Read lumasaaba Yeremiya 19 Bible Online

Yeremiya 19 - lumasaaba bible

Yeremiya 19

¹Umukasya waanomela ise Yeremiya ari niinyukhe intsye ingule inyuungu isi baakhola khukhwaama mu liloba lye tsinyuungu. Waanomela intsyekho ni baasakhulu be babaandu atweela ni basaayi baakhulu,

²khutsye mu Litila lya Beni Hinomu, liliili aambi ni shilibwa sha Potihadi. Ibweeneyo, imbekho ni biilomo bye khuukanikha.

³Kila amboolela biilomo bye khuuboolela babaandu bano ndi, “Inywe bayiinga ba Yuda atweela ni babaandu be mu Yerusalemu mweesi, ni muwuliilise Ilomo isi ise Umukasya Wele wa Isiraeli, Umunyali wa byoosi, indi khuubaboolela. Ingana mushimanye muri, intsya khubareerera buukosi bukali naabi mu shifwo shino, bweesi buli muundu ukhaashiwulilekho, akhelulukhe busa yeesitsana.

⁴Shino intsya khushikhola khulwekhuuba babaandu baayindura khusiise, bekyelisa shiifwo shino khuuba shinyaalu busa; baryo bookhela ba wele babaandi tsisaayilo; shishiindu abe sheesi nibo, namwe bakuuka baabwe, namwe bayiinga ba Yuda, bakhaamanyatsakakho nakhari ta. Baayonakisa shiifwo shoosi nga bashisalaasamwo kamafuki ke babaandu babaakhalikho ni kumusaango ta.

⁵Baryo baayombakhila wele Bayaali bibyeeso, bari nio bookhelekho babaana baabwe besiinde khu mulilo, khuuba nga tsisaayilo tsintsoshe. Shino shili shishiindu sheesi ise ikhaabalakilakho, namwe naakanikhakho ta. Naluundi naakhwambaasatsakakho shishiindu abe shishifwaana shiryo nakhari ta.

⁶Nashiryo mwirekekhe, ise Umukasya samweene indi khuushilaangilila ndi, imbuka itsya khwoola, isi babaandu bakhalilayo luundi khuulaanga shiifwo shino bari Tofesi, namwe bari Litila lya Beni Hinomu ta. Ne bakhaalilaange busa bari Litila lye Lukhoonyo!

⁷Naluundi mu shifwo shino ikhoonakise tsiŋoonaŋoona tse babaandu ba Yuda ni be mu Yerusalemu tsoosi. Samweene ikhaakile baasiku baabwe babafuure, luundi babaakhoonyake ni tsiindima mu busoolo, baryo bakwe mu makhono kaabo babaaweentsa khuuhesa buulamu bwaabwe. Musaambo iyo, ikhaakabile kimilaambo kyaabwe khuuba bye khuulya isi binywiinywi bye mu ngaaki, ni isi tsisolo tse mwirome.

⁸Intsya khwikyelisa shiriimba shino khuuba shishiindu she khukhwiyaanga busa, luundi she khukhwiilulukha, isi buli muundu yeesi ukhaabirewo ashilolekho, lwe bikosi bibikhaabe nga byashiitsiile.

⁹Naluundi baasiku bakhebotokhelele shiriimba shoosi, bakhakekho khuukhoonya buli muundu yeesi ushilimwo, ibewo kumutaambo kumukali naabi. Lwanyuma bye khuulya abe byeesi baabuunga biwewo. Iryo intsala ikhaabe ngali naabi, shikile babaandu bashuukhe balye babaana baabwe besiinde ni bekhaana, batsye balye ni babesanwa baabwe beene.”

¹⁰Nio lwanyuma lweebyo, Umukasya waalakila Yeremiya ari akhupe aasi inyuungu tsana yaatikhe, nga buli muundu yeesi uliwo waaloleleele.

¹¹Umukasya Umunyali wa byoosi waamulomela abalooselekho ari, “Ikhaatise linaambo lino atweela ni shiriimba shino, nga nimuboone inyuungu yino iyabuumbibwa khukhwaama mu liloba ni yaatikhile, ilekhe khubawo umuundu unyala waalikobosawo luundi ta. Babaandu bakhaasikhake baafu baabwe mu Tofesi, lwekhuuba silibawo shiifwo shishiindi shishikhaaramewo khuusiikhamwo baafu ta.

¹²Ise Umukasya indi khuushikanikha lubuula ndi, ikhaakhole linaambo lino ni shiriimba shino, ni babaandu baamwo, shifwaane nga Tofesi.

¹³Tsiintsu tse mu Yerusalemu, ni tsiintsu tse bayiinga ba Yuda, atweela ni tsiintsu tsoosi tseesi bookhelakho bubaani isi tsinieenieesi khu bisuli byatso, naluundi ni aandu oosi isi babaandu baaweelayo biwaanwa isi ba wele babaandi, bino byoosi bikheekyele binyaalu bifwaane nga shiifwo Tofesi ni shekyela shinyaalu.”

¹⁴Lwanyuma Yeremiya waarurayo i Tofesi, shiifwo mweesi Umukasya aamurumana khuutsya alaangilile buurume buno, waatsya wemikha mukari mu Lisaayilo Likhosefu ly'Omukasya, waaboolela babaandu ari,

¹⁵“Sheesi Umukasya Umunyali wa byoosi, Wele wa Isiraeli aloma nisho shino: ‘Ni murekereese buulayi bubweene! Indi khuutsya khureera khu shiriimba shino, ni khu byaalo byasho byoosi bibibotokheleelewo, bukosi bwoosi bweesi naloma ndi intsya khureera. Shikhaabe shiryo lwekhuuba inywe muli babaandu be kimirwe kimiboofu, nga shimukana mwarekeeresa byeesi ise imbaboolela ta.’ ”