Read lumasaaba Yeremiya 21 Bible Online

Yeremiya 21 - lumasaaba bible

Yeremiya 21

¹Ilomo y'Omukasya yeetsila Yeremiya, khu mbuka isi Zedekiya aarumanila Pashuhuri umusooleli wa Malikiya, atweela n'umusaayi Zefaniya umusooleli wa Maseya. Aabarumana balomele Yeremiya bari,

²“N'ukhwireeberekho isi Umukasya, lwekhuuba umuyiinga Nebukaduneeza uwa Babulooni, alikho akana khukhwiitsa khukhusoolanisa ifwe. Reebakho isi Umukasya, manya lukanile waabakho ni she kamakaanga sheesi anyala waakhukholela ifwe, nga n'akholatsaka khaalekho, nio manya waakhaasisa Nebukaduneeza waakhururakho.”

³Aryo Yeremiya naye weelamwo waabalomela batsye baboolele Zedekiya bari,

⁴“Sheesi Umukasya Wele wa Isiraeli aloma nisho shino ari: Zedekiya, intsya khuraambisa bye busoolo byeesi uli nabyo mu mukhono kwoowo, abe byeesi utsya khuraambisa khuusoolanisa umuyiinga wa Babulooni atweela ni Bakaludaaya, babaali khukhwiitsa khukhwibwakala kamatikiiyi keenywe. Ibyo byoosi intsya khubibuusa atweela mukari mwe shiriimba shino.

⁵Indyo ise samweene ikhaabasoolanise inywe ni kumukhono kwase kweesi intsaanuusile, luundi kwe kamaani, nga indi ni lirima liikali, ni khuukhalala atweela ni buurafu buukali.

⁶Ikhaakhoonye babaandu boosi babaamenya mu shiriimba shino; babaandu boosi atweela ni bisolo byeene, ikhaasiindikhe buulwaale buubi naabi bubahese.

⁷Ne ndi lwanyumakho, ikhaawaaneyo Zedekiya umuyiinga wa Yuda, ni baakhulu be mu lubili lweewe, atweela ni babaandu boosi be mu shiriimba babaakhaawone khuufwa buulwaale, lurima ni ntsala, bayilibwe ni Nebukaduneeza umuyiinga Babulooni, nga ali ni baasiku beenywe, babaakana khuubakhoonya inywe. Niye akhaabakhoonye boosi, nga mbaawo na mutweela isi okyesakho shiisa, namwe khuumuwaambila kumutaambo, namwe khuumusaasila ta. Ise Umukasya samweene niye ulaangiliile bilomo bino.”

⁸Umukasya waalooselakho ari, “Ne isi babaandu bano, baboolele sheesi ise Umukasya indi khuuloma ndi, bonakho, ise ndi khuubareerawo inywe khuukhalawo akari e kumukhoosi kukubayila isi buulamu, ni kukuundi kukubayila isi khuufwa.

⁹Umuundu yeesi ukhalawo khuurama mu shiriimba, bakhaamukhoonye ni lurima, namwe afwe intsala, namwe afwe buulwaale. Ne uyo ukhalawo khuurura ibulafu we shiriimba, wewaanayo isi babaandu ba Babulooni, babaali khukhwiitsa khuubebwakala, akhaaramewo nga umulamu, s'akheeribwe ta, ne akhaatitukhe atsye nga waaliindile buulamu bweewe.

¹⁰Ise neetsile nga naawuniliile tsimoni tsase khu shiriimba shino, ngana khuubakhola buubi ne akhuba buulayi ta. Shiryo shikhaawaanibweyo isi umuyiinga wa Babulooni, ashooshe ni kumulilo. Ise Umukasya samweene niye ukanikhile bilomo bino.”

¹¹Umukasya waalomela luundi Yeremiya ari, “Tsya uboolele babaandu be muungo mw'omuyiinga wa Yuda, nga nibo babetsukhulu ba Dawudi uri,

¹²Inywe babetsukhulu ba Dawudi, wuliilisa sheesi Umukasya ali khuuloma: bona muri ibawo bwaŋali bubukholikha buli shifukhu. Muwonese umuundu abe isi ukuundi amiinilisa naluundi isi batsya khunuulakho bibyeewe. Nashiryo nga abe mwakhukhola muryo ta, buubi bweesi muli khuukhola, kane bukile lirima lyase lyaburukhe busa nga kumulilo kweesi umuundu yeesi akhanyala waasimisa ta.

¹³Iwe Yerusalemu shishikhaale angaaki e Litila, shafwaana nga libaale liboofu lilirurukhiliile khu musaleela, ise samweene naakhwinyukhiile iwe aasi. Iwe wilomela wamweene uri mbaawo umuundu unyala waakhwibwakala iwe ta, namwe weetsa wenjila mukari mu bumenyo bweenywe ta.

¹⁴Ise intsya khubawa inywe shitaambiso khusiintsiila khu byeesi muli khuukhola bibyeene. Intsya khuwaambisa kumulilo kwooshe bisaali byeenywe byoosi, naluundi kane kube kumulilo kukukane kwooshe buli shiindu shoosi shishiili aambi ni nanywe. Iseese Umukasya samweene niye ulaangiliile biilomo bino.”