Read lumasaaba Yeremiya 14 Bible Online

Yeremiya 14 - lumasaaba bible

Yeremiya 14

¹Umukasya waanganikhayo isi ise khu lomo iwaamba khu shimiyu.

²“Shiibala sha Yuda shilikho shilootsa, biriimba byasho bilikho bilila; babaandu baamwo boosi baantsuwa lwe shibala shaabwe, iliwo khulila khuukali khukhuuli khuuniina khukhwaama mu Yerusalemu.

³Babaandu baamwo be shiriifwa barumana babaakaanisi baabwe khuubareerera kameetsi, babaakaanisi bano baatsya khu sebele tse kameetsi, ne baalekha khuukanyoolamwo ta. Baryo baashuukha baakobola busa ni tsimuka tsinyomu busa. Nga boosi baweelemo kamaani, nga betsuule kumutaambo, luundi nga bebiimbiliile mu moni mwaabwe.

⁴Lwekhuuba liloba lyayoma lyakhaangarana busa, lwe khutaambawo ifula; balimi baayiwunamila busa, baabiimbilila mu moni mwaabwe.

⁵Abe yakhaba ni khisi ikhasi iyasaalile, ilekha khameeme khaayo, lwekhuuba mbaawo bunyaasi na buri ta.

⁶Tsisikilya tse mwirome tsiimikha khu bikoongo khu ngaaki, nga tsiheetsaheetsa busa nga n'ubona patuukha n'akhola; sitsinyala ni khuubona buulayi ta, lwekhuuba mbaawo biilyo byeesi tsilya ta.”

⁷Babaandu bakyelawo belootsa bari, “Abe yakhaba nga bibyoonako byeefwe bikhuwaatsilila biryo, O Umukasya bakho ni sheesi ukhola lwe buulayi bwoowo. Ifwe khwaakwa, khwakhaasikha kimiluundi kimikali busa, khwayonakisa luukali mu moni tsoowo.

⁸Iwe uli kumwiyikino kwa Isiraeli, uli umuwonesi wa Isiraeli mu mbuka iye bukosi. Lwashiina ari wibirisa busa nga umukyeendaani mu shibala sheefwe, wafwaana busa nga umukyeendaani ubirawo, ne wakhalawo khuukonawo busa shiilo shitweela shonyene?

⁹Lwashiina ufwaana busa nga umuundu isi shikosi shibuukhile busa, wafwaana nga umuselikhale ukhalikho ni kamaani ke khuuyeeta ta? Ne shonyene ndi iwe Umukasya, uli akari musiifwe! Wakhurobora ifwe khwalaangibwa lisiina lyoowo. Nashiryo ukhakhulekha khwaaba fenyene ta!”

¹⁰Umukasya waakanikha bibiwaamba khu baandu bano ari, “Nibo bakana naabi khukhuuntsawukhakho khusiise, balekha khukhaliilisa bikyele byaabwe ta. Nashiryo kila Umukasya naye akhakana khuubafukiilila ta. Aryo kane ashebulile bubwoonaki bwaabwe, abawe shitaambiso lwe bibyoonako byaabwe.”

¹¹Umukasya waanomela ise ari, “Ukhaloomba lwe khuukana uri ise injeete babaandu bano ta.

¹²Abe baakhabuya intsala barye, ise singene imbulile khuulila khwaabwe lwe buyeeti ta. Abe baakhawaanayo tsisaayilo tsintsoshe, ni bilime bibulungule nga biwaanwa, ise singene imbifukiilile ta. Ne akhali ndi, ise kane imbakhoonye nibo mu busoolo bwe lurima, intsala ni buulwaale buukali.”

¹³Lwanyuma kila ise nilamo ndi, “O Umukasya, Umunyali wa byoosi, iwe waamanya uri baŋoosi batsya nga baboolela babaandu bari singene ibewo busoolo bwoosi, namwe ibewo intsala ta. Baloma bari iwe waabasuubisa uri kane ureere lukoosi lulukhawawo ta mu shifwo shino.”

¹⁴Umukasya naye waantsilamwo waanomela ari, “Baŋoosi bano balikho bakanikha bye bubeeyi mu lisiina lyase. Iseese naakhubarumanakho, namwe naabarobora nibo, namwe naabakanikhayo ta. Buŋoosi bweesi baboola, kamarooro keesi babona, ni bye bulakusi byeesi babareerera inywe, bili bubeeyi bwonyene ni bibiindu bibikhalimwo bye mu myoyo kyaabwe.

¹⁵Ninashiryo, sheesi ise Umukasya inoma nisho shino ndi, baŋoosi babaakanikha bibiindu ibyo, iseese naakhubarumanakho ta; ne ate batsya baakanikhila babaandu bari singene ibewo busoolo namwe intsala yoosi mu shibala shino ta. Ne ari indi khuuloma ndi, baŋoosi beene abo batsya khuhelela mu busoolo ni ntsala ingali.

¹⁶Ni babaandu abo beesi batsya baakanikhila buŋoosi buno, bakheeribwe lwe ntsala ni busoolo, ni kimilaambo kyaabwe kituumibwe mu nguudo tse mu shiriimba Yerusalemu. Sikhaabewo umuundu na mutweela ukhaabasiikhe nibo, namwe bakyelama baabwe, namwe basooleli baabwe, namwe bakhaana baabwe ta. Ise ikhaabatsukhiililekho lirima lyase, bahele nga buubi bwaabwe ni buli.”

¹⁷Umukasya waamba shiilakilo shino ari, “Ari iwe Yeremiya, tsya uboolele babaandu bano ilomo yino uri, ‘Tsimoni tsase tsirurukukha ni kamasika shiilo ni kumuusi, ise singene naakamise khuulila ta; lwekhuuba linaambo lye babaandu baase lyabonaboone luukali naabi, lyaakhupibwile likuma lye kamaani lilikhawona ta.

¹⁸Nga naarurire ibulafu mwirome iyo, inyoola kimilaambo kye babaandu babeeribwiile mu busoolo. Nga naakoboole mu shiriimba mukari, imbona abo babaali khuufwa buulwaale bwe ntsala! Ne baŋoosi atweela ni basaayi nibo baba bali khuukhola kimilimo kyaabwe nga busheele.’ ”

¹⁹Umukasya, iwe wekaaniile ilala Yuda? Ari Yerusalemu waashibiiyilile ilala? Ne ari lwashiina waakhupile ifwe buubi naabi khwaalekha khunyalisa ni khuuwona ta? Ifwe khwaba khwiyikina khuri khunafuna lukoosi, ne lwataambilawo ilala, khweyikina khuri khunafuna imbuka iye khuuwona, ne bona ingunyi yonyene.

²⁰O Umukasya, ifwe khulikho khwiyikiitsa lwe bubwoonaki bweefwe, ni buubi bwe bakuuka beefwe; ilala ifwe khwayonakisa is'uli.

²¹Lwe buulayi bwe lisiina lyoowo, ukhakhulekelesa ifwe ta, ukheyisa aasi shitsoloŋo shoowo she shiriifwa ta. Khuloomba khuri ushebulile indakaano yoowo ni nafwe, ukhakifuniaaka ta.

²²Manya iliwo na shitweela khu bifwaani bye kamanaambo shishinyala shareera ifula? Abe yakhaba likulu lilyeene khu bwalyo silinyala lyasiindikha ifula ta. Iweewe Umukasya, iwe wenyene niye Wele weefwe unyala waakhuwa ifula. Lwekhuuba iweewe niye ukhola bibiindu bibifwaana biri.