Read lumasaaba Yeremiya 23 Bible Online

Yeremiya 23 - lumasaaba bible

Yeremiya 23

¹Nga kumutaambo kwaabanyoolile baaraangilisi babaatsya nga bahesa luundi nga basalanisaka babaandu baase nga n'ubona babaayi ni basalanisaka kamasheese!

²Ni nashiryo Umukasya Wele wa Isiraeli akanikha luundi isi baaraangilisi babaakhiile khulolelela babaandu beewe ari, “Inywe simwaloleleele buulayi babaandu baase ta, mutsya mwaabasalanisaka busa, lwanyuma mwaabatimisa bakoraana. Ninashiryo ise intsya khubawa inywe shitaambiso lwe buubi buno bweesi mukholile.

³Ise samweene kane imbuusilise babaandu baase, imbaruse mu manaambo isi nabasalanisila, lwanyuma imbakobose ingo mu shibala shaabwe shisheene. Mu bweene imwo, bakhasaalane babalaahe, babe mu bukali.

⁴Ikhaabaroborere baaraangilisi babaakhaabalolelele buulayi. Baryo babaandu baase balekhe khubakho ni khuurya khwoosi, namwe khukhwiyembelela, namwe bari ibewo shishiindu shishikhaabataambekho ta. Ise Umukasya samweene niye ukanikhile bibiindu bino.”

⁵Umukasya waashilaangilila ari, “Imbuka ikhoole, isi ikhaaroborere umuyiinga umukhosefu, uuli umwitsukhulu wa Dawudi. Umuyiinga uyo akhaawule ni kamakhula kamakali, naluundi akhole ibyo bibiili bikwalaafu luundi bibilama mu shibala shoosi.

⁶Mu bifukhu byeesi akhaabeele umuyiinga, babaandu ba Yuda bakhaabe buulayi, ni babaandu ba Isiraeli nabo bakhaamenye mu lukoosi. Lisiina lyeesi bakhaamulaange nilyo likhaabe ‘Umukasya niye buwonesi bwase.’ ”

⁷Umukasya aloma ari, “Imbuka ikhoole, isi babaandu ba Isiraeli bakhaalobe khwiilayo luundi khukhwiitsubila mu lisiina lya Wele umulamu, uwabarusa khukhwaama mu shibala she Misiri ta.

⁸Ne baliitsuba nga baraambisa lisiina lyase, nga Wele Umulamu, uwarusa babaandu ba Isiraeli khurura khukhwaama mu linaambo lye khu lubeka lwe ngaaki, ni mu manaambo kakaandi abe isi nabasalanisila. Awo nio lwanyuma beetse bamenye mu shibala shishiili shishaabwe shisheene.”

⁹Nga nambaasile khu baŋoosi, kumwoyo kwase kutyeemuukha muunda mwase, narakikha ni khunikina busa, nafwaana nga umuundu umeelile, lwanyuma lwe khuunywa iviini ingali. Shifwaana shiryo khulw'Omukasya, ni khulwe biilomo byeewe bikhosefu.

¹⁰Shibala shoosi shetsuule babaandu bayeyani, babaakhali babeyikinwa isi Umukasya ta; bamenya buulamu bwe bumoyaani, naluundi baŋoosi baraambisaka buubi buunyala bwaabwe. Lwe shitsubo sh'Omukasya, shibala shilikho shilootsakana busa, ni kamaayilo koosi kaayoma.

¹¹Umukasya aloma ari, “Baŋoosi atweela ni basaayi beene sibambaasa khu Wele ta. Ise samweene naabanyoolile nga bakholela bye bubwoonaki mu Lisaayilo lyase Likhosefu.

¹²Ni nashiryo kimikhoosi kyaabwe khweesi bakyeendela kikheetsulekho burerere ni shishilima shiikali; ibweene iyo niyo isi ikhaabayile bareremukhe bakwe aasi. Indi khuutsya khubareerakho buukosi buukali naabi, khu mbuka isi balifunilakho shitaambiso. Ise Umukasya samweene niye ushikuukuulile ndyo.

¹³Ise nabona shishoonako shikhulu shitweela mu baŋoosi ba Samariya, shishisonioosa kumwoyo: Nibo batsya baakhola bye buŋoosi mu lisiina lya Bayaali, musaambo iyo baaba nga baborosa babaandu baase.

¹⁴Ne mu baŋoosi be mu Yerusalemu nabo naababonemu shiibi shishifuura buubi bubweene: Nibo batsya baakhola bye buyeyani naluundi baraambisa bubeeyi. Batsya bayeeta babaandu khuukhola bye bubwoonaki, nio yataambawo na mutweela ushuukha waarura mu bubi bweewe. Boosi ari baayikyela busa nga Sodomu, babaandu be mu Yerusalemu boosi bafwaana nga Gomora.”

¹⁵“Ni nashiryo sheesi ise Umukasya, Umunyali wa byoosi, inoma shishiwaamba khu baŋoosi bano nisho shino: Indi khuutsya khubawa biilyo bibyaluluwa khuulya, ni kameetsi kakaalimwo buutwa khuunywa, lwekhuuba khukhwaamila mu baŋoosi be mu Yerusalemu, bubwoonaki bwaasalaniile buli aandu oosi mu shibala.”

¹⁶Shishiindu shishiindi sheesi Umukasya, umunyali wa byoosi alomela babaandu be mu Yerusalemu nisho shino: “Mukhawuliilisa byeesi baŋoosi balikho bababoolela inywe ta, bekholakholanisa baabeetsusamwo inywe kumwiyikino kukuukhaliwo ta. Nibo bababoolela inywe byeesi bambaasilisa busa khukhwaama mu myooyo kyaabwe, ne nga sibiba byaarurire khukhwaama mu khanwa mwa Wele ta.

¹⁷Baŋoosi bano bekhala baboolela babaandu babaandekelesaka ise nga babalomela bari bibiindu kane bibatsiile buulayi. Naluundi batsya baboolela buli mutweela uuli ni shikili nga akhola byeesi umweene ekanila bari, mbaawo shikosi shoosi shishinyala shaamukwakho nakhari ta.”

¹⁸Ne ise naababoolela ndi, mbaawo na mutweela khu baŋoosi bano uwabakho mu lukhobo n'Umukasya khuubona namwe khuuwulilakho busa byeesi Umukasya akanikha ta.

¹⁹Nashiryo atsya khubasiindikhila lirima lyeewe liitse nga ikhuungu, litsya khubakwakho buubi naabi, libe nga ikhuungu iye kamaani litsye lyaatikhile khu mirwe kye baboonaki.

²⁰Lirima ly'Omukasya silitsya khwaakama ta, khukhwoolesa nga umweene woolelesile bitsilililwa byeewe byeesi ambaasa mu mwoyo kweewe. Mu bifukhu bibiitsa mu moni, inywe mweesi mukhaabyofwaase buulayi.

²¹Umukasya aloma ari, “Baŋoosi bano ise naakhubarumanakho ta, ne nibo bekhuula busa baatsya; ise naakhubakanikhatsakayo ta, ne nibo bekhuula busa baatsya baakanikha bye buŋoosi.

²²Ne baba nga babeetsakho mu lubusano ni nase, khali baamanya bimoonyo byase nio batsya khukanikha buurume bwase isi babaandu baase, shikila babaandu bashuukha barura khukhwaama mu ntsila tsaabwe tse bubwoonaki, naluundi barura khukhwaama mu bubi bwaabwe bweesi bakhola.”

²³Umukasya Wele waalooselakho ari, “Iseese ndi Wele uuba buli aandu oosi, ne siindi Wele uuba mu shifwo shitweela shonyene ta.

²⁴Manya yaabawo umuundu unyala waatsya webisa mu bifwo bye shimoonyo nio nalekha khumubona? Inywe simumanya muri ise ndi Wele uuli buli aandu mwikulu ni khu shibala khweene ta? Ise Umukasya samweene niye ukanikhile bibiindu bino.”

²⁵Umukasya waalooselakho ari, “Ise samweene nawuliile baŋoosi bano babaatsya baakanikha mu lisiina lyase nga beelomela babeene bari, baboone khuubonekhelwa namwe kamarooro.

²⁶Bubeeyi bwe baŋoosi buno bunoola waheena, nga batsya bawombesa babaandu baase ni buŋoosi bwe bubeeyi, bweesi bekholakholanisa khukhwaama mu myoyo kyaabwe?

²⁷Nibo bambaasa bari kamarooro kaabwe kane kakile babaandu baase bebilile lisina lyase, bari nio bafwaane nga bakuuka baabwe ni baakhola khaalekho, isi baashuukhila batsya besaaya Bayaali.

²⁸Lekha umuŋoosi uuli ni kamarooro atsye akakanikhekho nga kamarooro busa, ne umuŋoosi ufunile ilomo khukhwaama isi samweene, naye atsye akikuukuule nga ningimukanikhiile. Bunyaasi busa bufwaanana buryeena ni ŋaano?” Bino byoosi Umukasya umweene niye uubikanikha.

²⁹Umukasya ashikuukuula luundi ari, “Ilomo yase iyaama isiindi ili busa nga kumulilo, naluundi ili busa nga inyoondo iye shishuuma iyaraaka lulwaanda lwaasalanila busa.

³⁰Ni nashiryo ise imbiyila baŋoosi babaatsya beeba biilomo khukhwaama isi baŋoosi bashaabwe, baatsya baabikanikha nga buurume bubwaama isi ise Umukasya.

³¹Ilala ise Umukasya, naabiyilila ilala umuŋoosi utsya waakanikha biilomo byeewe umweene, nga araambisa lulimi lweewe, ne ndi waashuukha waaloma ari byaama isi Umukasya.

³²Wuliilisa buulayi byeesi ise Umukasya indi khuukanikha, ise naabiyila abo babaatsya bakanikha kamarooro ke bubeeyi. Batsya baakanikha kamarooro ke bubeeyi, shaakila baaborosa babaandu baase, ate ise naakhubarumanakho ta, namwe khuubarobora ta. Ni nashiryo baŋoosi bano sibalimwo kumukaso isi babaandu baase naakhafwiiti khoosi ta. Shino ise Umukasya samweene niye ushilaangilila ndyo.”

³³Umukasya waalomela Yeremiya ari, “Siinga mutweela khu baandu bano, namwe umuŋoosi namwe umusaayi eetsa is'uli, waakhureeba ari, ‘Buurume bw'Omukasya buli waheena?’ Nawe umwiilamwo uri, ‘Iwe waayikyela uli shisutwa shisiro isi Umukasya. Buurume bweesi Umukasya ali nabwo is'uli buloma buri atsya khubatuuma mu mururewo mutsye.’

³⁴Naluundi nga umuŋoosi, namwe umusaayi, namwe mutweela khu baandu baase weetsile waaloma ari, ‘Shisutwa shisiro sh'Omukasya,’ umuundu ufwaana aryo ikhaamuwe shitaambiso, niye atweela ni babaandu be muungo mweewe.

³⁵Shonyene sheesi buli mutweela aakha khureeba umusaale weewe namwe umulebe weewe nisho shino: ‘Umukasya weelilemwo aryeena?’ Namwe ari, ‘Shiina sheesi Umukasya akanikhile?’

³⁶Ne mukheelayo luundi mwaakanikhakho khu ‘Shisutwa shisiro sh'Omukasya’ luundi ta, lwekhuuba siinga ibawo umuundu ushikhola aryo, kane ishikhole shikyelele ilala shisutwa sheene isi umuundu uyo. Babaandu baakasuusaka biilomo bya Wele Umulamu, Umukasya Umunyali wa byoosi, uuli Wele weefwe.

³⁷Nashiryo iwe Yeremiya, shino nisho sheesi ukhaabe nga ureeba umuŋoosi, ‘Shiina sheesi Umukasya akhwiililemwo?’ Namwe, ‘Lomo shiina isi Umukasya akanikhile?’

³⁸Ne siinga nibo balekha khuwulila likaambila lyase khuulitsiilakho ta, ne beloosela khuuraambisa biilomo bino biri, ‘Shisutwa shisiro sh'Omukasya,’ ate nga naabalakila khuulekha khushikanikhakho ta, iwe ubaboolela uri,

³⁹Ilala ikhaabebilile, imbakhuulake imbenyuse khukhwaama mu moni tsase, inywe mweesi, atweela ni shiriimba sheesi nabawa inywe ni bakuuka beenywe.

⁴⁰Intsya khubareerakho khuswaala khwe kamaani khukhuukhaliwawo ta, naluundi khukhaabe khuswaala khweesi umuundu yeesi akhalibilila ta.”