Read lumasaaba Yeremiya 28 Bible Online

Yeremiya 28 - lumasaaba bible

Yeremiya 28

¹Mu mwiiko kweene ukwo, mu mweesi kukuukhola kharaano, kwe buwuli bwa Zedekiya, umuŋoosi Hananiya, umusooleli wa Azuri, abe uwaama mu Gibeyooni, waakanikha ni nase nga ndi mu ntsu y'Omukasya, mu moni tse basaayi, atweela ni babaandu boosi nga barekeeresile,

²waamboolela ise byeesi Umukasya, umunyali wa byoosi, Wele wa Isiraeli aaba ali khuuloma ari: “Naamalile khaale khuufuniaakaka buunyala bw'omuyiinga wa Babulooni.

³Mu miiko kibili kyonyene, intsya khukobosaka mu Yerusalemu bibiindu bibiraambisibwa mu Lisaayilo Likhulu, byeesi Nebukaduneeza aasutaka waayila mu Babulooni.

⁴Naluundi intsya khukobosa Yehoyakini umusooleli wa Yehoyakimu, umuyiinga wa Yuda mu shifwo shino, nga ali atweela ni babaandu ba Yuda boosi babaayilibwa n'umuyiinga wa Babulooni. Ikhaafuniaakake busiro bweesi umuyiinga wa Babulooni aareera. Bino byoosi bikhaakholekhe, lwekhuuba ise Umukasya samweene niye ubikanikhile.”

⁵Lwanyuma kila umuŋoosi Yeremiya akanikha isi umuŋoosi Hananiya, nga basaayi atweela ni babaandu boosi beemikhile iburaangisi we ntsu y'Omukasya.

⁶Nga aloma ari, “Amiina! Khali Umukasya ashikholile aryo! Ilala khali Umukasya olelese biilomo byoowo byoosi byeesi ulaangiliile, aryo akobose bibiindu bibiraambisibwa mu ntsu y'Omukasya, atweela ni babaandu boosi babaayilibwa mu Babulooni, nga abakobosa mu shifwo shino.

⁷Ne shonyene ndi, nawe reekeresa byeesi ise ikhuboolela, nga babaandu bano boosi baawuliilisile buulayi:

⁸Khukhwaama khu mbuka iye khaalekho, nga ifwe khushiili na khusaalikha ta, aabawo baŋoosi babaakhunyoowa ifwe, babaakanikhatsaka biilomo bye kamaani, nga balaangilila buŋoosi isi kamanaambo makali ni buyiinga bwe kamaani bari, itsya khubawo busoolo, bukosi bwe ntsala, atweela ni buulwaale.

⁹Ne ikhuboolela ndi, umuŋoosi ukuukuula lukoosi, babaandu baliindakakho baabona siinga byoolelela, nio baamanya bari buŋoosi ibwo bwaama isi Umukasya.”

¹⁰Isho shaakila umuŋoosi Hananiya waakulukhila likyooki abe liliili mu milo mw'omuŋoosi Yeremiya, waalifuniaakaka.

¹¹Lwanyuma kila akanikhila iburaangisi we babaandu boosi ari, “Umukasya umweene ali khuuloma ari: yino niyo isaambo isi atsya khufuniaakakamwo bunyala bwa Nebukaduneeza, umuyiinga wa Babulooni, nga abumurusakho khukhwaama khu manaambo, mu mbuka iye kimiiko kibili kyonyene.” Lwa shino, umuŋoosi Yeremiya wenyukha waarurawo, waatsya.

¹²Lwanyuma lwe mbuka ifwiiti iri khuubirawo, khukhwaama nga umuŋoosi Hananiya n'afuniaakaka likyooki khukhwaama mu milo mw'omuŋoosi Yeremiya, ilomo y'Omukasya yeetsa isi Yeremiya, nga imulomela iri

¹³atsye isi Hananiya amulomele ari, “Umukasya ali khuuloma ari unyala khuufuniaakaka likyooki lilyakholekha khukhwaama mu shisaala, ne liliitsya khukhwiilakho litsya khuba lye shishuuma.

¹⁴Umukasya Umunyali wa byoosi, Wele wa Isiraeli aloma ari atsya khura khu manaambo kano koosi likyooki lye shishuuma, nio kabe nga kakaanisa umuyiinga Nebukaduneeza uwa Babulooni. Umukasya umweene aloma ari akhaareere ni tsisolo tse mwirome tsiitse tsakaanisatsake Nebukaduneeza.”

¹⁵Lwanyuma kila umuŋoosi Yeremiya alomela umuŋoosi Hananiya ari, “Hananiya rekeeresa buulayi bubweene sheesi intsya khuloma! Umukasya waakhukhurumanakho iwe ta, ne ate bona waakyilile babaandu bano bafukiiliile bubeeyi bwoowo.

¹⁶Ni nashiryo Umukasya umweene ali khuuloma ari atsya khukhuumalawo iwe, akhurusewo khu shibala. Mu mwiiko kweene kuno, utsya khufwa, lwekhuuba iwe waaboolela babaandu bano bye bubeeyi, shaakila baaminyaalila Umukasya.”

¹⁷Umuŋoosi Hananiya waafwa mu mweesi kukuukhola musaafu, kwe kumwiiko kweene ukwo.