Read lumasaaba Yeremiya 30 Bible Online

Yeremiya 30 - lumasaaba bible

Yeremiya 30

¹Ilomo y'Omukasya yeetsa isi Yeremiya,

²nga Umukasya Wele wa Isiraeli amulomela ari, “Rona biilomo bino byoosi byeesi ikhubooleele mu shitabo.

³Bifukhu bitsya khwoola isi ikhesileyo ingo babaandu baase ba Isiraeli ni ba Yuda. Ise samweene ikhaabakoboseyo mu shibala shaabwe sheesi nawa bakuuka baabwe, baryo bashiikobosele luundi. Ise Umukasya samweene niye ushikanikhile ndyo.”

⁴Bino nibyo biilomo byeesi Umukasya aakanikha isi babaandu ba Isiraeli ni ba Yuda:

⁵Nga Umukasya aloma ari, “Nawuliile khukhwantsuwa khwe khuuyengukhana, khuulila ukhwo khuli khwe biinikino ne akhuba khwe lukoosi ta.

⁶Ari yireeba wambaase, manya umusaani anyala khuuhesa wasaala umwaana? Ne ari lwashiina indikhuubona buli musaani yeesi uwe kamaani nga wetiilile kamakhono keewe mu shikuute, wafwaana nga umukhasi isi umwaana alikho alya ukana khuusaala? Lwashiina buli mutweela akhosile mu moni?

⁷Shifukhu isho nga shikhaabe she kamaani! Mbaawo shifukhu shishiindi shishikhafwaananekho nga nisho ta. Imbuka iyo ikhaabe imbuka iye kumutaambo isi babaandu baase ba Isiraeli, ne samweene ikhaabawonese nibo babe baalamu.”

⁸Umukasya umunyali wa byoosi ashilaangilila luundi ari, “Shifukhu isho nga sheetsile khwoola, ikhaafuniaakake buusiro abe bubwabakonela khu mabeka kaabwe, ikhalakake kimikosi abe kikyababowa, baryo babaandu banaambo balekhe khubaraambisa nga baabowe luundi ta.

⁹Ne akhali indi nibo bakhaabe nga bakaanisa Umukasya Wele waabwe, n'umuyiinga isi ikhaabaroborere khukhwaama muunda ya Dawudi.”

¹⁰Umukasya ashikuukuula luundi ari, “Nashiryo, inywe babetsukhulu ba Yakobo, mukharya ta; mukhabakho ni biinikino byoosi ta, inywe ba Isiraeli, lwekhuuba ilala mu ŋali mu bweene, ikhaabawonese nga muli mu shibala she aleeyi isho, ni babetsukhulu beenywe khukhwaama mu shibala she bubowe isho. Babetsukhulu ba Yakobo bakhaakobole ingo waabwe nga bali mu lukoosi, bamenye mu lukoosi, nga mbaawo luundi umuundu ubariisariisa nakhari ta.

¹¹Lwekhuuba ise samweene indi atweela ni nanywe, luundi kane imbawonese. Abe yakhaba nga ikhaahesele ilala kamanaambo mweesi nabasalanisila inywe, ne sikhaabahese inywe imbamalewo ta. Ne inywe nanywe ikhaabawe shitaambiso, ne nga ikhaashiboombesekho. Nanywe inywe singene imbalekhe busa nga mwakhufuna shitaambiso ta. Ise Umukasya samweene niye ushikuukuulile indyo.”

¹²Umukasya waakanikha luundi isi babaandu beewe ari, “Kamakoontsyo keesi mufunile sikanyala khuuwonesebwa ta, kamakoontsyo ako kaayinjila naabi sikawona ta.

¹³Mbaawo umuundu na mutweela unyala wekoontselela lwe buulayi bwoowo ta, mbaawo kamasuuswa kakaanyala kakaanga likoontsyo lyoowo ta, naluundi mbaawo kumwiyikino nakuri kwe khuuwonesebwa khwoowo ta.

¹⁴Basaale boowo boosi ari baakhwiibilila, sibalikho ni sheesi bakhwinaanakho luundi ta. Ise naakhwibwakala iwe nga umuundu n'ebwakala umusiku weewe, naluundi naakhuwa iwe shitaambiso nga sh'omusiku, lwekhuuba bubwoonaki bwoowo buli buukali naabi, ni buubi bwoowo sibubalikha ta.

¹⁵Ari shiina kila iwe waantsuwa lwe likoontsyo lyoowo? Butsiina bweesi uli nabwo sibuli bwe khuuwona ta. Ise nakhuweele iwe shitaambiso she kamaani shishifwaana shiryo lwe bubwoonaki bwoowo buukali ni bunyaalu bwoowo bwe kamaani.

¹⁶Ne aluno ari, buli muundu yeesi ukhakakho khuukhutukhuunya iwe, naye bakhaamutukhuunye, na buli mutweela khu baasiku boowo boosi, bakhaayilibwe mu bubowe. Abo boosi babaakhwibakala iwe, nabo bakhaabebwaakale, ni naabo boosi babaakhuyaayakho bibiindu byoowo, nabo bakhaabayaayekho bibiindu byaabwe.

¹⁷Ise ikhaakhukobosele iwe buulamu bwoowo bube buulayi luundi, ni kamakoontsyo koowo ikhaakakaange kawone. Lwekhuuba ari bakhulaanga bari umuundu umuutswa busa: iwe uli Sayuuni isi umuundu yeesi akhenaanakho ta. Bino byoosi Umukasya umweene niye ubikuukuula aryo!”

¹⁸Umukasya akanikha luundi ari, “Ikhaakobosele Yakobo tsikhabi tse khuuba mu bwikhalo bweewe luundi, indyo imaambile buli muungo mwoosi shiisa. Shiriimba Yerusalemu shikhoombekhebwe luundi, ni lubili lwasho lukhoombekhebwe mu shifwo shalwo shisheene.

¹⁹Nio babaandu boosi babaakhaamenyemwo, beembe kimyeenya ni kumwikhoyo, baryo beembe kimyeenya kye sangaalo. Indyo ikhaabalaayise buukali bwaabwe, sibakhaabe bakyeekhe ta. Ikhaabawe tsikhabi babe babaandu be shiriifwa, sibakhaabe babaandu be aasi luundi ta.

²⁰Babaana baabwe bakhaabe nga ni baabatsaka khaalekho, ni lituuli lyaabwe likheelewo lihaangasibwe nga ni lyaba makiboole; indyo ikhaawe abo boosi babaabamiinilisa shitaambiso.

²¹Umuraangilisi waabwe akhaabe mutweela khu nibo babeene, umuwuli waabwe akhaame akari mu nibo babeene. Ikhaamusyeende eetse aambi ni nase samweene; lwekhuuba naanu umweene unyala weetsa aambi ni nase nga naakhumulaanga ta? Ise Umukasya samweene niye ukanikha bibiindu bino.

²²Nashiryo inywe ba Isiraeli mukhaabe babaandu baase, ni nase samweene ikhaabe Wele weenywe.”

²³Ari bona khane, lirima ly'Omukasya liitsa nga ikhuungu, imbewo iye kamaani ikhaawuutse nga shishaafuusi khu mirwe kye babaandu baboonaki.

²⁴Lirima ly'Omukasya liirafu ilyo shilikheeleyo busa ta, khukhwoolesa nga lyaamalile khukhwoolelesa isho sheesi aba waakhalilewo mu mwoyo kweewe. Mu bifukhu bibiitsa mu moni, nimwo mweesi mukhaamanyile bibiindu bino.