Read lumasaaba Yeremiya 24 Bible Online

Yeremiya 24 - lumasaaba bible

Yeremiya 24

¹Umukasya waantsokesa bibiipo bibili nga byetsuulekho kamatuunda ke kimifigi, nga baabireere iburaangisi we Lisaayilo Likhulu. Shino shabawo lwanyuma lw'omuyiinga Nebukaduneeza uwa Babulooni khuuyila Yehoyakini umuyiinga wa Yuda, umusooleli wa Yehoyakimu, nga umubowe, nga amwaamisa mu Yerusalemu khuumuyila i Babulooni. Yehoyakini baamuyilila atweela ni baakhulu babaandi be mu Yuda, nga mulimo baabasi ni babeetsi.

²Shishiipo shitweeela shabamwo kamatuunda ke kimifigi, nga kili kimilayi naabi, nga n'ubona kimifigi kikinyoowa khuuroba; ne shishiipo she khaabili shabamwo kimifigi kimibi naabi, nga sikiliikha na khuliikha ta.

³Lwanyuma Umukasya wandeeba ari, “Yeremiya, shiina sheesi uli khuubona?” Nase nelamwo ndi, “Indi khuubona kimifigi kimirobe. Ikyo kikiili kimilayi kili kimilayi naabi, ne ikyo kikiili kimibi kili kimibi kimyeene, sikinyalikha ni khuuliikha ta.”

⁴Kila Umukasya anganikhayo nga aloma ari,

⁵“Ise Umukasya Wele wa Isiraeli, imbona babaandu babaayilibwa mu Babulooni nga baabowe khukhwaama mu Yuda, nga nibo kimifigi kimilayi kino, ni nase kane imbabirise buulayi ndyo.

⁶Kane samweene imbaloleleele buulayi, lwanyuma niitse imbakobose mu shibala shino. Kane niitse imbombekhe buulayi, indekhe khuubafuniaakaka luundi ta; kane niitse imbabyaale luundi, indekhe khuubatutulaka luundi ta.

⁷Kane imbawe kumwoyo kukukana khukhuumanya ise nga Umukasya. Nibo bakhaabe babaandu baase ilala, ni nase ikhaabe Wele waabwe, lwekhuuba nga beetsile khukobola isiindi, bakhaakobole ni kumwoyo kwaabwe kwoosi.

⁸“Ne nga n'ubona kimifigi kikiili kimibi ikyo, kikikhanyala kyaliikha ni khuliikha ikyo ta, nase Umukasya nisho sheesi ikhaakhole Zedekiya umuyiinga wa Yuda, ni baakhulu be mu lubili lweewe, atweela ni naabo boosi babaakhaawonekho be mu Yerusalemu, oba babaakhaarame mu shibala shino, oba babaakhaayilibwe i Misiri.

⁹Samweene ikhaabareerekho khu nibo boosi buukosi buubi naabi, khukhwoolesa bafwaane she mbikho, kamanaambo ke mu bibala byoosi karye busa. Nibo bakhekyele she khuutsekhelela busa, babaandu babatyaabile, babanyoome, baryo bekyele shiitsubo buli aandu oosi isi bakhaabe nga baasalaniile.

¹⁰Intsya khubasiindikhila busoolo, intsala, ni buulwaale buubi naabi, khukhwoolesa nga baamalile khuuhela boosi, itaambewo na mutweela uramawo khu shibala isi nabawa nibo, atweela ni bakuuka baabwe.”