Read lumasaaba Yeremiya 2 Bible Online

Yeremiya 2 - lumasaaba bible

Yeremiya 2

¹Ilomo y'Omukasya yaantsitsila nga anomela ise

²khuutsya inaangilile buurume bweewe nga babaandu boosi be mu Yerusalemu baawuliile, nga imbalomela byeesi Umukasya aloma ndi, “Ise ishebulila naabi khukhwiiwaanayo khuukali khweesi waba nakhwo mu busooleli bwoowo, nga niwaba ni khuukana khuukali naabi nga khw'omweeha, nga niwatsya nga unoondakho mu mubiimbi, mu shibala shishikhalimwo biilime bibyaale ta.

³Babaandu be mu Isiraeli baaba bakhosefu isi Umukasya nga kamatuunda keewe kamakiboole ke likyesa. Waakhalila buli muundu yeesi uwakalyakho kumusaango, waabareerakho bukosi buukali.” Bino Umukasya umweene niye ubikanikha.

⁴Inywe babetsukhulu ba Yakobo, ni muwuliilise buulayi Ilomo y'Omukasya, inywe bikuuka byoosi bye ntsu ya Isiraeli.

⁵Sheesi Umukasya aloma nisho shino: “Shibi shiina sheesi ise nakhola sheesi bakuuka beenywe baambonamwo ise, shaakila baaborokha baandurakho khusiise? Baryo baatsya baaloondelela bibiindu bibikhalimwo ta, nabo babeene bekyela shishikhalimwo ta.

⁶Nibo sibereebakho bari, ‘Ne Umukasya uwakhurusa ifwe mu shibala she Misiri ali waheena, umweene uwakhuraangilila ifwe mu mubiimbi, shiibala shishoomu nga mwaayitsulamwo bitiimbwa, shibala she kumuumu kumukali atweela ni shishilima, naluundi shibala abe sheesi umuundu yeesi akhanyala waabiramwo, namwe umuundu yeesi khuumenyamwo ta?’

⁷Ise samweene nabareera mu shibala shisheetsulamwo bye khuulima, nio mwikhoyele khu matuunda kakaakyesebwamwo kamakali atweela ni bibiindu byamwo bibiili biilayi. Ne inywe nga nimwenjilamwo, mwekyelisa shibala shase khuuba she mbikho, muryo mwashikyelisa busikha bwe mbikho busa.

⁸Basaayi nabo sibaareebakho bari, ‘Ne Umukasya ali waheena ta.’ Abo boosi babaakhola khu bye khuuleekela kamakaambila abe sibashimanyakho ise ta; baaraangilisi baaminyaalila ise samweene. Baŋoosi baatsya baŋoola bya Bayaali, baryo baaloondelela bifwaani bibiikhalimwo kumukaso ta.

⁹Ni nashiryo, ise Umukasya samweene, indi khuutsya khubakhalila kumusaango luundi. Ikhaakhalile ni babaana be babaana beenywe kimisaango nikyo mitweela.

¹⁰Ari khalisa waambukhe utsye khu shikelemeesi she Sayipuraasi, utsye ubone, naluundi rumanisa umuundu atsye i Kedari, atsye emenielese buulayi, abone oba nga iliyo shishiindu shoosi shishifwaana shiri shishakholekhayo.

¹¹Manya yaabatsakayo linaambo lyoosi lilyashuukhaanisakho ba wele baalyo, abe yakhaba nga ilala sibali ba wele na khakyeekhe ta? Ne bona babaandu baase bashuukhanisa shiriifwa sha Wele waabwe lwe khuukana bifwaani bibiikhalimwo kumukaso ta.

¹²Ari khayo likulu lyoosi litengaale lwa shino, liryo linikine lwe khuurya khwe kamaani naabi.” Bino Umukasya umweene niye ubikuukuula.

¹³“Babaandu baase baakholile bibyoonako bibili: Nibo baandurirekho khusiise, baandekhile ise isebele inyene iye kameetsi kamalamu, baryo baatsya beyabila babeene kamalowo ke tsisebele, ate nga tsisebele tseene tsaakubukhaka busa, nga sitsitembelelamwo kameetsi ta.

¹⁴Babaandu ba Isiraeli sibali baabowe ta, naluundi sibaasaalikha baryo ta. Ne ari lwashiina baasiku baabwe babaweentsa khuubahesa?

¹⁵Baasiku abo ari babuutsa busa nga tsitalanyi nga baweentsa babaandu baase. Baryo ari baayikyelisa shibala shaabwe khuuba busa nga kumubiimbi, ni biriimba byoosi byaayikyela kamakubili busa, nga mbaamwo babaandu babanyala khuumenyamwo ta.

¹⁶Ni babaandu babaama i Menfisi, ni babaandi khukhwaama i Tapanesi baayarakaka bihaanga bye kimirwe kyeenywe.

¹⁷Inywe babaandu ba Isiraeli, siili inywe mwabeene mumwireerirekho biikosi bino ta! Lwekhuuba inywe mwaloba khukhuunoondelela ise Umukasya Wele weenywe, ni naba nga imbaraangilila mu ntsila.

¹⁸Ari lwashiina muwaamba lukyeendo lwe khuutsya i Misiri, nga mukana mutsye munywe kameetsi mu luutsi Nayilo? Namwe lwashiina mukhalawo khuutsya kwe Asiriya, bari mutsye munywe kameetsi mu luutsi Efurati?

¹⁹Bubwoonaki bweenywe bubweene butsya khubawa inywe shitaambiso. Ni khukhuundurakho khweesi mwaandurakho khusiise, khutsya khubakholisa shiisa naabi. Ni mwimenielese luundi mushimanye buulayi muri, shiri she kumutaambo ni butsiina buukali inywe khukhuundura khusiise Umukasya Wele weenywe, muryo mwaaba nga simulimo ni khuuryakho lisiina lyase ta. Shino ise samweene Umukasya Wele uwe kamahe, Umunyali wa byoosi niye ubilomile.”

²⁰Umukasya aloma ari, “Khaalekho inywe mwakhalawo mwaafuniaaka butweela bubwakhutubaasa ifwe, ise ni nanywe, mwakhalawo khuutsya khulweenywe busa; mwaatsya mwelomela muri simukane muntsakaanise ise ta. Ilala khu buli lukoongo, ni na buli aasi e kuusaala kukuulikho kamasaafu kwoosi, mwaatsya mwaakona aasi nga mwisaaya ba wele nga bamalaaya.

²¹Ate nga ise nababyaala inywe nga kuusaala kumusabibu kukuufuurayo buulayi bubweene, naluundi imiitso imiliwu naabi. Ne ari ndi shiitsile shiryeena inywe khukhuushuukhakho, mwoonekha mwekyela busa nga kumusabibu kwe mwirome?

²²Ne ari abe mwakhesiinga nga muraambisa sabuuni ufuurayo kamaani, naluundi umukali arye, kamakoondo ke bubwoonaki bweenywe kashirurukhilila busa mu moni tsase.” Shino Umukasya umweene niye ushikuukuula aryo.

²³Ari inywe munyala muryeena khuuloma muri, Inywe mwakhwiyonakisakho ta; naluundi muri inywe mwakhwisaayakho ba Bayaali ta? Ne nimulole mubone isaambo isi mwebirisamwo mu litila ilyo; mwimenielese buulayi isho sheesi mwakhola. Inywe muli busa nga iŋamila ikhasi ikana khukhwilukha, nga itima eyi ni neeyi, nga ikana tsiseetsa,

²⁴inywe muli busa nga isikilya iye mu bisaala iyamanyiila kumubiimbi, nga itsya iwunyilisa imbewo nga ikana khukhwilukha! Ari nga yafwaanile iryo, naanu unyala waakhingilisa kumuluungo kwayo ukwo? Mbaawo tsiseetsa tsoosi tsitsiinyala tsaatsya nga tsikiloondelela tsaaluwa ta, lwekhuuba khu mbuka inyene iye khuukana khuuhesa, tsikinyoola khaangu naabi.

²⁵Ba Isiraeli, inywe mukhatsya mwatimaka eyi ni neeyi khukhwoolesa bikyele byeenywe byabiimba ta, namwe mwaakila imumilo weenywe yooma ta. Ne buli mutweela khusiinywe aaloma busa ari, Sishilimwo kumukaso khuukobola ta, iseese naakana naabi ba wele banaambo, kane niloosele busa khuubaloondelela.

²⁶Umukasya waaloma luundi ari, “Nga n'ubona umwiifi n'awaambikha tsisoni nga baamuwaambile, baryo babaandu ba Isiraeli boosi nabo bakhaswaale naabi: nibo babeene, ni bayiinga baabwe, ni baawuli babaandi, ni basaayi baabwe, atweela ni baŋoosi baabwe beene.

²⁷Nibo batsya baalomela kuusaala bari, ‘Iwe uli paapa wase,’ ni libaale bari, ‘Iwe niye uwasaala ise.’ Shino shiba shiryo lwekhuuba nibo baayikhupa ise kumukoongo ne baalekha khundolayo ta. Ne imbuka iye buukosi nga yoolile, beetsa baanomela ise tsana bari, ‘Yinyukha ukhuwonese ifwe!’

²⁸Ne ari ba wele beenywe beesi mwabeene mwekholela bali waheena? Ari ni muba nga muli mu bikosi babeene abo baakha beetse babayeete, siinga baba nga nibanyala. Inywe baandu ba Yuda, muli ni ba wele babalekhaana bukali nga biriimba byeesi muli nabyo.”

²⁹Umukasya waareeba ba Isiraeli ari, “Lwashiina inywe muntsiluŋuunya khwiise muri naakhubawonesa ta, ate nga inywe nibo babaaminyaalila ise.

³⁰Ise naakhakakho khuuwa babaandu beenywe shitaambiso, ne mbaawo sheesi shayeeta ta. Inywe mwaraambisa lurima lweenywe khuuhesa baŋoosi baase, nga n'ubona italanyi indafu n'ikhola.

³¹Inywe babaandu be kumuboolo kuno, nimuwuliilise byeesi ise Umukasya indi khuuloma: Ise ari manya naayikyela nga kumubiimbi isi muli, namwe shiibala she shishiilima namukoto? Ne shiina kila ndi inywe babaandu baase, muloma muri kane mukhole nga nimukana, muri singene mukobole isiindi luundi ta?

³²Manya mwabonatsakakho umukhasi uutsya khukhwaalikha uwibilila bubuuma bweewe, namwe umweeha uwibilila bikwaaro byeewe? Ne bona babaandu baase baayintsibilila ise khuumala bifukhu bibikhabalikha ta.

³³Inywe nga muli bakyesi naabi mu khuweentselesa bye khuukana. Abe yakhaba bakhasi babafuurayo buubi, banyala beyikila khu byeesi inywe mukhola.

³⁴Ni khu bikwaaro byeenywe khwanyoolekhanakho kamatoondo ke kamafuki ke babaandu babaali bataambi luundi babaakhalikho ni kumusaango ta, ikhaba nga simwabanyoola baamenyuule kimilyaango kye tsiintsu tseenywe khukhwiibamo shishiindu shoosi ta. Ne abe byakhaba nga bili biryo,

³⁵buli mutweela khwiinywe aloma ari, ‘Ise siindikho ni kumusaango ta; ilala Umukasya s'ashiilikho ni lirima lyoosi khwiise ta.’ Ne ise Umukasya intsya khubakhalila inywe kumusaango lwe khuuloma muri, mwaakhukholakho shiibi shoosi ta.

³⁶Lwashiina inywe mwiyisa aasi naabi khuutsya nga muyukhaanisa tsisaambo tseenywe? Ba Misiri bakhaabakwiise inywe nga ba Asiriya nabo nibaabakhola.

³⁷Muryo mukhaarure khu ba Misiri abo, nga mwaareere kamakhono keenywe khu mirwe kyeenywe, lwekhuuba ise Umukasya, nalobile babaandu beesi inywe mwiyikina abo, mbaawo na shoosi sheesi mulibafunakho ta.”