Read lumasaaba Yeremiya 31 Bible Online

Yeremiya 31 - lumasaaba bible

Yeremiya 31

¹Umukasya waaloma ari, “Imbuka ikhoole, ise samweene ukhaabe Wele we bikuuka byoosi bya Isiraeli, ni nabo bakhaabe babaandu baase.”

²Umukasya waalaangilila luundi ari, “Babaandu babaakhaawone khuufwa busoolo, bakhewulile buulayi nga baatitukhiile mu mubiimbi. Ise samweene ikheetse imbawe khuuwola khuulayi.”

³Mu biseela bye khaale, Umukasya umweene aababonekhela nibo, nga ali aleeyikho waabalomela ari, “Ise naabakana inywe ni khuukana khukhuukhawawo ta, indyo singene naakamise khuubokesanisa inywe shiisa ni khuukana khuukali ta.

⁴Ise samweene ikhaaboombekhe luundi, muryo nanywe mwoombekhebwe mwiilewo bushaakha. Mukhaasute luundi bibisakaya bye kimyeenya, mubisakayise nga mushina ni kumwikhoyo kumukali.

⁵Mukheeleyo mubyaale kimikuunda kye kimizabibu khu njiinji tsa Samariya, lwanyuma mwabeene mulye bibyaamo byamo.

⁶Lwekhuuba luliba lutweela isi baaliindi bakheemikhile khu ngoongo tsa Efurayimu balaangilile bari: ‘Yinyukha khutsye mu Sayuuni, isi Umukasya Wele weefwe.’ ”

⁷Umukasya aloma ari, “Khulwa Isiraeli nimwiimbe ni kumwikhoyo, mulookhe ni kamaani keene, nio baakhulu be kamanaambo ke aleeyi nabo bawulile. Nimwiimbe, muruuye ni kamaani keene nga muloma muri, ‘Umukasya wonesa babaandu boowo, abo babaaramawo khu baandu ba Isiraeli.’

⁸Ise samweene intsya khubareera khukhwaama mu linaambo liliili khu lubeka lwe ngaaki, imbabuusanise khukhwaama buli aandu oosi mu shibala. Mu nibo mukhaabemo babaabofwaala tsimoni ni baaleme, bakhasi babaali bisoombo, ni naabo babaali aambi khuusaala. Abo babaakhakobole bakhaabe linaambo lye kamaani naabi.

⁹Nibo bakhaabe balila kamasika nga imbakobosa ingo. Samweene ikhaabaraangilile imbayile khu ntsitsi tse kameetsi, nga bakyeendela khu mukhoosi kukukhalikho kamatikwi ta, lwekhuuba ise samweene niye paapa wa Isiraeli, Efurayimu niye umusooleli wase umukiboole.”

¹⁰“Inywe babaandu be mu manaambo, wuliilisa sheesi Umukasya aloma, nanywe mutsye mushikuukuulile mu bibala bye aleeyi muri; ‘Uyo uwasalanisa babaandu ba Isiraeli, umweene niye ukhaababuusanise atweela, naluundi umweene niye ukhaabalolele nga n'ubona umwaayi we kamasheese n'alolelela kamasheese.’

¹¹Lwekhuuba Umukasya umweene niye ukhaasikule babaandu beewe abawonese, abakaangulule khukhwaama mu mukhono kwe linaambo lilibafuurakho nibo kamaani.

¹²Babaandu baase bakheetse khu lukiingi Sayuuni beembe kimyeenya ni kumwikhoyo, bakhasangaale luukali lwe biilayi by'Omukasya biikali. Bakhaafune biwaanwa bye bilime bibulungule, iviini, ni kamafura, nga waareerekho ni kamasheese ni tsikhaafu. Nibo bakhaashuukhekho bafwaane nga kumukuunda kweesi baatsukhiilila kameetsi buulayi, babe buulayi nga sibabonakho kumutaambo luundi ta.

¹³Nio bakhasi babaashiili bakhaana atweela ni basooleli ni baasakhulu beene beetse bashine kamashina ni kumwikhoyo. Lwekhuuba samweene ikhaabawooyewooye nibo, ishuuse kumutaambo kwaabwe kwikyele kumwikhoyo.

¹⁴Basaayi baase bakhaalye biilayi bekurire ilala, ni babaandu baase boosi bakhetsusibwe ni biilayi bye mu shibala. Bino byoosi Umukasya umweene niye ubikuukuula aryo.”

¹⁵Umukasya waaloma ari, “Iliwo likono liliwulilikhila mu Rama, lili likono lye khuulila ni khukhwaantsuwa khuukali naabi, nga Lakeri alila khulwe babaana beewe, nga s'akanakho umuundu yeesi waamuwooyawooya ta, lwekhuuba babaana beewe boosi bahelile baaweelewo.”

¹⁶Umukasya waaloma luundi ari, “Ukheloosela khuulila ta, khuyaka kamasika koowo, lwekhuuba shifukhu shiliba shitweela, ufune kumukheemba lwe buraambi bwoowo. Babaana boowo bakhaakobolake khukhwaama mu shibala she baasiku boowo.

¹⁷Nashiryo iliwo kumwiyikino kwe buulamu bwe buraangisi, ilala babaana boowo bakhaakobole ingo mu shibala shaabwe. Ise Umukasya samweene niye ukhubooleele indyo.”

¹⁸“Ilala ise naawuliile babaandu ba Efurayimu[8] nga batoloola kamasika, nga buli mutweela anomela ise ari, ‘Iwe waamba ise shitaambiso ni nafwaana nga imoosi italima, ni nase ari naayilamo tsisaambo. Inoomba untsisemo kamaani luundi, ni nase kane ingobole, lwekhuuba iwe uli Umukasya Wele wase.

¹⁹Lwekhuuba ise ninaborokha naakoraana, nakobola nekhupa mu shifuba nebiiyisa. Ise nawulila nga naswaalile naabi, nakaraangarana busa, lwekhuuba naba nga netyuukhile bubwoonaki bwe busooleli bwase.’

²⁰Efurayimu, iwe s'uli niye umwaana wase isi ingana naabi? Iwe s'uli umwaana isi ise nikhoyela luukali? Abe yakhaba nga imbuka ikiindi ikhukhaabila nga ndi khuukhukanikhayo, ne imba nga ikhushebulila buulayi. Ni nashiryo uli mu byambaaso bye mu mwoyo kwase mukari; indyo ikhuwaambila shiisa luukali. Ise Umukasya samweene niye ukuukuulile ilomo yino.”

²¹“Nimusimikhe bipaande bibilakilila kumukhoosi, luguudo mululime buulayi nga murakho bibyokesa buulayi, mumanye buulayi kumukhoosi kweesi muwaamba khuutsiilakho. Nashiryo baandu ba Isiraeli, nimukobolake mu biriimba byeenywe byeesi mwalekha.

²²Inywe kane mwoolese liina khuusaamba eyi ni neeyi, inywe babaandu babaakhali babeyikinwa ta? Bona, Umukasya atsya khurawo shishiindu shaburaawa khu shibala: nga nisho umukhasi khuukhiinga umusaani.”

²³Umukasya umunyali wa byoosi, Wele wa Isiraeli aloma ari, “Nga ise neetsile khukobosa luundi babaandu mu shibala sha Yuda, ni khuubeesa mu biriimba byaabwe, khukhwaama mu bubowe, bakhaalome bari, ‘Khuloomba khuri khali Umukasya akhuweele tsikhabi iwe lukiingi lukhosefu, khweesi Wele amenya!’

²⁴Babaandu bakhaamenye atweela mu shibala sha Yuda, atweela ni mu biriimba byasho. Batweela khu nibo bakhaabe baalimi ni baalala babe babaayi be bibyaayo.

²⁵Abo boosi babaakhaabe nga baweelemo kamaani luundi nga baaluwile, bakheesibwemo luundi kamaani bushaakha.

²⁶Lwashino babaandu bakhaalome bari, ‘Natsiile khukona liilo, nenyukha nga neelilemo kamaani bushaakha.’ ”

²⁷Umukasya waaloma luundi ari, “Bifukhu bilikho biitsa, luundi bikhoole, isi ikheetsusile babaandu ni bisolo mu shibala sha Isiraeli ni sha Yuda

²⁸Iseese samweene niye uwaloleelela nga babaakhuula babayila, nabona nga babafuuntsaka, baabakwiisa, baabahesa luundi nga bukosi buboolakho. Ni musaambo niyo ndweela, shifukhu isho nga sheetsile khwoola, indi samweene niye ukhaabalolele nga babyaalikha luundi, indyo imbayeete babalaahe buulayi.

²⁹Imbuka iyo nga yeetsile khwoola, babaandu sibaliilayo luundi bakanikha luukano luno bari, ‘Basaali nibo babaalya kimisabibu kikyaluluwa, baalekhela babaana baabwe khuurafuwa khwe kameene’ ta.

³⁰Ne buli muundu yeesi uwoneka, akhaafwe lwe bubwoonaki bweewe; uyo uulya kimisabibu kikyaluluwa, niye ukhaafune khuurafuwa khwe kameeno.”

³¹ Umukasya waaloma luundi ari, “Imbuka ikhoole, isi ikhaakholele indakaano ni babaandu ba Isiraeli atweela ni babaandu ba Yuda.

³²Indakaano iyo sikhaabe nga indakaano iyanyoowa isi ise nakhola ni bakuuka baabwe, iyo isi nakhola ni nabo nga mbarusa khukhwaama mu shibala she Misiri ta, lwekhuuba niyo baakyelawo baakifuniaaka. Abe yakhaba nga nafwaana nga umuseetsa isi bali, ne sibaaloondelela indakaano iyo ta. Ise Umukasya samweene niye uuli khuukuukuula bilomo bino.”

³³“Ne indakaano isi intsya khukhola ni nabo ikhaafwaane iri: ‘Ise ikhaarone kamakaambila kaase khu myoyo kyaabwe ni mu byambaaso byaabwe. Ise samweene ikhaabe Wele waabwe, ni nabo bakhaabe babaandu baase.

³⁴Mbaawo umuundu na mutweela ukheeleyo luundi khuuleekela umwesanwa weewe, namwe waandaaye, nga amulomela khukhuumanya ise ta, lwekhuuba boosi bakhaabe nga baayimanya ise khaale, khukhwaamila ilala khuwe aasi, khuutsya khwoolela ilala khu muundu ufuura bukhulu. Shino ise Umukasya samweene niye ushikanikha. Lwekhuuba ikheyakhile buli muundu bubwoonaki bweewe bwoosi, naluundi sikhaashebulilekho buubi bwaabwe bwoosi ta.’ ”

³⁵Umukasya waaloma luundi ari, “Ise lisiina lyase niye Umukasya umunyali wa byoosi, uulakila inyaanga khuurusa buwaanga bwayo kumuusi, naalakila kumweesi atweela ni tsinieenieesi khuurusa buwaanga bwabyo shiilo, naluundi naatabula kameetsi ke mu inyaantsa kelyeebula.

³⁶Bibiindu bino naabilakila khuuba biryo paka, sibishuukhakho ta, nashiryo nga nibili, ni linaambo lye babaandu ba Isiraeli nalyo nga nikane libe khuumala kimiboolo kyoosi mu moni tsase. Ise Umukasya samweene niye ukuukulile biilomo bino.”

³⁷Umukasya waaloma luundi ari, “Manya iliwo umuundu yeesi unyala waapima buubalaayi bwe liikulu? Iliwo umuundu unyala waaheentselesa bye aasi mu musiingi kwe mwiloba we shibala waabimalayo? Nga bino nibikhanyalikha ta, nase indyo samweene sinyala naalekha babaandu ba Isiraeli ta, abe yakhaba nga baayonakisa naabi mu moni tsase. Ise Umukasya samweene niye ulomile bibiindu bino.”

³⁸Umukasya waashikuukuula ari, “Imbuka ikhoole isi shiriimba shase Yerusalemu shikhombekhebwe bushaakha khukhwaamila ilala khu munaala kwe Hananeli khukhuutsya khwoola khu Shilibwa Koona.

³⁹Lukhoba lulupima bakhaalukhweese lwilooseleyo khuutsya luwaambilemwo lukoongo Garebu, waamala luwete lutsye luwaambe ni Gowa.

⁴⁰Litila lyoosi mweesi basiikha baafu, ni isi batsukha kamaandu, ni khuutsya khuwaambilamo kimikuunda kye mu litila lya Kidironi, ni khuutsya khwoolela ilala khu luwaande lwe bwaamanyaanga, khu shilibwa she tsiŋwaaŋwa. Bisiintsa bino byoosi bikhaabe bikwalaafu isiindi. Shiriimba isho sishikheeleyo luundi khuukhulibwa, namwe bari shoonakisibwe luundi ta.”