Read lumasaaba Yeremiya 16 Bible Online

Yeremiya 16 - lumasaaba bible

Yeremiya 16

¹Luundi ndi Ilomo y'Omukasya yeetsa isiindi nga inomela iri,

²“Iwe ukhayila umukhasi, naluundi ukhasaalakho babaana besiinde namwe bakhaana, mu shifwo shishifwaana shiri ta.

³Lwekhuuba ise Umukasya intsya khukhuboolela iwe shishiitsya khuwaamba khu baana besiinde ni bakhaana babasaalikhila mu shifwo shino, ni shishiitsya khuwaamba khu ba maayi babasaala babaana bano, ni khu ba paapa baabwe.

⁴Boosi bakhaafwe lwe buulwaale buubi naabi. Mbaawo umuundu na mutweela ukhaabalilile, namwe bari abasiikhe ta, ne kimilaambo kyaabwe kikhaafwaane busa nga kamasiisye ke tsikhaafu khu kyeewa. Babeene bano bakhaahele lwe buusoolo ni ntsala ingali. Kiryo kimilaambo kyaabwe kikhekyele bye khuulya isi binywiinywi bye mu ngaaki, ni tsisolo tse mwirome.”

⁵Lwekhuuba sheesi ise Umukasya ikhulomela iwe nisho shino: “Ukhatsya wenjila muntsu isi bali khuulilila umuundu ufwiile ta. Ukhatsya khuuliilisa namwe khuusaasila umuundu yeesi ta. Lwekhuuba ise samweene naabenyusilekho tsikhabi tsase, naabarusilekho khuukana khwase, naluundi singene imbokesanise shiisa ni khuusaasila khwase ta.” Bino Umukasya umweene niye ubikuukuula aryo.

⁶“Babaandu be angaaki ni be aasi beene boosi, batsya khufwiila mu shibala shino. Ne nga sikhaabewo umuundu yeesi ukhaabasiikhe namwe ukhaatsye khukoma ta. Mbaawo na mutweela ukhekhalake atsaate kamafuki lwe kumutaambo, namwe abewo ubekakho litsuune lyeewe ta.

⁷Mbaawo umuundu na mutweela uliwakho biilyo, namwe she khuunywa lwe khubeesabeesa abo babaali mu mutaambo kwe khuufwiilwa ta. Naluundi mbaawo na mutweela ukhokyesanise shiisa, abe yakhaba isi umuundu ufwisile paapa namwe maayi ta.

⁸“Namwe ukhatsya wenjila mu ntsu isi babaandu balikho baliila kamayiiya, waatsya wekhala aasi waalya, luundi waanywa ni nabo ta.

⁹Lwekhuuba sheesi ise Umukasya Wele wa Isiraeli umunyali wa byoosi inoma nisho shino: Ikhaasilise kamakono ke kumwikhoyo ni sangaalo mu shifwo shino. Naluundi isilise ni kamakono k'omweeha n'umuseetsa weewe khu mbuka iye bukhwaale. Bino byoosi bikhaakholikhe khu mbuka yoowo nga iwe ushiili umulamu.

¹⁰“Ne siinga bano beetsa khukhureeba iwe bireebo bari, ‘Lwashiina Umukasya alaangilile bitsubo bino byoosi khuukhwiitsila ifwe? Ifwe khwakholile shiibi shiina? Shonako shiina sheesi ifwe khukholile khu Umukasya Wele weefwe?’

¹¹Lwanyuma nawe ubeelemwo uri, ‘Lwekhuuba bakuuka beenywe bantsawukhakho baatsya mu ntsila tsaabwe tsitsiindi, baatsya besaaya luundi bakaanisa ba wele babaandi. Nibo baandura khusiise, baaloba khuuloondelela kamakaambila kaase ta.

¹²Ne inywe mwakhola bubwoonaki buukali khufuurakho ni bakuuka beenywe. Lola mubone buli mutweela khusiinywe nga n'ali khuukhola bye shikili, ni buubi buukali mu mwoyo kweewe, mu shifwo she khuuloondelela kamakaambila kaase.

¹³Ni nashiryo, ise intsya khubarusa khukhwaama mu shibala shino, intsye imbakholowe mu shibala shishiindi mweesi inywe, namwe bakuuka beenywe bakhamanyatsakakho na khari ta. Nio ibweene iyo munyalise khukhwisaaya ba wele babaandi kumuusi ni mu shilo, ni nase indyo sikhaabokesanisekho shiisa shoosi ta.’ ”

¹⁴Umukasya ashilaangilila ari, “Ne bonakho, bifukhu bitsya khwoola, isi babaandu bakhaalekhe khukhwiitsuba mu lisiina lyase bari, ‘Nga Umukasya uwarusa babaandu ba Isiraeli khukhwaama mu shibala she Misiri ta.’

¹⁵Ne nibo balitsuba mu lisiina lyase bari, ‘Nga Umukasya uwarusa babaandu ba Isiraeli khukhwaama mu shibala she ngaaki, ni khukhwaama mu bibala bibiindi abe isi aabasalanisila.’ Lwekhuuba ise intsya khubakobosa mu shibala shaabwe shisheene, sheesi ise Umukasya nawa bakuuka baabwe.”

¹⁶Umukasya ndi ashilaangilila ari, “Intsya khurumanisa balobi be tsinyeeni baakali beetse nio bawaambise babaandu bano. Lwanyuma lwaabo, itsya khurumanisa bayiifwi be tsisolo baakali, nio beetse babayiime khu buli lukiingi, ni khu buli lukoongo, ni mu buli lufwa lwe mu mabaale lwoosi.

¹⁷Lwekhuuba ise imbona buli shiindu shoosi sheesi nibo bakhola. Mbaawo shishiindu na shitweela shishinyala shebisa tsimoni tsase ta. Mbaawo ni bibyoonako byaabwe na shitweela shisinyala shaantsibisakho nakhari ta.

¹⁸Ikhaabawe shitaambiso she kimiluundi kibili lwe bubwoonaki bwaabwe ni buubi byaabwe, lwekhuuba baayikyelisa shiibala shase khuuba shinyaalu, lwe bifwaani bibikhalimwo buulamu bibyafwaana busa nga baafu, baryo betsusa shiibala shase shoosi ni bifwaani bye ba wele babaandi.”

¹⁹Umukasya, iwe niye uwuumba ise kamaani naluundi iwe niye uwuniinda ise, iwe uwuniinda ise mu mbuka iye kumutaambo. Kamanaambo koosi keetsa is'uli, nga kaama buli lubeka lwoosi lwe shiibala, nga kaloma kari, “Mbaawo shishiindu na shitweeela sheesi bakuuka beefwe baaba nasho, akhali bifwaani bye ba wele babaandi byonyene. Byaba bifwaani abe bibikhanyala byaabakholela shishiindu shiilayi na khafwiiti khoosi ta.

²⁰Manya umuundu anyala wekholelayo ba wele beewe umweene? Anyala, ne ba wele bano sibali ba wele ta!”

²¹Kila Umukasya aloma ari, “Ninashiryo ise intsya khubaleekela bibiwaamba khu bunyala bwase, ni kamaani kaase. Nibo bakhaashimanyile ilala bari lisiina lyase ise niye Umukasya.”