Read lumasaaba Yeremiya 27 Bible Online

Yeremiya 27 - lumasaaba bible

Yeremiya 27

¹Mu khurakikha khwe buuwuli bwa Yehoyakimu[6], umusooleli wa Yosiya, nga niye umuyiinga wa Yuda, Umukasya waakanikha isi Yeremiya ilomo yino.

²Umukasya waamulomela ari, “Niwikholeleyo likyooki khukhwaama mu mahaafu, ubase ni tsimbaawo, lwanyuma ubisabikhe mwikosi mwoowo.

³Lwanyuma urumanise buurume isi bayiinga bano: uwa Edomu, uwa Mowaabu, uwa Amoni, uwa Tuulo, n'uwa Sidoni, khuubirira mu baarume ba buraawa abe babaaba beetsile mu Yerusalemu khuubona Zedekiya[7], umuyiinga wa Yuda.

⁴Ubawe buurume buno babuyile isi baakhulu baabwe, nga buloma buri, ‘Umukasya Umunyali wa byoosi, Wele wa Isiraeli, waayindakila ise khuubaloma batsye baboolele baakhulu baabwe byeesi Umukasya alakila ari,

⁵“Nga inaambisa bunyala bwase ni kamaani kaase, naraambisa kumukhono kwase kwe kamaani khuubuumba shibala, babaandu babaashilimwo, atweela ni bisolo byoosi bibiimenya khu shibala. Ni nase ishikabila umuundu yeesi isi ise imba naasiimile ndi ashiwule.

⁶Nashiryo ise naaweele kamanaambo keenywe koosi mu bunyala bw'omwakaanisi wase Nebukaduneeza, umuyiinga wa Babulooni, naluundi naamuweele ni bisolo byoosi bye mwirome khuumwakaanisatsaka niye.

⁷Kamanaambo koosi kakhaamwakaanisatsake niye, kakaanise n'umusooleli weewe, atweela n'umwitsukhulu weewe, khukhwoolesa khu mbuka isi ikhoolele, linaambo lyeewe likwe. Shikhaabe shiryo khuutsya khwoolesa lwanyuma isi kamanaambo kakaandi nako, ni bayiinga be kamaani nabo, isi bakhaamukholele ekyele umukulwa waabwe.

⁸“Ne siinga ibawo linaambo lyoosi, namwe buyiinga bwoosi bubukhaalobe khukhwakaanisa Nebukaduneeza umuyiinga wa Babulooni, ikhaawe linaambo ilyo, namwe buyiinga ubwo shitaambiso she busoolo, namwe intsala ingali, namwe buulwaale buubi naabi, khukhwoolesa nga Nebukaduneeza waamalile khuhesela ilala linaambo ilyo, namwe buyiinga ubwo. Ise Umukasya samweene niye ukanikhile ilomo yino.

⁹Nashiryo mukhatsya mwaawuliilisa byeesi baŋoosi, namwe baalakusi beenywe, namwe abo babaarumbula kamarooro, namwe baalosi, namwe abo babenyusa kimisaambwa, bababoolela ta. Kane nibo bababoolele bari mukhatsya mwakaanisa umuyiinga wa Babulooni ta.

¹⁰Nibo babawa inywe buŋoosi bwe bubeeyi busa, shishikhaabamilemo murusibwe mu shibala sheenywe. Indyo ikhaabatamuuse imbaruse mu shibala sheenywe, mutsye muhele.

¹¹Ne linaambo lyoosi lilikhaafukiilile khukhwinama aasi, lyakaanise umuyiinga wa Babulooni, ikhaalilekhe lirame mu shibala shalyo, babaandu baraambile khu liloba lyaabwe, bamenyatsake khubweene ukhwo. Ise Umukasya samweene niye ukanikhile bino byoosi.”

¹²Indyo natsya naawa Zedekiya umuyiinga wa Yuda, buurume bweene nibwo butweela. Naloma ndi, “Nimwiinamise kimirwe kyeenywe aasi, mwakaanise umuyiinga wa Babulooni. Mumwakaanisatsake niye atweela ni babaandu beewe, nio munyale khuubawo nga baalamu.

¹³Lwashiina inywe mukana khuufwa lwe buusoolo, namwe lwe ntsala, namwe lwe buulwaale buubi naabi? Shebulila muri isho nisho sheesi Umukasya aalaangilila ari shikhaakholikhe khu linaambo lyoosi, lilikhaalobe khukhwakaanisa umuyiinga wa Babulooni.

¹⁴Mukhaawuliilisa bye buŋoosi byeesi baŋoosi balikho bababoolela bari, simukhaatsye khukhwakaanisa umuyiinga wa Babulooni ta. Ibyo byoosi balikho babawombesa busa!

¹⁵Umukasya umweene alikho aloma ari niye waakhubarumanakho nakhari ta. Ne bye buŋoosi byeesi balikho bakanikha mu lisina lyeewe bili bye bubeeyi busa. Nashiryo siinga mukhola nga ni balikho bababoolela, atsya khubataamuusa abaruse ibulafu, ibweene iyo, mutsya khuhela, inywe mweesi, atweela ni baŋoosi beenywe abo babaalikho bababoolela buŋoosi bwe bubeeyi ubwo.”

¹⁶Nga naamalile awo, naboolela basaayi nabo, atweela ni babaandu boosi byeesi Umukasya aanomela khuukanikha, nga aloma ari, “Mukhawuliilisa byeesi baŋoosi bababoolela ta, nga babalomela bari bibiindu bibiraambisibwa mu Lisaayilo Likhulu bili aambi khuukobosebwa khukhwaama i Babulooni. Ibyo byoosi balikho babawombesa busa.

¹⁷Mukhabawuliilisa ta! Nimwiwaaneyo mwakaanisatsake umuyiinga wa Babulooni, nio mubewo nga mushiili baalamu. Lwashiina mukana shiriimba shino shiikyele nduumi ye kamawuumbu busa?

¹⁸Nibo siinga baba nga bali ni buurume bw'Omukasya, nibatsye bamwikoontselele Umukasya umunyali wa byoosi, nio manya bibiraambisibwa bibyarama mu Lisaayilo Likhulu, ni mu lubili lw'omuyiinga wa Yuda, ni mu shiriimba Yerusalemu, bilekhe khuyilibwa nabyo mu Babulooni ta.

¹⁹Lwekhuuba sheesi Umukasya, Umunyali wa Byoosi aloma, shishiwaamba khu ntseko tse Lisaayilo Likhulu, ni shitowo sha buroonzi she kameetsi shiboofu, ni bikaari, atweela ni bibiindu bye lisuno bibiindi bibyarama mu shiriimba,

²⁰byeesi Nebukaduneeza umuyiinga wa Babulooni akhaayila ta, khu mbuka isi aayilila Yehoyakini, umusooleli wa Yehoyakimu, umuyiinga wa Yuda mu bubowe nga amwaamisa mu Yerusalemu waamuyila i Babulooni, nga amuyilila atweela ni baakhulu babaandi be mu Yuda ni Yerusalemu,

²¹shisheene sheesi Umukasya Umunyali wa Byoosi, Wele wa Isiraeli, aloma shishiwaamba khu biindu ibyo byoosi bibiraambisibwa mu Lisaayilo Likhulu ni mu lubili lw'omuyiinga wa Yuda, ni mu Yerusalemu mwoosi, nisho shino:

²²Byoosi bikhaayilibwe mu Babulooni, bimenye ibweene iyo, khukhwoolesa khu mbuka isi samweene ikhaabiitsile. Lwanyuma lwa byoosi, ikhaabikobose, imbiisake mu shifwo shabyo shisheene.”