Read lumasaaba Yeremiya 26 Bible Online

Yeremiya 26 - lumasaaba bible

Yeremiya 26

¹Lwanyumakho khakyeekhe nga Yehoyakimu, umusooleli wa Yosiya alikyelile umuyiinga wa Yuda, Umukasya waalomela Yeremiya ari,

²“Yiimikha mu Lisaayilo Likhulu ly'Omukasya, ukanikhe isi babaandu boosi be mu biriimba bya Yuda, babeetsatsaka khukhwisaaya Umukasya. Ubaboolela biilomo byoosi byeesi ikhulakila khuukanikha, ukhalekhakho na shitweela ta.

³Manya lukanile babaandu bano banyala baawuliilisa, buli mutweela walekha tsintsila tseewe tsiimbi. Siinga bashikhola baryo, nase kane ishuusekho buubi abe bweesi indi khukhwaambaasa khuubakholakho, lwe bibyoonako byaabwe.

⁴Tsya ubaboolele byeesi indi khuuloma ndi: ‘Ise Umukasya naamala khaale khuubalomela ndi inywe siinga mulekha khuuwuliilisa byeesi inoma, mwaloba khuukyeendela mu makaambila kaase keesi nabawa,

⁵naluundi siinga muloba khuwuliilisa byeesi babaakaanisi baase baŋoosi beesi imbarumanila kimiluundi swa busa babalomela, (Ne ilala inywe mwalobela ilala khuubarekeeresa nibo),

⁶indyo intsya khwoonakisa Lisaayilo Likhulu lino, lifwaane nga ninoonakisa i Shilo. Ni shiriimba shino shikhekyele shitsubo busa isi kamanaambo koosi ke shibala.’ ”

⁷Basaayi, ni baŋoosi atweela ni babaandu boosi baawulila Yeremiya nga akanikha biilomo bino mu Lisaayilo Likhulu ly'Omukasya.

⁸Ne Yeremiya n'amala khuukanikha biilomo ibyo byoosi byeesi Umukasya aamurumana khuukanikhila babaandu, lwanyuma basaayi, ni baŋoosi, atweela ni babaandu boosi abe babaaliwo, baakulukhila Yeremiya, baamulomela bari, “Iwe waakha khuufwa lwe tsilomo tsino!

⁹Lwashiina iwe ukanikha buŋoosi mu isiina ly'Omukasya, nga uloma uri shiifwo shino shikhaafwaane nga Shilo, naluundi uri shiriimba shino shikhoonakisibwe, shitaambemwo umuundu na mutweela ushimenyamwo?” Baryo babaandu boosi baabuusanila Yeremiya mu Lisaayilo Likhulu ly'Omukasya.

¹⁰Ne baakhulu babaraangilila mu Yuda ni baawulila bibiindu bino byoosi bibyaba byaakholikhile, besuta baayubakilisa khaangu baarura mu lubili lw'omuyiinga, baatsya khu Lisaayilo Likhulu, baatsya bekhala aasi khu bitsoloŋo byaabwe a Shilibwa Shishaakha.

¹¹Shikila basaayi ni baŋoosi, baboolela baakhulu bano atweela ni babaandu boosi bari, “Umusaani yuno aakha khuukhalibwila kumusaango kwe khuufwa. Lwekhuuba mweesi mwaawulila ni kamaru keenywe isaambo isi abeele akanikhamwo ari, shiriimba Yerusalemu shitsya khwoonakisibwa.”

¹²Lwanyuma Yeremiya naye waakanikha isi baakhulu bano atweela ni isi babaandu abe babaaliwo ari, “Umukasya umweene niye uwandumile ise khukhwiitsa khuukanikha biilomo byeesi nanywe mwabeene muwuliliile ni kamaru keenywe, bibiwaamba khu Lisaayilo Likhulu ni khu shiriimba.

¹³Ni nashiryo, ari inywe ni mushuusekho isaambo iimbi isi mubeele mumenya, ni bibiindu biibi byeesi mubeele mukhola, murekeerese buulayi likono ly'Omukasya Wele weenywe. Ni naye Umukasya umweene aryo kane ashuusekho bibyambaaso bye buubi bwe khuuhela abe bweesi atsya khuubakhola khusiinywe.

¹⁴Ne bibimaamba khusiise, bona indi mu makhono keenywe. Ari nimukhole shoosi sheesi mwambaasa muri shiilayi luundi shishintsakhila ise.

¹⁵Ne shonyene mushimanye muri, inywe siinga muntsira ise, inywe mweesi atweela ni babaandu boosi be mu shiriimba shino, kane mube mwereerirekho kumusaango kwe kamafuki kakaakhalikho ni shiibi shoosi ta. Lwekhuuba mu ŋali, Umukasya umweene niye uwandumile ise khukhwiitsa inganikhe biilomo bino byoosi byeesi muwuliile ni kamaru keenywe.”

¹⁶Lwanyuma kila baakhulu abo ni babaandu abe babaaliwo baalomela basaayi bari, “Umusaani yuno s'akhila khuukhalibwila kumusaango kwe khuufwa ta! Ilala niye waakhukanikhileyo mu lisiina ly'Omukasya Wele weefwe.”

¹⁷Isho nga shaaweele shiryo, batweela khu baaraangilisi benyukha baakanikha isi lituuli lye babaandu boosi abe babaabusaane bari,

¹⁸“Khu mbuka isi Hezekiya aabeela umuyiinga wa Yuda, umuŋoosi Mika uwe Moreshesi, aakanikhila babaandu boosi sheesi Umukasya Umunyali wa byoosi aamulomela khuukanikha ari, ‘Bakhaakhabale Sayuuni nga babaakhala kumukuunda, Yerusalemu shikhekyele induumi iye kamawuumbu, Lisaayilo Likhulu likhaasiimbe ni bunyaasi likyele shisaali busa.’

¹⁹Ne manya umuyiinga Hezekiya atweela ni babaandu boosi be mu Yuda benyukhakho aasi bari beere Mika? Sheesi Hezekiya umweene aakhola, esamwo busa Umukasya lukoosi, waakhakakho naabi khuufuna bubweela bweewe. Musaambo iyo, Umukasya waashuusakho bibyambaaso byeewe abe bye khuubakhola buubi bweesi alaangilila khuubakhola. Nafwe khuryo khutsya khwireerakho khufwabeene buubi bukali naabi!”

²⁰Aabawo umusaani ukuundi Uriya, umusooleli wa Shemaya, uwaama i Kiriyasi Jeyarimu, uwakanikha bye buŋoosi mu lisiina ly'Omukasya, nga akanikha bibiindu biibi khu shiriimba shino, ni khu linaambo lino nga Yeremiya naye n'akholile ari.

²¹Ne umuyiinga Yehoyakimu, ni baselikhale beewe atweela ni baakhulu babaandi nibaawulila bye buŋoosi bweesi Uriya aakanikha, umuyiinga waakhakakho bari eere Uriya. Ne Uriya naye n'awulila aryo, waarya luukali, kila atitukhila mu shibala she Misiri.

²²Ne shonyene ndi umuyiinga Yehoyakimu aarumana Elunasani, umusooleli wa Akubori, atweela ni babaandu babaandi baatsya i Misiri baakobosa Uriya.

²³Baryo baatsya baamureera khukhwaama mu Misiri baamureera isi umuyiinga Yehoyakimu, aryo waamukhoonya, ni kumulaambo kweewe baakutuuma mu shifwo isi basiikha babaandu baabusheele.

²⁴Ne mu bino byoosi, Ahikamu umusooleli wa Shafani aayeeta naabi Yeremiya, mbaawo umuundu uwahaanayo Yeremiya isi babaandu khuumukhoonya ta.