Read lumasaaba Yeremiya 3 Bible Online

Yeremiya 3 - lumasaaba bible

Yeremiya 3

¹Umukasya waakanikha luundi isi babaandu ba Isiraeli ari, “Siinga umuundu awoona umukhasi waarekukha, ne umukhasi tsana uyo waatsya wakhwaalikha w'omuseetsa ukuundi, manya umusaani uyo anyala waatsya weela khu mukhasi uyo luundi? Shino sishinyalikhana ta, lwekhuuba shiba shireera bunyaalu khu shibala isho. Ne bona inywe mwatsya mwaamenya ni ba wele babaandi nga bamalaaya ni batsya baamenya ni basaale babaandi; ari inywe munyala mwaakobola isiindi?”

²“Ari ni mwinyuse tsimoni tseenywe mulole khu ngoongo khu ngaaki, mubone. Manya iliwo shiifwo na shitweela sheesi inywe mukhakholelakho bwamalaaya? Inywe mwekhala khu ndulo khwe tsinguudo nga mwaliindiilile basaale beenywe, nga n'ubona Bawarabu ni baaliindilila babaandu beesi bakana khuwaamba mu mubiimbi. Muryo inywe mwanyaalutaka shibala shoosi lwe bwamalaaya bweenywe.

³Shisheene isho nisho shishakila ifula yaalekha khukwa khu shibala ta, ni fula itsukhiilila mu biheeso yaalekha khuupa ta. Ne abe byakhaba biryo, mwakwaara mwemunyakasa busa nga bamalaaya, mwaalekha khwookesanisakho kamaŋaanyu koosi ta.

⁴Ne ari bona munaanga ise muri indi paapa weenywe, muri ise ndi paapa weenywe khukhwaama mu busooleli bweenywe.

⁵Muntsikoontselela ise muri ikhaba umukhalafu biilo ni biilo ta, muri ikhabakhalalila khukhwoolesa khu ntsakamo ta. Inywe mwakanikhile ibyo byoosi, ne ate nga mwakholile bibyoonako byoosi byeesi mwanyalisa khuukhola.”

⁶Mu mbuka isi Yosiya aabeela umuyiinga, Umukasya aanganikhayo nga aloma ari, “Yeremiya, iwe waaboone ibyo byoosi byeesi Isiraeli uyu, uuli nga umukhasi ukhali umwiyikinwa akholile? Niye ashuukha waandura khusiise, waaniina khu buli lukoongo, naluundi waatsya mwisina mwa buli kuusaala kukwasyebeleela kamasaafu, ibweene iyo, waatsya khuukholelayo bwamalaaya!

⁷Abweene awo ise nambaasa ndi nga waamalile khuukhola bino byoosi, kane ashuukhe akobole isiindi. Ne waalekha khukobola ta, ni yaaya weewe Yuda naye ukhali umwiyikinwa ta, waabona byoosi.

⁸Ise samweene nawa Isiraeli ukhali umwiyikinwa uyo, buurone bwe khuumuwoona arekukhe lwe buyeyani bweewe isiindi. Ne shonyene ndi, yaaya weewe Yuda naye waalekha khuryakho na khakyeekhe khoosi ta, ne naye waatsya waakhola bye bwamalaaya tsana.

⁹Lwekhuuba buyeyani buno baabuyila khuuba shishiindu shishaangu busa, baatsya banyaalutaka shibala shoosi, nga bakhola bye buyeyani mu khwisaaya bifwaani bye kamabaale ni bitsikhi.

¹⁰Ne akari mu bino byoosi, ni yaaya weewe Yuda, naye ukhaaba umwiyikinwa ta, waalekha khukobola isiindi ni kumwoyo kweewe kwoosi ta, ne waashikhola nga emunyakasa busa. Bino ise Umukasya samweene niye ubikanikhile.”

¹¹Lwanyuma ndi Umukasya waanganikhayo ari, abe yakhaba nga ba Isiraeli baamururakho khu niye, ne baaba baalayikho khufuurisa ba Yuda babaaba bemunyakasa luukali busa.

¹²Umukasya waaloma luundi ari, “Yeremiya, ari tsya ukuukuule buurume buno nga waaloleleele kwe ngaaki, ulome uri: Inywe ba Isiraeli babaakhali babeyinikinwa, kobola isi ise. Ise ndi Umukasya uuli uwe shiisa, luundi sikhalala naalobelakho ta. Singene imbaloleleele ni moni iye burafu ta. Ise singene imbakhalalile inywe biilo ni biilo ta.

¹³Sheesi muli ni khuukhola shonyene nisho shino, mufukiilise bubwoonaki bweenywe, naluundi mufukiilise muri mwaaminyaalila Umukasya Wele weenywe, mwaatsya mwesaaya ba wele babaandi mwisina mwa buli kuusaala, nga mubookesa khuukana khweenywe khwoosi. Naluundi mushifukiilise muri mwaaminyaalila likono lyase.” Shino Umukasya umweene niye ushilaangila aryo.

¹⁴Umukasya akuukuula ari, “Ni mushuukhe mukobole, inywe babaana babaakhali babeyikinwa ta, lwekhuuba Iseese niye umukoosi weenywe. Kane ise indoboreyo umuundu mutweela khukhwaama mu buli shiriimba, ni babaandi babili khukhwaama mu buli shikuuka, indyo imbareere khu lukiingi Sayuuni.

¹⁵Lwanyuma imbawe baaraangilisi, babaakane babe nga bakhola byeesi ise samweene imba naabalomeele. Babeene abo kane babaraangilile inywe ni kamakyesi ni khuumanya.

¹⁶Mu bifukhu ibyo ikhaabayimbise mube babaandu baakali naabi, mwitsule mu shibala sheenywe. Babaandu sibalilayo luundi bakanikhekho khu Sanduuku iye Kamakaambila ta. Ilala sibalilayo luundi bakyambaasekho namwe bakishebulie ta, namwe ndi bari bewulile nga balikho bakikana ta, naluundi sibalilayo bakholeyo ikiindi ta.

¹⁷Imbuka iyo nga yeetsile khwoola, shiriimba Yerusalemu shikhaalaangibwe shiri Shitsoloŋo sh'Omukasya, ni kamanaambo kakaaramile koosi, kakheetse kabuusane mu Yerusalemu umwo, khukhwisaaya ni khukhwisamwo lisiina ly'Omukasya shiriifwa. Baryo sibalilayo luundi khuukhola ni khuuloondelela byeesi kimyoyo kyaabwe kye bumiinyi kibaboolela khuukhola ta.

¹⁸Mu bifukhu ibyo, babaandu ba Yuda bakhetubaase ni babaandu ba Isiraeli, nio baryo benyukhile atweela beetse nga baama kwe lubeka lwe ngaaki, batsye mu shibala sheesi nawa bakuuka baabwe, khuuba bumenyo bwaabwe.”

¹⁹Umukasya aloma luundi ari, “Iseese samweene nambaasa luundi naakanikha ndi; niwulila buulayi naabi siinga imbirisa babaandu ba Isiraeli khuuba nga babaana baase, ni khuubawa shibala shishiili shiilayi, shibala shishiifuurayo khuuba shimiliwu mu manaambo koosi. Iseese nakana inywe munaange muri paapa weenywe, nio mulekhe khushuukha khukhuundekha ise ta.

²⁰Ne bona inywe mwafwaana nga umukhasi ukhali umwiyikinwa, urekukha khu museetsa weewe, nanywe muryo, baandu ba Isiraeli, mwabeele babaakhali babeyikinwa ta isi indi. Ise Umukasya samweene niye ushikanikhile ndyo.”

²¹Likono lyawulilikhila khu ngaaki khwe tsingoongo, nga nikhwo khukhwilootsa ni khuulila khwe babaandu ba Isiraeli, lwekhuuba baaborokha mu ntsambaasa tsaabwe, naluundi baayibilila Umukasya Wele waabwe.

²²“Nashiryo ni mukobole inywe, babaana babaaborokha mwaatsya. Ni nase kane imbawonese inywe khukhwaama mu bubi bweenywe.” Nabo beelamwo bari, “Ilala, kane khukobole is'uli, lwekhuuba iwe uli Umukasya Wele weefwe.

²³Ilala ifwe khwaba khu ngaaki khwe tsingoongo nga khwisaaya ba wele babaandi mu khwiyuukaasa khuukali. Ne byoosi byaba bubeeyi busa. Ilala buwonesi bwa Isiraeli bwaama isi Umukasya Wele weefwe.

²⁴Khukhwaamila ilala mu biseela bye busooleli bweefwe, shishiindu she kamaŋaanyu shino she khukhwisaaya ba wele babaandi, shaalya luundi shaamalilawo ilala byoosi byeesi bakuuka beefwe baaraambila luukali; nga nibyo bibyaayo atweela ni kamataala kaabwe, ni khuuyililamwo basooleli atweela ni bakhaana baabwe beene.

²⁵Ari khayo khukone aasi nga khuli mu khuswaala khuukali, tsisoni tsingali tsikhuwaambe, lwekhuuba ifwe fweesi atweela ni bakuuka beefwe khwayonakisa isi Umukasya Wele weefwe. Khukhwaamila ilala mu biseela bye busooleli bweefwe, ifwe sikhwawuliilisa luundi khwakhola sheesi likono ly'Omukasya Wele weefwe liloma ta.”