Read lumasaaba Yeremiya 17 Bible Online

Yeremiya 17 - lumasaaba bible

Yeremiya 17

¹Umukasya aloma ari, “Bubwoonaki bwe babaandu ba Yuda bwaaronebwa ni kalaamu iye shishuuma, bwaaronebwa khu myoyo kyaabwe nga n'ubona umuundu n'araambisa shishuuma khuurona khwibaale, lwanyuma baalisuunga khu ntsika tse shisheeso.

²Ni babaana baabwe babeelawo batsya nga besaayila khu byeeso byaabwe byeene, naluundi bashebulila kimirongoolo kya wele Ashera, kikiili aambi ni kimisaala kikyasyebeleela ni kamasaafu, kikiili khu buli lukoongo,

³ni na buli lukiingi lwoosi luluuli mu shibala. Indyo kane imbukule bye buyiindifu bweenywe, ni bibiindu byeenywe bye lisuno imbikabile baasiku beenywe, bibe nga she khukhwiiliyaasa lwe bubwoonaki bweenywe bweesi mwakhola mu shibala shoosi.

⁴Inywe mwabeene mukhaalekhuule bibiindu bye buusikha bweenywe byeesi ise nabawa. Ise ikhaabekyelise inywe khuuba baakulwa be baasiku beenywe mu shibala sheesi abe mukhaamanyatsakakho ta. Shikhaabe shiryo lwekhuuba inywe mwabeene mwatuluule lirima lyase, nashiryo kane lyaburukhe nga shilyakama ta.”

⁵Umukasya aloma ari, “Atsubibwe umuundu yeesi uwundura khusiise Umukasya, waatsya weyikina umuundu washeewe.

⁶Umuundu ufwaana aryo ali busa nga shitsakha shishatsowa mu mubiimbi, mu liloba lye kumuunyu, mu mukhatsowamwo shishiindu shoosi ta, naluundi mumukhalimwo babaandu ta. Mbaawo shishiindu shiilayi shishikholikha isi umuundu uyo ta.”

⁷Umukasya waaloma luundi ari, “Ne ikhaawe tsikhabi isi umuundu uwiyikina Umukasya, umuundu ura kumwiyikino kweewe mu niye.

⁸Umuundu ufwaana aryo ali busa nga kuusaala kukwabyaalibwa aambi ni kameetsi, kukukyeesa tsiindi tsakwo tsaatsya tsoola ni khu meetsi. Mu shifwo nga isho mbaawo khuurya khwoosi ta abe yakhaba nga bukhafu bweetsile, kamasaafu ke kuusaala ukwo karama busa mu raangi yako. Umuundu uyo s'abakho ni buuri bwoosi mu biseela bye shimiyu ta. Niye eloosela busa khukhwaanisa kamatuunda.”

⁹“Kumwoyo kw'omuundu kuli kumuwombesi khufuura bibiindu byoosi, mbaawo shishinyala shakuwonesa na khari ta. Ne manya iliwo umuundu unyala waamanya bibiindu bibiili mu mwoyo mukari?

¹⁰Iseese Umukasya, imeentselesa mu mwoyo, nemenieelesa bibiili mu byambaaso, nio naasasula buli muundu khuusiintsiila khu saambo tseewe, ni khuusiintsiila buraambi bweesi buli mutweela akhola.”

¹¹Umuundu yeesi uyiindila nga araambisa tsisaambo tse bulyakhani, ali busa nga khanywiinywi khakhalulisa kamaki keesi kheeba busa. Ne lwanyuma nga umuundu uyo ashikhoyela mu bulamu buno, buyiindifu tsana bwataamuukha bwamururakho, khu ntsakamo wekyela she busilu busa.

¹²Shitsoloŋo shoowo, Umukasya, shishareebwa angaaki luukali khukhwaama makiboole, nilyo Lisaayilo lyeefwe Likhulu.

¹³Umukasya, iwe niye kumwiyikino kwa Isiraeli, ni naabo boosi babaakhurura khwiiwe bakhawaambisibwe tsisoni. Abo boosi babaatitukha baarura khusiiwe, bakhaakoraanewo bafwaane nga babaaronebwa mwifukhulu lilikyelawo lyataamuukha basyaangukha. Lwekhuuba nibo baantsukha baarura khu Mukasya, uuli luluutsi lwe kameetsi kamalamu.

¹⁴N'ungaange, O Umukasya, ni nase kane imbe buulayi, n'umbonese, ni nase kane imbonele ilala. Iweewe niye isi ise imbuyila naabi.

¹⁵Babaandu bekhala baanomela ise bari, “Ilomo ya Wele ili waheena? Lekha yiitse yoolelele khubone!”

¹⁶Umukasya ise naakhukhulobelakho ndi usiindikhe buubi isi babaandu ta, namwe naakhwiikhalakho aasi na lutweela nekoomba ndi khali buwaangafu bwiitsile ta. Umukasya iwe shino waashimanya buulayi busa, buli sheesi inganikha khukhwaama mu khanwa mwase iwe waashimanya.

¹⁷Iweewe ukhaba she khuriisaka isi ise; iwe uli bubwilukhilo bwase mu biseela bye bikosi.

¹⁸Lekha abo boosi babaangubyeenga ise bawaambisibwe tsisoni, ne ukhaambila ise mu khuswaala ta. N'ubeetsuse nibo ni khuurya khuukali, ne ukhaandisaka ise ta. Reera buukosi khu nibo, ubahesele ilala ni khuuhela khwe kamaani kameene.

¹⁹Umukasya waanomela luundi ari, “Tsya wiimikhe mu shilibwa she babaandu, nga nimwo mweesi bayiinga ba Yuda benjilila luundi nga nimwo mweesi barurira. Lwanyuma utsye wiimikhe ni mu bilibwa bibiindi bye mu Yerusalemu.

²⁰Uboolele bayiinga boosi, atweela ni babaandu boosi babaamenya mu Yerusalemu babenjilila mu bilibwa bino khukhwinjila mu shiriimba.

²¹Ubalomele uri sheesi Umukasya aloma nisho shino: Siinga babaandu bano baba nga bakana naabi buulamu bwaabwe, bakhasutakho shishiindu shoosi khu shifukhu sha Sabato, namwe bari beetse bashibirisile mu bilibwa bya Yerusalemu bino ta.

²²Namwe ndi mukhasutakho shisutwa shoosi khukhwaama mu ntsu tseenywe, oba khuukholakho kumulimo kwoosi khu shifukhu sha sabato ta. Babaandu baakha khuuliinda shifukhu shino nga shifukhu shikhosefu, nga ninalakila bakuuka baabwe.

²³Ne shonyene ndi, bakuuka baabwe abo sibaakana khuuwulila namwe khuutsila khu nibyo ta. Nibo baaba babaandu be kimirwe kimiboofu, nga sibakana khuuwulila namwe khuuloondelela byeesi imbaleekela ta.”

²⁴Umukasya waashikuukuula ari, “Ne siinga inywe murekeeresa buulayi, mwalekha khubirisila shisutwa shoosi mu shilibwa shino khu shifukhu sha sabato, mwaaba nga muliinda shifukhu isho khuuba shikhosefu, mwalekha khukholelakho kumulimo kwoosi ta,

²⁵baryo bayiinga babekhala khu shitsoloŋo sha kuuka waabwe Dawudi, bakheetse benjilile mu shilibwa shino atweela ni baakhulu baabwe babaandi. Baryo bayiinga abo ni baakhulu baabwe babaandi, bakheetse nga bakyeendela khu makaari ni tsiŋwaaŋwa, nga babaandu ba Yuda boosi, atweela ni naabo boosi babaamenya mu Yerusalemu babaaloondilekho. Ni shiriimba shino shikhaabemwo babaandu baakali biilo ni biilo.

²⁶Babaandu bakheetse nga baama mu biriimba bya Yuda, ni mu byaalo bibibotokheleele Yerusalemu; bakheetse nga baama mu shaalo sha Benyamini shoosi, ni khukhwaama mu Shefela, ni mu shibala she tsingoongo, ni khukhwaama khu luwaande lwa Negevu. Bakheetse nga bareera biwaanwa bibyooshe ni tsisaayilo, ni biwaanwa bye biilyo bibuluungule, ni bubaani, ni biwaanwa bye khusiima mu ntsu y'Omukasya.

²⁷Ne siinga mulekha khuwuliilisa ni khuliinda shifukhu sha Sabato nga shikhosefu ta, nga mwiitsa mwasutile bisutwa khuubirira mu bilibwa bya Yerusalemu bino khu shifukhu sha Sabato, mumanye muri ise intsya khubawaambisila kumulilo mu bilibwa bya Yerusalemu byeene, kukukhooshe kumalewo ni tsimako tsasho tsoosi, ilekhe khubawo umuundu unyala khuukusimisa ta.”