Read lumasaaba Yeremiya 18 Bible Online

Yeremiya 18 - lumasaaba bible

Yeremiya 18

¹Yino niyo ilomo y'Omukasya iyeetsa isi Yeremiya, nga iloma iri,

²“Yinyukha utsye khu ntsu iy'omubuumbi. Nga woolileyo, indyo kane ikhuboolele biilomo bye khuukanikha.”

³Indyo nase nenyukha naatsya khu ntsu iy'omubuumbi, noolayo naamunyoola nga ali khuuraamba khu shibaawo khweesi abuumbila.

⁴Ne inyuungu isi aaba nga ali khuubuumba khukhwaama mu liloba, yaalekha khwaamamwo nga niye n'akikana ibe ta, aryo waakikhupaka, waakibuumbamwo shishiindu shishiindi, nga khuusiima khweewe ni khwaba.

⁵Kila Umukasya anomela ari,

⁶“Inywe babaandu ba Isiraeli, mwambaasa muri ise sinyala naabakhola nga umubuumbi yuno n'akholile liloba ilyo ta? Nga liloba ni lili mu mukhono kw'omubuumbi, nanywe muryo, babaandu ba Isiraeli, nga ni muli mu mukhono kwase.

⁷Siinga imbuka yoola naalaangilila ndi intsya khukhuulaka linaambo, namwe buyiinga, indifuniaakake luundi indihesele ilala,

⁸ne linaambo lyeesi inganikhilekho ilyo lyaatsya lyebiyiisa buubi bwalyo, indyo nase kane nikhupe mu shifuba, indekhe khureera buusiku abe bweesi nambaasile ndi intsya khureera ta.

⁹Ne khu mbuka ikiindi siinga ise inaangilila ndi linaambo namwe buyiinga litsya khwombakhibwa, luundi libe lye kamaani,

¹⁰ne linaambo tsana ilyo lyaatsya lyaakhola buubi mu moni tsase, nga sibarekeeresa likono lyase ta, ise sinyala naabakholela biilayi abe byeesi nambaasile ndi intsya khubakholela ta.

¹¹“Ni nashiryo khu mbuka yino, tsya uboolele babaandu ba Yuda, ni naabo boosi babaamenya mu Yerusalemu, ubalomele uri, ‘Iseese Umukasya indi khuutsya khubareerera buukosi, naluundi indi khukhwiŋoonaŋoona khuubareerera shitaambiso. Tsya ubaboolele nibo, baakamise buubi bwaabwe bashuukhe bakobole isiindi, buli mutweela khu nibo, baŋoone tsintsila tsaabwe, ni buraambi bwaabwe bweesi bakhola.’

¹²Ne nibo kane bakhwiilemwo bari, ‘Isho sishinakhuyeeta ifwe ta! Kane khwiloosele khuumenya musaambo isi khubeele khukhola, buli mutweela kane akhole nga shikili ni bumiinyi bubuuli mu mwoyo kweewe ni buli.’ ”

¹³Sheesi Umukasya aloma nisho shino: “Nimutsye mureebe mu manaambo koosi, mubone oba nga iliwo shiibi na shitweela shishifwaana shiri shishakholekhakho. Babaandu ba Isiraeli bakholile shiibi shishifuurayo buubi.

¹⁴Manya kamabaale ke mu lukiingi Lebanooni kaawatsakakho kamararara? Manya kameetsi kaamwo kamanyifu kaayakamakho khukhwiikha?

¹⁵Ne bona babaandu baase baayintsibilila ise, batsya bookha bubaani isi bifwaani, shishakila nibo baamoyaanila mu ntsila abe isi bali ni khuutsyamwo, sibashiloondelela kimikhoosi kye khaale ta. Nibo baatsya khukyeendela mu buyila bukyeekhe, ni khu mikhoosi kikikhali kimiŋoone buulayi ta.

¹⁶Baryo bekyelisile shiibala shaabwe khuuba shishonekha, khuuba shiibala she khuleekelesa biilo ni biilo. Buli muundu yeesi ubirawo eyaanga, waasisiikha busa kumurwe kweewe.

¹⁷Indyo ise ikhaasalanise babaandu baase isi baasiku baabwe, bafwaane nga imbewo iyaama ibwaamanyaanga nitaamuusa lifukhuulu. Khu shifukhu she kumutaambo isho, ikhaashuukhe imbakhupe kumukoongo, balekhe khubonakho mu moni mwase ta.”

¹⁸Kila babaandu belomela babeene bonyene bari, “Nimwiitse khukhole Yeremiya buubi; lwekhuuba khuuboolelela khwe basaayi khuukhuwaamba khu makaambila nikhwo khukhaatsye mu moni, ni khuuleekela khukhwaama isi be kamakyesi sikhukhaawewo ta, ni ilomo iyaama isi baŋoosi ikhaaramewo. Nashiryo yiitsa khumukwekho khumutyaabile kamalomo, naluundi khulekhe khurekeeresa byeesi aloma ta.”

¹⁹Kila nase inoomba ndi, “O Umukasya, ikhuloomba iwe uwulile byeesi inoomba, urekeerese byeesi baasiku baase banganikhakho.

²⁰Umuundu anyala waasasula buubi lwe buulayi? Ne ari bona nibo bayabile lilowo bari ise ingwemo. Ikhuloomba ushebulile isaambo isi ise nemikha naabakanikhilila nibo naabi, nio iwe walekha khubakholakho buubi bwoosi ta.

²¹Ni nashiryo ari ise ndi khuloomba ndi babaana baabwe beeribwe lwe ntsala ingali, ni babaandi beeribwile mu busoolo. Lekha bakyelama baabwe barame bakuumba luundi babe banamulekhwa. Khali basaani bafwiile lwe buulwaale buubi naabi, ni bahele bafwiila mu busoolo.

²²Isaambo isi babaandu bano bayabile kamalowo bari ise ingwemo, naluundi bandekela ise kimireko, Umukasya khali ubakholile baantsuwa luukali, ni liyoombo liwulilikha khukhwaama mu ntsu tsaabwe, nga iwe waabareerere nibo baasiku khukhwiitsa khuubebwakala.

²³Ne iwe, O Umukasya, waamanya nga nibo baakhalila ise tsimbomelo tsye khukhuuntsira. Ni nashiryo, iwe ukhabeyakhila nibo buubi buno ta, namwe wasyaangula bibyoonako byaabwe ta. Balekhe bawulibwe bakwe aasi iyo, iwe wamweene n'ubakholekho nga ushiili ni lirima liikali.”