Read lumasaaba Yeremiya 29 Bible Online

Yeremiya 29 - lumasaaba bible

Yeremiya 29

¹Bino nibyo bitweela khu biilomo byeesi umuŋoosi Yeremiya aarumanisa mu burone, nga asiintsiila mu Yerusalemu, waabwakaanisa isi baasakhalu babaaba nga bashiili baalamu, babaaba mu baandu babaayilibwa, atweela ni basaayi, ni baŋoosi, ni babaandu boosi beesi Nebukaduneeza aabuusilisa waayila mu bubowe i Babulooni.

²Ibaluwa yino yaronebwa lwanyuma lw'omuyiinga Yehoyakini, ni maayi weewe, baakhulu be mu lubili lweewe, baaraangilisi ba Yuda, ni ba Yerusalemu boosi, ni naabo babaaba babeetsi, ni babaandu be kamakhula abe babaraambisa kamakhono kaabwe mu bye khubuumba; nga boosi baamala khaale khuuyilibwa mu bubowe.

³Ibaluwa iyo Yeremiya aakiwaambisa Elasa, umusooleli wa Shafani atweela ni Gemariya, umusooleli wa Hilukiya nga niye isi Zedekiya, umuyiinga wa Yuda aarumana khuutsya isi Nebukaduneeza, umuyiinga wa Babulooni. Buurume buno bwaloma buri:

⁴“Umukasya umunyali wa byoosi, Wele wa Isiraeli, aboolela babaandu boosi babaayilibwa mu bubowe khukhwaama mu Yerusalemu baayilibwa i Babulooni ari:

⁵‘Nimwoombakhe tsiintsu mwabeene mutsikonemo; mubyaale kimikuunda, mwabeene mwiliile bilime bibyaamamwo.

⁶Ni muyile bakhasi, musaale babaana besiinde ni bekhaana; muselelele basooleli beenywe bakhasi, naluundi mukhwaalikhise bakhaana beenywe, nio nabo banyalise khusaala babaana baakali. Muryo kane muyiimbe mube baakali, singene muboombe mube bakyeekhe ta.

⁷Naluundi ingana mukholelele lukoosi ni khuutsowatsowana khwe shiriimba isho, isi ise nabayila inywe khuumenyamwo nga baawuuyi. Nimushiloombele isi Umukasya khulwe buulayi bwasho, lwekhuuba nga nisho shatsowatsowanile, nanywe muryo kane mutsowatsowane.’

⁸Ilala sheesi Umukasya umunyali wa byoosi, Wele wa Isiraeli aloma nisho shino: ‘Mukhafukiilisakho baŋoosi atweela ni bafumu beenywe babaali ni nanywe iyo, baabawombesa ta. Naluundi mukhawuliilisa kamarooro kaabwe keesi baroora ta.

⁹Babeene bano baba balikho bababoolela inywe buŋoosi bwe bubeeyi busa mu lisiina lyase. Iseese naakhubarumanakho nakhari ta. Ise Umukasya umunyali wa byoosi, samweene niye ukanikhile bibiindu bino.’ ”

¹⁰Umukasya umweene alikho aloma ari, “Lwanyuma lwe kimiiko kamakhumi musaafu kye ba Babulooni nga kyaweelekho, samweene ikheetse isi muli, imbokesanise shiisa shase, noolelese shiisuubiso shase sheesi nakhola, indyo imbakoboseyo ingo weenywe.

¹¹Lwekhuuba ise Umukasya samweene naamanya tsiŋoonaŋoona tsase tseesi ise nabakholela inywe. Tsiŋoonaŋoona tse khuubareerera inywe khuutsowatsowana, ne akhuba tse buwaangafu ta, tsiŋoonaŋoona tse khuubarereera inywe kumwiyikino kwe buraangisi kweesi mwaliindiilila.

¹²Nio nanywe abweene awo munyale khukhuuntsikhuunga ise, luundi munoombe, ni nase kane imbawuliliise.

¹³Mukhaameentse ise muryo muunyoole, siinga muba nga mumeentsa ise ni kumwoyo mutweela.

¹⁴Ilala ise Umukasya samweene imbaboolela ndi, mukhaameentse munyoole, indyo nio nase imbakoboseyo inywe mu shibala sheenywe. Ikhaababuusanise nga imbaamisa mu bibala abe byeesi mwatsya nga baabowe, ni mu bibala ni biifwo isi nabasalanisila inywe. Ise ikhaabeseyo mu shifwo sheenywe isi nabarusa naabayila mu bubowe. Ise Umukasya samweene niye uuli khuushikuukuula aryo.”

¹⁵“Inywe munyala mwaaba iyo nga muloma muri, ‘Umukasya waakhuwa baŋoosi mu Babulooni.’

¹⁶Ne ni murekeerese sheesi Umukasya mweene akanikha, shishiwaamba khu muyiinga uwikhala khu shitsoloŋo sha Dawudi, waawula nga umuyiinga, ni khu baandu babaamenya mu shiriimba shino, nga bano nibo baalebe beenywe, beesi bakhaayila nga baabowe ta.

¹⁷Ilala sheesi Umukasya, umunyali wa byoosi umweene aloma nisho shino ari, ‘Intsya khubareerera busoolo, intsala, ni buulwaale, naluundi ikhaabekyelise nibo bafwaane nga kimifigi kikyabola, kikikhanyala ni khuliikha ta.

¹⁸Ari intsya khubakwiila imbahanyekho busoolo, intsala ni buulwaale, shikile kamanaambo ke mu shibala shoosi, keyaange busa. Buli aandu oosi isi nibo bakhaatsye, bakhekyele shitsubo, shiriiso, biinikino naluundi bakhaabe she khuukhomebwa akari mu manaambo koosi isi ikhaabasalanisile.

¹⁹Shino shikhaabakholekhekho shiryo lwekhuuba baayikaana khuwuliilisa biilomo byase, biilomo byeesi imbuya imbakaanisa buli lwaweele, nga imbirira mu bakaanisi baase baŋoosi. Inywe mweesi mwaayikaana khurekeeresa byeesi ise Umukasya samweene imbaboolela.’

²⁰Ni nashiryo inywe baamuli mweesi, beesi nasalanisa khukhwaama mu Yerusalemu mwaatsya i Babulooni, nimuwuliilise buulayi ilomo isi ise Umukasya samweene imbaboolela.

²¹Umukasya umunyali wa byoosi, Wele wa Isiraeli, alikho ni byeesi akanikha bibiwaamba khu Ahabu, umusooleli wa Kolaya, ni Zedekiya, umusooleli wa Maaseya, nga bano boombi nibo babaakanikha buŋoosi bwe bubeeyi mu lisiina lyeewe. Umukasya umweene alaangilila ari atsya khubawaanayo nibo isi Nebukaduneeza, umuyiinga wa Babulooni, abakhoonye nibo nga inywe mubona ni tsimoni tseenywe.

²²Khulwe babeene bano, baamuli babaama mu Yuda, ne ari bali mu Babulooni, bakhaashiraambisatsake nga shitsubo, nga baloma bari, ‘Khali Umukasya akhukholile iwe nga n'akhola Zedekiya ni Ahabu, nga nibo beesi umuyiinga wa Babulooni oosha nga bashiili baalamu.’

²³Shino shikhaabe shiryo lwekhuuba baakhola bibiindu bye mbikho mu Isiraeli; bakhola bye buyeyani ni bakhasi be babesanwa baabwe, naluundi baatsya baakanikha bye bubeeyi mu lisiina lyase, bilomo byeesi ise ikhaabalomelakho indi batsye bakanikhe ta. Bino byoosi ise naabimanya samweene, naluundi indi umujulisi wabyo.” Bilomo bino Umukasya umweene niye ubikanikha.

²⁴Buurume buno bukhaatsye isi Shemaya uwe muunda ya Nehelamu, ukhaatsye umulomele uri,

²⁵“Umukasya umunyali wa byoosi, Wele wa Isiraeli aloma ari: Iwe warumanisa tsibaluwa mu lisiina lyoowo, khuutsya isi babaandu babaali mu Yerusalemu, nga tsitsya isi Zefaniya umusooleli w'omusaayi Mesaaya, ni isi basaayi babaandi boosi. Mu baluwa yino, iwe Shemaya waronela Zefaniya uri:

²⁶‘Umukasya aakhurobora iwe khuuba umusaayi mu shifwo sha Yehoyada, naluundi iwe uli niye umulooleleli we ntsu y'Omukasya. Iwe uli ni khuubona uri umuundu yeesi ubonekha nga umulwaale we kumurwe, uwikholakholanisa khuuba umuŋoosi, umubowakho bitsaangi ni shikyuuma mu milo mweewe.

²⁷Ne ari lwashiina shino ukhaashikhola khu Yeremiya, uwaama i Anasoosi, ubeele akyeenda ekholakholanisa nga umuŋoosi?

²⁸Niye aakha khukhwaakamisibwa lwekhuuba waarumanisile buurume isi baabowe mu Babulooni, nga aloma ari batsya khumenyayo imbuka ngali, ni nashiryo ari baakha batsye mu moni boombakhe tsiintsu, batsikonemwo; babyaale tsinimilo, balye biilyo bibitsowamwo.’ ”

²⁹Aryo umusaayi Zefaniya welwaatsila umuŋoosi Yeremiya ibaluwa iyo.

³⁰Abweene awo, ilomo y'Omukasya yeetsa isi Yeremiya, nga Umukasya amulomela

³¹khuurumanisa buurume bubuwaamba khu Shemaya uwe Nehelamu, isi baabowe boosi, nga buloma buri, “Lwekhuuba Shemaya waababooleele inywe buŋoosi, abe yakhaba nga ise Umukasya naakhumurumanakho ta, nashiryo waakilile inywe khuufukiilisa bubeeyi,

³²Ise Umukasya samweene, intsya khuwa Shemaya uwe Nehelamu shitaambiso, ni babaandu beenda yeewe boosi. Niye s'akhaabekho n'umwitsukhulu na mutweela ukhaaramewo mu baandu bano taawe. Niye singene aramewo mulamu khuubonakho khu biindu biilayi byeesi ise intsya khukholela babaandu baase taawe. Shiba shiryo lwekhuuba niye aaboolela babaandu baase khukhuuminyaalila ise. Ise Umukasya samweene niye ukuukuulile ilomo yino.”