Read lumasaaba Yeremiya 13 Bible Online

Yeremiya 13 - lumasaaba bible

Yeremiya 13

¹Umukasya waanomela ise ari, “Tsya wikulile kumukhandaala kwe lihaafu, lwanyuma ukwibowe mu shikuute shoowo, ukhakusenyakho mu meetsi ta.”

²Nase indyo naatsya naakula kumukhandaala, naakwibowa mu shikuute shase, nga Umukasya n'andakila.

³Lwanyuma ndi Umukasya waanganikhayo kumuluundi kwe khaabili, nga aloma ari:

⁴“Suuta kumukhandaala kwoowo tsana kweesi wakula, kweesi wibowele mu shikuute shoowo, utsye i Perati. Nga woolileyo, ukubise mu lufwa lwe mu lwaanda ibweene iyo.”

⁵Nase indyo nenyukha naatsya naakubisa i Perati, nga Umukasya n'andakila.

⁶Lwanyuma lwe bifukhu biikalikho khuubirawo, Umukasya ndi waanomela ari, “Yinyukha utsye i Perati tsana, ubukule kumukhandaala kweesi nakhuloma khuubisayo.”

⁷Nase ndyo naakyeenda neelayo i Perati, naatakhulaka isi nakubiikha, naakunyoola, naakubukula. Ne khu mbuka yino, kwaba kwayonekha nga sikushiilimo kumukaso ta.

⁸Lwanyuma kila Umukasya anganikhayo luundi nga aloma ari,

⁹“Iseese Umukasya indi khuuloma ndi: musaambo niyo ndweela, intsya khwoonakisa khukhwiyiingayiinga khwa Yuda, ni shikili sha Yerusalemu shiikali isho.

¹⁰Babaandu baabi bano luundi be shikili, bayikaana khuuloondelela bilomo byase. Batsya baloondelela bye bumiinyi bwaabwe, besaaya luundi bakaanisa Bayaali, boosi bakhafwaane nga kumukhandaala kuno kukuweelemo kumukaso.

¹¹Nga n'ubona kumukhandaala ni bakubowa mu shikuute bakunyweesela ilala, nase ndyo neboweelela babaandu ba Isiraeli boosi atweela ni ba Yuda, naabakumisila ilala. Ise Umukasya nabakana nibo babe babaandu baase babeene, be lisiina liilayi, babaamanyikhaane buulayi, nio bandeerere ise lubuyi ni shiriifwa. Ne nibo bekaana khukhuunoondelela ise.”

¹²Umukasya waanomela luundi ari, “Tsya uboolele babaandu bano uri, ‘Umukasya Wele wa Isiraeli ali khuulakila buli muundu etsuse iviini mu muka.’ Ne nibo kane bakhwiilemo nga baloma bari, ‘Ifwe isho khwashimanya khaale khuri buli muka yaakha khukhwitsusibwamo iviini.’

¹³Lwanyuma ubaboolele uri, Ise Umukasya samweene, intsya khutsukhiilila babaandu bano boosi ni viini, banywe bameelele ilala, bakhaameele boosi nga waayililemo bayiinga, nga nibo babekhala khu shitsoloŋo sha Dawudi kuuka waabwe, ni basaayi, baŋoosi, atweela ni babaandu boosi babaamenya mu Yerusalemu.

¹⁴Nio lwanyuma imbakhoonyanise nga n'ubona tsimuka ni tsikhoonyana tsaatikha, babaana ni baakhulu beene, nga mbaawo na mutweela isi ikhaawaambilekho shiisa nakhari ta. Mbaawo bubweela na buri bubunyala bwantsakamisa ise khuubahesa imbamalewo ta.”

¹⁵Ni murekeerese buulayi muwulile, lwekhuuba Umukasya umweene niye ukanikhile bibiindu bino. Mukheyiingayiinga ta.

¹⁶Ni muwe Umukasya Wele weenywe shiriifwa, nga ashiili khubareerera shifukhu she shishiilima ta. Nga bikyele byeenywe bishiili khukhwituyaka khu ngoongo nga shishiilima shawaambile ta. Inywe mulikho musuubila khuufuna buwaanga, ne niye atsya khubushuusa bwikyele shishiilima namukoto, ashikyelise shibe she kumutaambo kumukali naabi.

¹⁷Ne inywe siinga mwikaana khuwuliilisa, ise intsya khulilila mu shimoonyo busa lwe khukhwiyiingayiinga khweenywe; Intsya khulila ni kumutaambo kumukali kumweene, tsimoni tsase tsirurukukhe kamasika kamakali, lwekhuuba babaandu be mwitaala ly'Omukasya, baayilibwile nga baabowe.

¹⁸Umukasya ndi waanomela ari, “Tsya uboolele umuyiinga ni nabakyelama, barure khu bitsoloŋo byaabwe, bekhale aasi, lwekhuuba kamahabi kaabwe ke shiriifwa kakwiile aasi khukhwaama khu mirwe kyaabwe.

¹⁹Biriimba bibiili i Negevu, lubeka lwe mwaalo wa Yuda baabibotokheleele mbaawo bubiriro ta, mbaawo umuundu na mutweela unyala wekulawo wenjilamwo namwe waarura ta. Babaandu boosi be mu Yuda baasutibwile baayilibwile mu bubowe, baabasutile baabayilile boositsana.”

²⁰Yinyusa tsimoni tsoowo ubone babaandu babaali khukhwiitsa nga baamila kwe ngaaki. Ari babaandu be mwitaala lyoowo abe beesi baakhuwa iwe khuloleleela, bali waheena? Babaandu abe beesi wikhala nga wiwulililakho?

²¹Ari kane ulome uri shiina, nga babaandu bano abe beesi iwe walaanga uri bali bayeeti boowo busa, lwanyuma bekyele bawuli boowo? Butsiina bukhaakhuwaambe bukhuniine, bufwaane busa nga bw'omukhasi utsya khusaala.

²²Ne siinga iwe wireeba mu mwoyo kwoowo uri, “Ne shiina kila bibiindu bino byoosi bingwiilekho?” Shili shiryo lwekhuuba bibyoonako byoowo byabeele biikali naabi, shishikilile bikwaaro byoowo byonuukhaka, shareerera babaandu khuukhufwakhila.

²³Manya umuundu umu Esiyopiya anyala waashuusakho iraangi ye shihaafu sheewe, namwe ingwe inyala yashuusakho kamakoondo kaayo? Iba nga shishinyalikhana shiryo, khali nanywe babaandu babaamanyiila khuukhola bye bubwoonaki, mushuusilekho mukhola buulayi.

²⁴Ise intsya khubasalanisa busa mufwaane nga n'ubona likhuutsi ni litamuusibwa, lyayilibwa ni mbewo iyaama mu mubiimbi.

²⁵Kuno kuli kumukabo kwoowo kweesi ise samweene ikhupimiile iwe. Shili shiryo lwekhuuba iwe waayimiinyaalila ise, waafukiilila bye bubeeyi byonyene. Shino ise Umukasya samweene niye ushikuukuulile.

²⁶Ise samweene intsya khwinyusa maliinda woowo mu ngaaki, ikhubiimbe mu moni mwoowo, nio babaandu babone bukhuna bwoowo.

²⁷Ise naamalile khaale khuubona bye mbikho byeesi mukhola, buyeyani ni kumulyulyu kweenywe, atweela ni khuukhola bye bwamalaaya bweenywe akhali tsisoni tsoosi ta! Ise naabona khaale bibiindu bye tsisoni byeesi mukholela khu ngoongo ni mu mikuunda. Nga kumutaambo kwakhunyoolile iwe Yerusalemu! Iwe ukhoolise liina khuuba umunyaalu ufwaana aryo?