Read lumasaaba Yeremiya 20 Bible Online

Yeremiya 20 - lumasaaba bible

Yeremiya 20

¹Pashuhuri, umusooleli wa Imeri, nga abe niye umukhulu we bye khukhwiliinda mu Lisaayilo Likhulu, wawulila Yeremiya nga akuukuula buŋoosi buno.

²Aryo wahaamba umuŋoosi Yeremiya waamukhupa tsiinga, lwanyuma waamubowa kiminyololo kikyaba khu shilibwa sha Benyamini she Ngaaki, we Lisaayilo Likhulu ly'Omukasya.

³Ni bwasha kumutikhinyi khu shifukhu shisheelakho, nga Pashuhuri waalekhuulile Yeremiya khukhwaama mu minyololo, kila Yeremiya tsana emikha waamuboolela ari, “Umukasya niye s'ashikhulaanga lisiina lyoowo ari Pashuhuri ta, ne kane akhutwiikhe ari Magori Misabibu[3].

⁴Lwekhuuba sheesi Umukasya aloma nisho shino ndi: ‘Ise intsya khukhwikyelisa iwe shiriisa isi wamweene, ni isi basaale boowo babeene. Nibo bakheeribwile mu busoolo, baasiku baabwe babaakhoonye ni tsiindima nga iwe wamweene waaloleleele uri. Lwanyuma ikhaafukiilise umuyiinga wa Babulooni ayile buli muundu yeesi uwe mu Yuda nga umubowe. Niye akhaabayile nga baabowe, lwanyuma akhoonyakekho baalala, ne babaandi abayile mu bubowe.

⁵Nio indyo imaambise bye buyiindifu bwe shiriimba shino, ni bibiindu bye lisuno bye bayiinga ba Yuda byoosi mu makhono ke baasiku baabwe. Nibo bakhaabinuule byoosi, babisutake babiyile i Babulooni.

⁶Ni nawe Pashuhuri, ni babaandu boosi babaamenya muungo mwoowo, inywe mweesi mukhawaambibwe muyilibwe nga baabowe i Babulooni. Muryo mukhaafwiile ibweene iyo, babasiikhe iyo, iwe atweela ni basaale boowo boosi, nga ni mubeele muboolela babaandu buŋoosi bwe bubeeyi.’ ”

⁷Umukasya, iwe waamombesa ise, ilala indyo naawombesebwa. Iwe uli uwe kamaani khukhufuura ise, nashiryo waayifuurira ilala. Iseese naayikyela sheesi babaandu batsekhelela busa buli mbuka, baanomakila kamalomo kamabi konyene.

⁸Ise buli lweesi ninyusila kumunwa kwase khuukanikha, inaangilila nga ikhupa liyoombo liikali, naaloma ndi, “Bituluungu ni khuhela!” Indyo ise buli mbuka naakhomebwa naluundi naabirisibwa buubi bubweene lwe Lomo yoowo.

⁹Ne buli lweesi ise niyambaasila naaloma ndi, “Singene niileyo luundi imubuule namwe inganikhe mu lisiina ly'Omukasya luundi ta,” Ilomo yoowo iili mu mwoyo kwase, intsokhelela busa mukari, ifwaana nga kumulilo kweesi baasile mu makuumba kaase. Ikhakakho naabi khuubona nga ingisilila, ne shonyene ndi shinyala naasila busa ta.

¹⁰Iseese nawulila baakali nga bemoonyelesa bari, “Shiriisa khu buli luwaande! Ari khakhutsye khumubooleyo isi baawuli, khutsye khumubooleyo!” Ni basaale baase babeene beesi nikhala nabo, baaliindilila babone nga ise naakwiile. Baryo bekhala baloma bari, “Manya lukanile kane akwe mu mureko, nio nafwe khumuwaambe, khuryo khwiliyaase byoosi khu niye.”

¹¹Ne iwe Umukasya, uli ni nase nga umuselikhale uwe kamaani kamakali, ni naabo babaakhakakho khukhuundyamo ise luwomelo kane bakhaasikhe bakwe aasi, balekhe khunyalisa ta. Babeene abo kane bakhaasikhile ilala, shikile baswaale busa. Ni khuswaala khwaabwe khweene ukhwo, mbaawo na mutweela uuli khwibilila ta.

¹²O Umukasya, umunyali wa byoosi, iwe niye ukhaka abo babaakhola bye bukwalaafu, naluundi iwe waamanya byoosi bibiili mu myoyo ni bibyambaaso bya buli mutweela. Ari lekha ise imbone nga iwe niwiliyaasa baasiku baase, lwekhuuba byoosi ise naabiweeleyo is'uli.

¹³Yeembela Umukasya kumweenya! Yeemba khuuruuya Umukasya! Lwekhuuba niye uwonesa buulamu bwaabo babaamiinilisibwa khukhwaama mu makhono ke babaandu baabi.

¹⁴Lekha shifukhu khweesi nasaalibwilakho shitsubibwe! Khali shifukhu khweesi maayi wase asaalilakho shilekhile khuweebwa tsikhabi ta!

¹⁵Lekha shitsubo shikwe khu muundu uweetsa bari areerera paapa wase kamakhuuwa kamalayi ari, “Iwe waafunile umwaana umusiinde!”

¹⁶Khali umuundu uyo afwaanile nga biriimba byeesi Umukasya aahesa nga s'abiwaambilakho shiisa ta. Khali niye awuliile khuulila khwe butsiina kumutikhinyi, ni luwuungu lwe buusoolo mwihangilwe.

¹⁷Lwekhuuba niye s'akhakakho khukhuuntsira ise nga ishiili muunda mwa maayi wase ta. Ifwa khali inda ya maayi wase niyo iyaba iŋani yase.

¹⁸Lwashiina ise nasaalikha khukhwiitsa khu shibala shino? Neetsa khuno ndi nio imbone kumutaambo ni butsiina buno, ni khuumala imbuka yase yoosi nga ndi mu khuswaala khuno khwoosi?