Read lumasaaba Yeremiya 25 Bible Online

Yeremiya 25 - lumasaaba bible

Yeremiya 25

¹Mu mwiiko kwe khaane kwa Yehoyakimu, umusooleli wa Yosiya, nga niye umuyiinga wa Yuda, (nga kumwiiko kweene ikwo nikwo kweesi Nebukaduneeza aabeela umuyiinga wa Babulooni), buurume bw'Omukasya bweetsa isi Yeremiya, khuutsya abukanikhile babaandu ba Yuda.

²Aryo Yeremiya naye waatsya waaboolela babaandu ba Yuda, atweela ni naabo boosi abe babaamenya mu Yerusalemu ari,

³“Ari khuumala kimiiko kamakhumi kabili na kitaru (23), khukhwaamila khu mwiiko kwe likhumi na kitaru nga Yosiya, umusooleli wa Amoni, niye umuyiinga wa Yuda, khukhwoolesa ni shaleelo shino, Umukasya abeelatsakile nga anganikhayo kimiluundi swa busa, ni nase neetsatsaka ne mbaboolatsakila buli mushiimba, ne inywe mwekaana khurekereesa.

⁴Umukasya abeelatsakile nga abarumanilatsaka baarume beewe baŋoosi kimishiimba swa busa, ne inywe mwalobela ilala khuureka khukhuru khweenywe khuwuliilisa namwe khurekereesa ta.

⁵Nibo beetsaatsaka nga babalomela biilomo by'Omukasya bari, ‘Ni mushuusekho tsisaambo tseenywe, buli mutweela khusiinywe! Mwaakamise khuukhola bye bumoyaani, nio munyale khuurama nga mumenya mu shibala sheesi Umukasya aabawa inywe, atweela ni bakuuka beenywe biilo ni biilo.

⁶Mukhatsya mwaaloondelela ba wele babaandi, khuubakaanisa ni khuubesaaya ta. Isho shikila mwasyukhuluusa lirima ly'Omukasya, siinga mwisaaya bifwaani byeesi mwabeene mwakhola ni kamakhono keenywe. Isho shikhaakile Umukasya abakhole inywe buubi.’ ”

⁷Umukasya waalooselakho ari, “Ne inywe mwalobela ilala khukhuundekeeresa ise, mwasyukhuluusa lirima lyase lwe bifwaani byeesi inywe mwabeene mwekholela ni kamakhono keenywe, mwaatsya mwereerera mwabeene buwaangafu.”

⁸Ni nashiryo sheesi Umukasya Umunyali wa byoosi aloma nisho shino: “Lwekhuuba inywe mwaloba khurekeeresa biilomo byase,

⁹bona ari intsya khubasiindikhila babaandu be linaambo lye khu lubeka lwe ngaaki, atweela n'umwakaanisi wase Nebukaduneeza, umuyiinga wa Babulooni. Intsya khubareera beetse basoolanise shibala sha Yuda, atweela ni babaandu babaashilimwo boosi, baryo beloosele batsye basoolanise ni kamanaambo kakaabesanile. Intsya khuhesela ilala linaambo lino, ni babesanwa baalyo, bekyele shishiriisaka, she khutsekhelelwa busa, naluundi barame mu mawuumbu imbuka yoosi.

¹⁰Intsya khusilisila ilala liyoombo lyeesi banyala bakhupa lwe kumwikhoyo ni sangaalo, atweela ni khuuyiliimba khukhuubawo lwe kamayiiya ke bukhwaale. Mbaawo ulinyala khuusyeela buufu khu lusisi, namwe bari ibewo kamafura kakanyala kaakila itaala yaaburukha ta.

¹¹Linaambo lino lyoosi litsya khwiikyela busa nga likubili, na buli muundu yeesi ulilolakho, akheesindukhe busa, ni kamanaambo kamesanwa koosi nako kakhaakaanisatsake umuyiinga wa Babulooni khuumala kimiiko kamakhumi musaafu (70).

¹²Ne nga kimiiko kamakhumi musaafu ikyo kyaaweelekho, ikhaawe umuyiinga wa Babulooni atweela ni linaambo lyeewe lyoosi shitaambiso, lwe buubi bweesi baakhola. Naluundi shibala shino shikhaabe kamawuumbu busa biilo ni biilo. Bino ise Umukasya samweene niye ubikuukuulile ndyo.

¹³Intsya khwoolelesa khu Babulooni bibiindu byoosi byeesi inganikhile ndi bikhaakholikhe, ni bibiindu bibiindi bibyaronebwa mu shitabo shino, naluundi bibyakanikhibwa ni Yeremiya, bibiwaamba khu manaambo kakaandi nako khukhwoonakisibwa.

¹⁴Indyo ikheliyaase Babulooni lwe buraambi bwaabwe buubi bweesi baakhola, nga baraambisa ni kamakhono kaabwe. Karyo kamanaambo kakaandi, ni bayiinga be kamaani bakheetse babasoolanise lwanyuma babayile nga baabowe.”

¹⁵Bino nibyo byeesi Umukasya Wele wa Isiraeli aanganikhayo, nga anomela ari, “Bonakho shikhopo shishitsuulemwo iviini iye lirima lyase. Shibukule, ushiyile isi kamanaambo keesi indikhukhurumanayo, ukawaambile kanywe.

¹⁶Nga baamalile khuunywa, kane batilyaate, bawemo kamakyesi lwe lurima lwe buusoolo lweesi indikhuubasiindikhamwo.”

¹⁷Nase ndyo naabukula shikhopo khukhwaama mu mukhono kw'Omukasya, naatsya naashiwaambila kamanaambo keesi narumanibwayo khuunywa.

¹⁸Yerusalemu atweela ni biriimba bye mu Yuda byoosi, nga waareerekho ni bayiinga baasho ni baaraangilisi babaandi, baanyweela mu shikhopo shino, shibala shaabwe shoosi shekyela kumubiimbi busa, shishirisaka naluundi nga buli muundu ushibonakho esindukha busa, shaaba she khutsekhelela busa naluundi she shitsubo, nga ni bashiili baryo khu shifukhu she shaleelo shino.

¹⁹Khukhwaama awo naalooselakho Faraawo umuyiinga wa Misiri, atweela ni babaakaanisi beewe, ni baakhulu be mu lubili lweewe, ni babaandu baayo boosi,

²⁰ni khuutubaasakho babaandu banaambo boosi abe babaamenya mu Misiri iyo. Khukhwaama awo naashiyilila bayiinga be mu shibala sha Uzi, nelooselayo isi bayiinga be ba Firisitiya, babaawulatsaka khukhwaamila i Ashikeloni, Gaza, Ekuroni, ni shisiintsa sha Ashidodi shisharamakho.

²¹Lwanyuma naalooselakho bayiinga ba Edomu, Mowaabu, ni Amoni,

²²khuulooselakho bayiinga ba Tuulo, ni Sidoni, ni bayiinga be bisiintsa abe bibiili shanjelekha we nyaantsa.

²³Khukhwaama awo naatsya isi bayiinga ba Dedani, Tema, Buzi, atweela ni babaandu babaakhalakho kamatsuune kaabwe,

²⁴ni khukhwoola isi bayiinga ba Buwarabu, atweela ni bayiinga be babaandu banaambo abe babaamenya mu mubiimbi;

²⁵ni khuutubaasakho bayiinga ba Zimuri, Elamu ni Mediya,

²⁶ni bayiinga boosi be kamanaambo ke lubeka lwe ngaaki, kakaali aambi ni naako kakaali aleeyi. Indyo naakyeenda nga intsya mu manaambo koosi ke khu shibala, nga imala litweela naatsya mu liindi. Indyo lwanyuma lwaako koosi, naamaliilisila w'omuyiinga wa Babulooni[5] naye khuunywa shisiintsa sheewe.

²⁷Lwanyuma Umukasya waanomela khuutsya inomele buli muyiinga ndi, “Sheesi Umukasya Wele wa Isiraeli, umunyali wa byoosi aloma nisho shino ndi: Ni munywe, mumeele, lwanyuma mulusake, khukhwoolesa mwikhupe aasi, mulekhe khunyalisa ni khukhwinyukha ta. Shino shikhaabe shiryo khulwe buusoolo buukali bweesi intsya khubasiindikhila inywe.

²⁸Ne siinga baloba khuubukula shikhopo khukhwaama mu makhono koowo bashinywe, ubaboolela uri, ‘Ise Umukasya Umunyali wa byoosi imbalakila ndi: Baakha khuunywa!

²⁹Lwekhuuba ise naarakikhile khuureera buukosi nga inyoowela mu shiriimba shase shisheene. Nibo bambaasa bari singene bafune shitaambiso ta? Ilala, batsya khufuna shitaambiso, lwekhuuba indi khuutsya khusiindikha busoolo khu baandu boosi, babaamenya mu shibala. Ise Umukasya samweene niye ukuukuulila ilomo yino.’ ”

³⁰Umukasya waalooselakho ari, “Ari tsya ulaangilila biilomo bye buŋoosi bino isi babaandu bano bali nga uloma uri, Umukasya akhaabuutse nga ali mwikulu; akhaakuule nga ifula nga ali mu bumenyo bweewe bukhosefu, aryo akhaabuutse nga arafuyila shibala sheewe. Akhaakhupe liyoombo lifwaane nga lyaabo babaasuura kimisabibu, Liyoombo libe liikali naabi babaandu boosi babaamenya khu shibala bawulile.

³¹Liikono lye kamaani ilyo likhaawulilikhe mu buli soonda tsoosi tse shibala. Lwekhuuba Umukasya alikho ni sheesi atsuntsumilisa kamanaambo koosi. Aryo akhaakhalile babaandu be kamanaambo koosi kumusaango, nio abo babaali baboonaki abakhoonye ni lurima.”

³²Sheesi Umukasya Umunyali wa byoosi aloma nisho shino: “Bona bukosi bulikho bwaama khu linaambo litweela butsya khu linaambo liliindi, ni ikhuungu iye kamaani ilikho yinyukha khukhwaama mu soonda tse shibala tsitsikhali ndweela ta.”

³³Khu mbuka iyo babaandu boosi babaakheeribwe n'Umukasya umweene, ni kimilaambo kyaabwe kikhaasalanile buli aandu oosi, khukhwaama khu soonda ndweela iye shibala khuutsya khwoola khu soonda ikiindi. Mbaawo umuundu ukhaasole, naluundi mbaawo ukhaakibusake atweela ta, namwe ibewo ukhaakisiikhe ta. Kiryo kikhaasalanile buli aandu nga n'ubona kamasiisye khu kyeewa.

³⁴Ari inywe baaraangilisi, ni mulile, inywe babaayi babaayisa babaandu baase, ni mwantsuwe ni kamaani keene. Ni mukhupe luwuungu, mwifuufulile mwifukhuulu. Lwekhuuba imbuka yeenywe yoolile iye khuusiintsibwa nga kamamiiku. Mukhaakwe aasi mwaatikhake nga n'ubona inyuungu.

³⁵Babaayi be kamasheese sibakhaabekho ni isi belukhila nakhari ta, namwe baaraangilisi be babaandu sibakhaabekho ni isi batsya khukhwiibisa ta.

³⁶Rekeeresa uwulile khukhwaantsuwa kwe babaayi be kamasheese, wulila luwuungu lwe baaraangilisi be babaandu, lwekhuuba Umukasya ali khukhwiitsa khuuhesa kamaayilo kaabwe.

³⁷Kamaayilo koosi kakhaarame awo busa, kafwaane nga kumubiimbi lwe lirima ly'Omukasya lirafu.

³⁸Nga italanyi niirura mwifuluma lyayo yaalilekha, Umukasya walekhile babaandu beewe. Shibala shaabwe shoosi shikhoonakisibwe buubi naabi lwe buusoolo, lwekhuuba lirima ly'Omukasya lyekyelisile shibala shoosi kumubiimbi.