi nalakila bakuuka beenywe khu mbuka isi nabarusila mu shibala she Misiri, nga ninabarusa khukhwaama mu mulilo kumurafu kukwoosha biibya. Iseese nabalomela nibo khuuwuliilisa buulayi bilomo byoosi bibiili mu ndakaano babitsiilekho. Iseese nabalomela nibo ndi nga baabitsiiliilekho, nibo kane babaatsake babaandu baase, ni nase kane imbaatsake Wele waabwe.

⁵Nio lwanyuma nase indyo noolelese byoosi byeesi nalayila khuukholela bakuuka beenywe beene, khuubayila mu shibala shishitsuule luundi shishirurukukha ni kamabeele ni bubuukhi bwe ntsukhi. Shino nisho shiibala ari sheesi inywe mumenyamwo shaleelo shino.” Nase indyo neelamwo ndi, “Khali shibeele shiryo, Umukasya.”

⁶Umukasya waanomela luundi ari, “Tsya mu biriimba bya Yuda, ni mu nguudo tse mu Yerusalemu, ulaangilile biilomo bino byoosi. Tsya ukuukuule uri: ‘Ni muwuliilise biilomo bibiili mu ndakaano yino mubitsiilekho buulayi.

⁷Khukhwaamila khu mbuka isi narusila bakuuka beenywe khukhwaama mu shibala she Misiri, khukhwoolesa ni shaleelo shino, ise naba nga imbareewula, nga imbaboolela ndi bawuliilise likono lyase baliloondelele.

⁸Ne nibo sibaakana khuuwuliilisa namwe baarayo kumwoyo ta, ne buli mutweela khu nibo waaba nga akana khuuloondelela bumiinyi bubuuli mu mwoyo kweewe kumubi. Nase indyo naabareerakho bitsubo bibiili mu ndakaano nyene, isi nabalakila khuuloondelela, ne nibo bekaana khuubitsiilakho.’ ”

⁹Indi luundi Umukasya waanomela ari, “Iliwo luwomelo lweesi babaandu ba Yuda, ni naabo babaamenya mu Yerusalemu balikho bakhalila ise.

¹⁰Nibo baakhalilewo khukhwiilayo mu byoonako bye bakuuka baabwe, bakhalawo khukhwikaana khuuloondelela bilomo byase byeesi nabalomela. Baryo baatsya baloondelela bawele babaandi baabesaaya. Babaandu ba Isiraeli ni babaandu ba Yuda, boosi atweela baafuniaakile indakaano isi ise nakhola ni bakuuka baabwe.

¹¹Ni nashiryo sheesi Umukasya aloma nisho shino: ‘Ise intsya khubareerakho bukosi bweesi bakhanyala batitukha ta. Abe bakhaantsuwa baryee, ise singene imbawuliliise naakhafwiiti khoosi ta.

¹²Babaandu be mu biriimba bya Yuda, ni naabo babaamenya mu Yerusalemu bakhaatsye balilile ba wele beesi besaaya nga babookhela tsisaayilo, ne ba wele bano singene babayeete mu mbuka yaabwe iye kumutaambo ta.

¹³Lwekhuuba iwe Yuda, ba wele boowo babeele baakali naabi balekhaana ni buukali bwe biriimba byoowo, ni byeeso byeesi babaandu barawo khukhwoosha bubaane nga baswaalile isi Bayaali, bilekhaana ni buukali bwe tsinguudo tsitsiili mu Yerusalemu.’

¹⁴Nashiryo, iwe Yeremiya, ukhaloombela luundi babaandu bano ta, namwe bari wikoontselele khu lwaabwe ta. Lwekhuuba ise siintsya luundi khubawuliilisa nibo nga baloombile isi ise mu mbuka iye kumutaambo ta.”

¹⁵Umukasya ereeba ari, “Babaandu baase bakanwa bali na bunyala shiina khuuba mwisaayilo lyase likhulu, nga bali khuukhola bibiindu bye bubwoonaki? Bambaasa bari bisuubiso byeesi bakhola atweela ni tsisaayilo tseesi boosha, binyala byaabawonesa shitaambiso? Bambaasa bari khuruuya ikhwo khunyala khwantsikhoyesa ise?

¹⁶Yabawo lutweela, Umukasya aabalaanga inywe khuuba lusakya lwe kuusaala ku olivu kukwasyeebeleela buulayi, nga kulikho kamatuunda kakaabonekha buulayi. Ne ari atsya khurumana ikhuungu iye kamaani, ifuniaakake tsisakya tsoosi, lwanyuma akuwaambisekho kumulilo kwitsutsuuwe.

¹⁷Umukasya uwe kamahe, Umunyali wa byoosi, uwabarawo inywe, umweene niye ulaangiliile buubi buno khuubeetsila. Lwekhuuba inywe babaandu ba Isiraeli, atweela ni babaandu ba Yuda, mwakholile buubi naabi. Muryo mwasokosaane lirima lyase, nga ni mwatsya mwoosha bubaane isi wele Bayaali.”

¹⁸Umukasya umweene waantsokesa, ni nase indyo nashimanya, lwekhuuba khu mbuka iyo, aantsokesa shiina sheesi babaandu baaba balikhukhola.

¹⁹Iseese naba nafwaanile busa nga likheese lyeesi bayila khuutsya khukhoonya. Naba naakhushimanyakho ndi iseese niye isi baaba baboolanila bari, “Khakhureme kuusaala kukwe aasi atweela ni kamatuunda kaakwo koosi. Ari lekha khumukhale akwe khumuruse mu shibala she babaandu baalamu, nio lisiina lyeewe lilekhe khumanyikha luundi ta.

²⁰Ne iwe, O Umukasya uwe kamahe, umunyali wa byoosi, iwe niye ukhala kumusaango kwaŋali, naluundi iwe niye ukhaka kumwoyo ni bibyaambaaso byeene, lekha ari ise imbone khukhwiliyaasa khwoowo khu baandu bano. Ise neweeleyo is'uli ukhalewo.”

²¹Lwanyuma kila Umukasya akanikha bibiwaamba khu basaani be mu Anasosi, babaali khuweentsa buulamu bwase, nga banomela bari ikheelayo luundi naakanikha bye buŋoosi mu Lisiina ly'Omukasya ta, bari nga nashikholile luundi, imba niriibwa ni nabo.

²²Shikila Umukasya umunyali wa byoosi aloma ari, “Ise intsya khubawa shitaambiso. Basooleli baabwe batsya khwiiribwa ni lurima, babaana baabwe babeene besiinde ni bekhaana, batsya khufwa lwe ntsala

²³Mbaawo na mutweela khu baandu baabwe utsya khuramawo nga mulamu ta, lwekhuuba ise intsya khureera bukosi buukali khu baandu be mu Anasosi, mu mwiiko kwe khuufunilamwo shitaambiso.”