Read lumasaaba Yeremiya 22 Bible Online

Yeremiya 22 - lumasaaba bible

Yeremiya 22

¹Umukasya waalomela Yeremiya ari, “Yinyukha utsye mu lubili lw'omuyiinga wa Yuda, utsye ukuukuulileyo buurume buno:

²‘Iwe umuyiinga wa Yuda, reekeresa ilomo y'Omukasya, iwe uwikhala khu shitsoloŋo sha Dawudi, iwe wamweene, ni babaakaanisi boowo, atweela ni babaandu boowo boosi babeetsa benjilila mu bilibwa bino.

³Iseese Umukasya indi khukhulakila ndi ukholatsake bibiindu bibiili biilayi luundi bitsalaafu. Uyeete umuundu abe isi balikho balyakhana bibyeewe. Ukhabirisaka buubi abo babaali babeetswa, namwe abo babaakhali ni basaali, namwe banamulekhwa ta, naluundi ukhakhakakho khukhwiirira umuundu yeesi mu shifwo shikhosefu shino ta.

⁴Iweewe siinga ukhola bino byeesi ndi khuukhulakila, bayiinga babaali babetsukhulu ba Dawudi babekhala khu shitsoloŋo sheewe, bakheetse nga bakyeendela khu makari ni khu ŋwaaŋwa, babe nga benjila mu lubili luno, nga babirira mu bilibwa bino.

⁵Ne siinga ulekha khuwuliilisa biilomo byase bino waabitsiilakho ta, ikhwitsubila ndi, lubili luno lukheekyele busa nga likubili. Iseese Umukasya samweene niye ushikukuulile ndyo.’ ”

⁶Lwekhuuba sheesi Umukasya aloma shishiwaamba khu lubili lw'omuyiinga wa Yuda nisho shino ndi: Lubili lw'omuyiinga wa Yuda lwaakhambonekhela buulayi nga Gileyadi, namwe lwaakhafwaananila nga Lukiinji lwa Lebanooni, ne shitweela busa intsya khulukhola lwikyele busa nga likubili, lufwaane busa nga biriimba bibikhalimwo babaandu ta.

⁷Intsya khusiindikha babaandu beetse balwoonakise, nga buli mutweela waabaliile she busoolo sheewe. Baryo baremake kimisaala kimiseda kikifuurayo buulayi, lwanyuma bakituume mu mulilo.

⁸“Lwanyumakho babaandu be kamanaambo kamakali bakhaabe nga babirawo aambi ni shiriimba shino, baryo bareebane bonyene na bonyene bari, ‘Lwashiina Umukasya aakhola shishiindu shishifwaana shiri khu shiriimba she kamaani nga shino?’

⁹Ne she khukhwiilamwo shikhaabe shiri: ‘Lwekhuuba nibo baantsukha Umukasya Wele waabwe, baatsya besaaya luundi bakaanisatsaka ba wele babaandi.’ ”

¹⁰Inywe mukhalilila umuyiinga Yosiya uwafwa ta, namwe mwaaba nga mwiwunamila khu lweewe ta; ne nimwantsuwe ni kamaani keene khulw'omusooleli weewe isi baayila mu bubowe, lwekhuuba s'alinyalisa khuukobola na khafwiiti khoosi ta, namwe bari abonekho luundi khu shibala sheewe sheesi baamusaalilamwo ta.

¹¹Lwekhuuba sheesi Umukasya akanikha shiwaamba khu Yowahazi[4], umusooleli wa Yosiya, uuli niye umuyiinga wa Yuda aluno ari, nga eela mu bikyele bya paapawe nga umuyiinga wa Yuda. Niye ari baamurusilewo, baamuyilile nga umubowe, “S'alikobolakho luundi ano ta.

¹²Mu shibala isi bamuyilile nga umubowe iyo, niyo isi alifwiila. S'alikobola luundi abonekho shibala shino ta.”

¹³Nga kumutaambo kwaamunyoolile uyo uwombekha intsu yeewe nga s'aloondelela bukwalaafu ta! Niye abalaayisa busa lubili lweewe mu bulyakhani, araambisa babaandu be linaambo lyeewe nga mbaawo sheesi abawa ta, niye s'abasasula liwumule lye buraambi bwaabwe ta.

¹⁴Umweene uyo elomela busa mu mwoyo kweewe ari, “Ise kane niyombekhele intsu imboofu inyene, nga mukari mulimo biseenge bibalaayi bibyeene.” Aryo nio lwanyuma waakhwiikhamwo kamatilisa kamaboofu, nga kimihaango kyako kikholebwa khukhwaama mu misaala kimiseda, lwanyuma waakiwakhakho iraangi imbesemu.

¹⁵Manya shikhukhola iwe khuuba umuyiinga ufuurayo buulayi lwekhuuba wiyombekhela tsiintsu nga uraambisa kimisaala kimiseda? Paapa woowo aabatsaka ni biilyo, ni bye khuunywa bibimumala. Niye akholatsaka bibiindu bikwalaafu luundi bye bubwilama, biryo byeesi aakholatsaka byamutsiila buulayi naabi.

¹⁶Niye enaanatsakayo naabi isi abo babaali bataambi ni naabo abe babaali buubi, isho shaakila bibiindu byaaba biilayi naabi. Shino nisho shishookesanisa shiri umuundu waamanya Umukasya.

¹⁷Ne iwe tsimoni tsoowo atweela ni kumwoyo kwoowo waabira khu saambo iye khulyakhanamwo babaandu babaandi, ni khukhwiira babaandu babaakhalikho ni kumusaango ta, ni khumiinikhilisa atweela ni khuulyakhana babaandi. Bino Umukasya umweene niye ubikanikha.

¹⁸Ni nashiryo sheesi Umukasya aloma nisho shino shishiwaamba khu Yehoyakimu umuyiinga wa Yuda, nga niye umusooleli wa Yosiya: “Mbaawo umuundu na mutweela ukhaasole khulweewe ta, namwe alome ari, ‘Nga kimitaambo waandaayase! Nga she kumutaambo mukooko wase!’ Ilala mbaawo ulyaantsuwa namwe alile nga aloma ari, ‘Nga she kumutaambo umukoosi wase! Nga she kumutaambo umuyiinga wase!’

¹⁹Nga n'ubona isaambo isi basiikhamwo isikilya, naye aryo bakhaamukhweese, bamuyile bamutuume ibulafu we bilibwa bya Yerusalemu.”

²⁰Inywe babaandu be mu Yerusalemu, yinyukha mutsye i Lebanooni, mukhupe luwuungu, lekha liyoombo lyeenywe liwulilikhile mu Bashani, ni mwantsuwile mu Abarimu, lwekhuuba basaale beenywe babaabayeeta inywe boosi baakhupibwile baaweelewo.

²¹Ise Umukasya, nabareewula nywe nga muli mu mbuka yeenywe iye khuuba buulayi. Ne inywe mwekaana khuurekeeresa byeesi ise nabaloma. Yino ibeelatsakile isaambo yeenywe khukhwaama mu busooleli bweenywe, simukanatsakakho mwaawulila luundi mwaakhola byeesi ise imbalomela ta.

²²Imbewo ikhaataamuuse baaraangilisi beenywe, basaale beenywe babaabayeeta bakhaayilibwe mu bubowe. Nio lwanyuma inywe muwaambibwe kamaŋaanyu ni tsisoni lwe buumoyaani bweenywe bweesi mukhola.

²³Inywe mweesi babaamenya mu Lebanooni, nga mwaayinabila biiswi byeenywe mu misaala kimiseda, nga mukhaawulile butsiina buukali bubufwaana nga bw'omukhasi uuli khuutsya khusaala!

²⁴Umukasya waalomela umuyiinga Yehoyakini, umusooleli wa Yehoyakimu, abe niye uwula Yuda, ari, “Ise nga niindi Umukasya Wele, abe yakhaba nga iwe ubeelatsakile intsiyi yase iye bunyala khu lwaala lwase lwe kumukhono kumulayi, intsya khukhurusakho ikhutuume.

²⁵Indyo ikhuwaaneyo isi babaandu beesi warya naabi, babaakana khuuhesa buulamu bwoowo. Intsya khuukhuwaanayo isi Nebukaduneeza umuyiinga wa Babulooni atweela ni baselikhale beewe.

²⁶Ise intsya khukhukholowa iwe atweela ni maayi woowo uwakhusaala, mutsye mukwe mu shibala she bubowe, isi ukhaasaalikhila ta. Mu bweenemwo, nimwo mweesi mukhaafwiile.

²⁷Ukhewotoome khuukobola ingo mu shibala shoowo, ne s'ukhaanyalise khuukobola ta.”

²⁸Ari Yehoyakini uyu wekyelile umuundu isi balekelesa busa, wafwaana nga inyuungu iyatikhile, isi batuuma ibuumbi, nga mbaawo umuundu ushikikana luundi ta? Lwashiina niye atweela ni babaana beewe baatuumibwa ibulafu, baatsya baakwa mu shibala she aleeyi, isi bakhamanyilekho nakhafwiiti khoosi ta?

²⁹Inywe babaandu ba Yuda, inywe babaandu ba Yuda! Wuliilisa ilomo isi Umukasya ali khuuloma!

³⁰“Rona lisiina ly'omusaani yuno afwaane nga ukhasaalakho umwaana nakhari ta, niye abe umuundu ukhanyala waakhola shishiindu shaabiramwo ta. Mbaawo na mutweela khu betsukhulu beewe ulyaamamwo ta, mbaawo na mutweela uliilawo ekhale khu shitsoloŋo sha Dawudi, awule nga umuyiinga mu Yuda luundi ta. Iseese Umukasya samweene niye ukuukuulile bilomo bino.”