Read lumasaaba Yeremiya 15 Bible Online

Yeremiya 15 - lumasaaba bible

Yeremiya 15

¹Lwanyuma Umukasya waanomela ari, “Abe yakhaba Musa ni Samweli baba babeetsile beemikha ano mu moni tsase, nga bekoontselela atweela ni nawe, mu mwoyo kwase sinandishuukhile imaambila babaandu bano shiisa ta. Nashiryo rusawo babaandu bano mu moni tsase, barusewo batsye!

²Ne siinga babaandu bano bakhureeba iwe bari, ‘Ne ari khutsya waheena?’ Nawe ubeelamwo sheesi ise Umukasya indi khuukhulomela ndi: Batweela khusiinywe babaatsya khufwa buulwaale, mutsya khufwa buulwaale. Ni babaandi babaatsya khufwiila mu busoolo, mutsya khufwa ni lurima. Abo babaatsya khufwa intsala, mutsya khufwa intsala. Abo babaatsya khuyilibwa mu bubowe, mutsya khuyilibwa mu bubowe.

³Iseese Umukasya samweene naakhalilewo khukhwakaanisa bibiitsya khuubahesa bye tsisaambo tsiine, nga nibyo bino: Balala baakhafwiile mu busoolo, tsiimbwa tsikhweesake kimilaambo kyaabwe, kiminywiinywi kye mu ngaaki kilye, ni tsisolo tse mwirome tsitukhuunye bibiramilewo byoosi.

⁴Ise ikhaabakhole nibo bekyele she khukhwiiyaanga isi buyiinga bwoosi bwe khu shibala, lweebyo byoosi byeesi Manase, umusooleli wa Hezekiya aakhola mu Yerusalemu, nga ali umuyiinga wa Yuda.”

⁵Umukasya aloma ari, “Inywe babaandu be mu Yerusalemu, naanu ukane abawaambile inywe shiisa, namwe naanu ukane enaaneyo khulwe buulayi bweenywe?

⁶Inywe babaandu baase mwaayintsikaana ise Umukasya, mwaayikhupa ise kumukoongo mwandurakho. Nase indyo ari natsanuusile kumukhono kwase, intsya khubasimula, imbahesele ilala, lwekhuuba ise naaluwile khuubokesanisa inywe shiisa.

⁷Ise nabawuula naabaseesela mu bilibwa bye shiriimba, naabahaanya mu ngaaki nga likhuutsi. Ari intsya khubareerera kumutaambo ni khuuhela, lwekhuuba inywe mwaayikaana khushuusakho tsisaambo tseenywe.

⁸Ise nalooselekho buukali bwe banamulekhwa baabwe, bafuura kumuyeekhe kwe mu nyaantsa buukali. Ikhaabeyo khukhwibwakalibwa khwe mwihangilwe, ibeyo babaakhoonya basooleli nio ba maayi baabwe baantsuwe lwe kumutaambo kumukali. Lubaluba, itsya khubayo kumutaambo ni ngunyi ingali naabi.

⁹Maayi uwasaala basooleli musaafu akhetsule kumutaambo kumukali, akwe aasi lwe nduyi ingali. Buwaanga bwe nyaanga bukhekyele shishiilima busa is'ali; maayi ufwaana aryo akhawaambisibwe tsisoni, alwaale kumwoyo. Buli muundu yeesi ukhaaramewo nga mulamu, akhoonyebwe ni baasiku beenywe. Shino ise Umukasya samweene niye ushikuukuulile.”

¹⁰O maayi! Ise nga ndi umuundu uwe kumutaambo kumukali! Lwashiina maayi wase aasaala ise khukhwiitsa mu shibala, nga indekana ni shibala na buli muundu yeesi ushilimwo! Ise mbaawo umuundu isi nekhopisayo kamapeesa, namwe bari khuubakho n'umuundu yeesi isi ise nikhopayo ta; ne ate buli muundu antsuba butsubi.

¹¹Umukasya khali bitsubo byaabwe byooleleele, siinga ise imba nga naakhukhwakaanisa iwe buulayi ta, namwe nga ise naakhukhwikoontselela iwe lwe buulayi bwe baasiku khu mbuka isi nibo baabeela mu buwaangafu ni kumutaambo

¹²Manya iliyo umuundu unyala waafuniaaka shishuuma, ni khufuurisa shishuuma shishaamila khu lubeka lwe ngaaki, shishatubaasibwamo ni buroonzi?

¹³Ikhaakabakile babaandu babaandi bye buyiindifu byeenywe, ni bibiindu bibiindi bye lisuno byeesi muli nabyo, lwekhuuba inywe mwakhalawo khukhwoneka buli aandu oosi mu linaambo lyeenywe.

¹⁴Ise ikhaabeekyelise inywe khuuba baakulwa be baasiku beenywe, babareere mu shibala she aleeyi abe sheesi mukhaamanyatsakakho ta. Shikhaabe shiryo lwe lirima lyase liikali, nio kumulilo kulilibe kukukhasima ta biilo ni biilo.

¹⁵Nio nase nelamwo ndi, “O Umukasya, iwe waamanya. Ikhuloomba ndi ushebulile ise luundi unjeete. Ingana iwe wiliyaase baasiku babaangubyeenga ise. Ukhayila imbuka indeeyi shaakila waandusawo ta, shimanye uri ise ndi khubonabona bino byoosi lwe lisiina lyoowo.

¹⁶Iwe niwaamba ise biilomo byoowo, ise nabyakaanila, naabiloondelela buulayi, biryo biilomo byeene byekyela kumwikhoyo kwe kumwoyo kwase. Lwekhuuba ise naalaangibwa lisiina lyoowo, iwe Umukasya Wele uwe kamahe, umunyali wa byoosi.

¹⁷Ise sinatsyakho mu bifwo bye kimikhoyo khukhwikhala ni babaandu babaali mu mikhoyo kyeene, namwe bari nase nasangaala ni nabo ta. Iseese nekhala awo senyene, lwekhuuba kumukhono kwoowo kwaba khusiise, lwekhuuba iwe waba nga waantsitsusile ise ni khuukhalala khuukali.

¹⁸Shiina kila butsiina bwase buli khukhwiloosela, ni likoontsyo lyeesi indi nalyo lyaaba libalaaha nga siliwona ta? Iwe ukana khuuba nga isebele iyooma busa yalekha khurubura kameetsi ta?”

¹⁹Khulwe lomo yino Umukasya naye welamwo ari, “Iwe siinga ushuukha webiyiisa, ise kane ikhukobose ikhwikyelise bushaakha, nio unyalise khukhuuntsakaanisa ise. Iwe siinga ukanikha biilomo biilayi bibikhali bye bumoyaani ta, kane indyo ikhwikyelise iwe khuuba umukanikhi we biilomo byase. Babaandu bano bakhaashuukhe beetse is'uli, ne iwe s'uli niye ukhaatsye isi bali ta.

²⁰Lwekhuuba ise ndi khuukhuwaangasa iwe ufwaane busa nga lumako lwa buroonzi. Babaandu bano bakheetse bakhusoolanise iwe, ne sibakhaanyale khuukhufuura na khakyeekhe khoosi ta. Lwekhuuba ise ndi atweela ni nawe, khuukhumusa ni khuukhuwonesa iwe.

²¹Ikhaakhuwonese iwe khukhwaama mu mukhono kwe baabi, ikhukaangulule khukhwaama mu bunyala bwe babaandu baarafu abo. Shino ise Umukasya samweene niye ushilaangilile ndyo.”