Read lumasaaba Yeremiya 12 Bible Online

Yeremiya 12 - lumasaaba bible

Yeremiya 12

¹Ise nga nareerire khukhwilootsa khwase is'uli, O Umukasya, iwe niye ufuura bukwalaafu. Ne ate ise nga naakhila khuukanikha khu biwaamba khu bwaŋali bwoowo. Lwashiina babaandu baabi bibiindu bibatsiila buulayi? Lwashiina babaandu baboonaki batsowatsowana?

²Iwe nga waababyaalile nibo nga kimisaala, kimilaandila kyaabwe kitimisana khaangu naabi khukhwiikha aasi mwiloba, kitsowa khaangu naabi kyaarakho kamatuunda. Iwe ubonekha nga uli khu minwa kyaabwe luukali, ne nga ate iwe uli aleeyi naabi ni kimyoyo kyaabwe.

³Ne ate nga iwe Umukasya waayimanya ise buulayi; iwe umbona ise luundi wakhaka bibyambaaso byase bibikhuwaamba khwiiwe. Ari soolayo babaandu baboonaki abo, bafwaane nga likheese lyeesi bali khuutsya khukhoonya. N'ubawulemo ubaliinde baliindilile shifukhu she khu khwiiribwa.

⁴Shibala sheefwe khuuba shishoomu shiryo shikhoolese waheena, ni bunyaasi bwe mu maayilo bukhoome buryo khukhwoolisa liina? Bisolo ni binywiinywi byoosi bilikho bifwa biwawo. Bino biba biryo lwe bubwoonaki bwe babaandu babaamenya mu shibala shino. Ate nga babaandu beene bano bebuyila bari, “Niye s'akhaabewo mulamu khuubona shishikhaakholikhe khusiifwe lwanyuma lwayo ta.”

⁵Umukasya waalomela Yeremiya ari, Iwe siinga uba nga utima ni babaandu khu bikyele ne baakhufuura tsiindimo, unanyalisa uryeena khukhaabisana ni tsiŋwaaŋwa mu ndimo? Iwe siinga uba nga wareremukha waakwa aasi mu shibala shishiili shitsalaafu buulayi, ukhaanyalise uryeena mu bitsakha bibiili khu ndulo khwe luluutsi Yorudaani?

⁶Bona ni baalebe boowo babeene, babaandu be shikuuka shoowo baakhulilemo luwomelo; balikho benyusa luwuungu khukhwibwakala. Ukheelayo luundi khuufukiilisana ni nabo ta, abe bakhaakyelawo baakanikha biilomo biilayi is'uli.

⁷Umukasya aloma ari, “Ari babaandu baase ise naabaantsukhile, naalekhile linaambo lyase lyeesi narobora. Ari samweene naawaanileyo babaandu baase abe beesi ingana naabi mu makhono ke baasiku baabwe.

⁸Babaandu baase baarobore baashuukhilekho samweene bafwaanile busa nga italanyi iye mu shisaali. Ari balikho babuutsa bandiisariisa ise, nashiryo naakhalilewo khuubabiiyila nibo.

⁹Babaandu baase baarobore bekyelile busa nga khanywiinywi khakheetsulakho kamakoondo, kheesi binywiinywi bibiindi bibotokheleele nga bikana khukhalya. Ari tsya ukuukuule bisolo bibiindi bye mwirome nabyo bitsye bitubaase mu khutuukhuunya.

¹⁰Babaayi be kamasheese baakali boonakisile kumukuunda kwase kwe kimizabibu, baakhaandakiliile inimilo yase. Baryo bafwaanisile kumukuunda kwase abe kukuuli kumulayi kwekyela kumubiimbi.

¹¹Ari liiswa lyoosi lyafwaanile busa nga kumubiimbi, ari libonekha lilyoomu busa isiindi. Shibala shoosi shafwaanile nga kumubiimbi, ate nga mbaawo umuundu yeesi uwinaanayo nakhari ta.

¹²Khu bifwo bibyesuta angaaki nga tsingoongo nga mbaawo shishiindu shoosi shishitsowakho ta, babaandu babeetsa khuhesa boolile mu bukali; Lwekhuuba lurima lw'Omukasya lukheetse khuuhesa, khukhwaamila khu lubeka lutweela khukhwoola khu lubeka luluundi. Mbaawo umuundu na mutweela unyala waarama mu lukoosi ta.

¹³Babaandu baase bakhaamiitse iŋaano, ne mu khuukyesa bakyese kamawa busa, bakheluyise babeene nga baraamba naabi, ne mbaawo sheesi bakhaamisemo ta. Baryo bakhaswaale busa ni neebyo byeesi bakhaabe nga bakyesile, lwe lirima ly'Omukasya liirafu.”

¹⁴Umukasya alikho aloma ari, “Indikho ni sheesi inoma isi babesanwa babaali be busiku isi babaandu baase, babaatsya bawaambaka babaandu baase ba Isiraeli beesi narobora. Intsya khukhwaanyula baasiku abo imbaruse mu shibala shaabwe, nio abweene awo inyalise khuuwonesa babaandu ba Yuda nga imbarusamwo.

¹⁵Indyo nga naamalile khuubarusamwo, ikhaabawaambile shiisa; lwanyuma imbakobose mu shibala she buusikha bwaabwe, shishiili shibala shaabwe shisheene, buli mutweela mu shisiintsa sheewe.

¹⁶Baryo nga imbuka yeetsile khwoola, beyike isaambo isi babaandu baase bebirisamwo, ni khuumanya khukhwitsuba nga baraambisa lisiina lyase bari, ‘Nga Umukasya n'ali umulamu,’ mu saambo nyene ndweela isi baaleekelamwo babaandu baase khukhwitsuba nga baraambisa lisiina lya Bayaali, abweene awo bakhekyele babaandu baase babeene.

¹⁷Ne siinga babaandu be mu linaambo lyoosi baloba khuwuliilisa, ise ikheetse imbakhuule imbaruse mu shibala shaabwe shisheene, imbahesele ilala imbamalewo. Shino ise Umukasya samweene, niye ushilaangiliile.”