Read lumasaaba Yeremiya 32 Bible Online

Yeremiya 32 - lumasaaba bible

Yeremiya 32

¹Ilomo y'Omukasya yeetsa isi Yeremiya, mu mwiiko kwe likhumi kwe buwuuli bwa Zedekiya nga niye umuyiinga wa Yuda, naluundi nga nikwo kumwiiko kwe likhumi na shinaane kwe buwuuli bwa Nebukaduneeza, nga niye umuyiinga wa Babulooni.

²Khu mbuka nyene iyo, umuyiinga wa Babulooni aaba nga atsya khwiibwakala Yerusalemu, ni Yeremiya naye umweene abe ali umubowe mu lwaanyi lwe mu lubili lw'omuyiinga.

³Zedekiya umuyiinga wa Yuda niye uwalakila ari bamubowele ibweene iyo, nga amutsuntsumilisa ari lwashiina aboola buŋoosi bubwaama isi Umukasya bubuuloma buri, “Umukasya umweene atsya khuwaanayo shiriimba isi umuyiinga wa Babulooni, ashiwaambe ashiyile,

⁴n'umuyiinga Zedekiya uwa Yuda, s'akhaatitukhe awone ta. Umweene atsya khuwaanibwayo isi umuyiinga wa Babulooni, babonane imoni khu moni, luundi bakanikhane nga baalolelaniile.

⁵Zedekiya atsya khuyilibwa i Babulooni, amenye ibweene iyo khukhwoolesa nga naamalile khuumukhola sheesi ingana. Abe Zedekiya aakhasoolanisa ba Babulooni arye, s'akhaanyale khuubafuura mu busoolo ta. Ise Umukasya samweene niye ushikanikhile ndyo.”

⁶Yeremiya waaloma ari, “Ilomo y'Omukasya yaantsitsila nga iloma iri:

⁷Shaananyina shoowo Hanameli, umusooleli wa Shalumu, khootsa woowo, akheetse khuukhubonakho. Lwanyuma akhuloombe ari umukulekho liiswa lyeewe liliili aambi ni shiriimba Anasoosi, lwekhuuba iwe niye umulebe weewe uwe aambi naabi, nashiryo buli buufunisi bwoowo, khuubona uri ukula kumukuunda ukwo.”

⁸Lwanyumakho Hanameli tsana weetsa nga ilomo y'Omukasya niyaloma. Aryo weetsa isiiindi akari mu lwaanyi lwe mu lubili, waanoomba ari imukulekho kumukuunda, nga aloma ari, “Ikhuloomba ungulekho kumukuunda kwase kukuuli aambi ni Anasoosi, mu shibala sha Benyamini. Iwe uli ni bufunisi bwe khuusikula kumukuunda kuno nga ukukula, nio kurame mu be muungo mweefwe.” “Iseese naba naamanyile buulayi ndi Umukasya umweene waandakiile khuukuukuula bilomo bino.

⁹Shishakila naatsya naakula khu shaananyina shase Hanameli liiswa abe liliili i Anasoosi, naamubalila tsinusu tsitsoola buukusi bwe bisiintsa likhumi na musaafu bye feetsa.

¹⁰Indyo neesakho kumukhono khu ndakaano, naakibowakho buulayi, nga indi ni baajulisi ni naba nga imbimaka tsinusu tse feetsa khu bipiima.

¹¹Lwanyuma naasuta tsindakaano tsye khuukulaana itsyo, nga naabowele ndweela buulayi, nga mulimo khuufukiilisana khwoosi, ni kopi ikiindi ikhaaba imbowekho ta

¹²naakiyila naakyakaanisa Baruki, umusooleli wa Neriya, umwitsukhulu wa Mahiseya, nga Hanameli umweene niye umujulisi wase, ni Bayudaaya babaandi babeesakho kimikhono kyaabwe nga khuukulaana, atweela ni Bayudaaya babaaba nga bekhaale mu lwaanyi lwe baaliindi.

¹³“Nga boosi baaloleleele, nalakila Baruki ndi:

¹⁴Umukasya umunyali wa byoosi, Wele wa Isiraeli umweene waalakiile ari uyile tsindakaano tse khuukulaana tsino tsoombi: iyo iili imbowekho, ni neeyo ikhali imbowekho ta, utsye utsire mu nyuungu isi baabuumba khukhwaama mu liloba, mweesi tsinyala tsaamenya imbuka indeeyikho.

¹⁵Naluundi Umukasya umunyali wa byoosi, Wele wa Isiraeli umweene aloma ari, tsiintsu, kimikuunda atweela ni tsinimilo tsoosi, bikhaakulibwe bimalibwewo byoosi mu shibala shino.”

¹⁶Indyo nga naamalile khukhwakaanisa tsindakaano tse buukusi tsino isi Baruki umusooleli wa Neriya, naawayo khuuloomba khwase isi Umukasya, nga inoomba ndi:

¹⁷“O Umukasya, iweewe niye ukhola liikulu ni shiibala, nga uraambisa bunyala bwoowo, ni kumukhono kwoowo kwe kamaani. Mbaawo shishiindu na shiri shishinyala shakhukhaasa iwe taawe.

¹⁸Iwe wookesanisa khuukana khoowo isi biikana ni biikana, ne lwanyuma waawa babaandu bitaambiso lwe bubwoonaki bwe basaali baabwe. O Umukasya Wele, iwe uli Wele umukhulu naabi naluundi uli umunyali wa byoosi.

¹⁹Uraambisa kamakhula koowo waakhola tsiŋoonaŋoona tsoowo, naluundi waakhola buraambi bwe kamaani. Iwe ubona buli shiindu shoosi sheesi babaandu bakhola, lwanyuma waasasula buli mutweela nga buraambi bweewe bweene ni buli.

²⁰Khaale ni khaale, iwe wakhola bye kamakaanga ni bibiindu bibiindi bibiyaangisa biikali mu Misiri, naluundi waayiloosela khuukhola biikali ni shaleelo shino, mu Isiraeli mweene, ni mu baandu boosi mu shibala. Uryo waayikholela lisiina lye kamaani.

²¹Mu khuraambisa bye kamakaanga ni bibiyaangisa biikali ibyo, wanikinisa ba Misiri, shaakila lwe kumukhono kwe kamaani ukwo, waarusayo babaandu boowo.

²²Uryo wamweene waabawa liiswa lino, liliili liilayi mu khulima biilyo, nga ni wasuubisa bakuuka baabwe.

²³Ne nibo ni beetsa benjila mu shibala shino, baashiyila shaaba shishaabwe, ne baalekha khuuloondelela kamakaambila koowo ta, naluundi baalekha khutsiila khu byeesi wabaleekela ta, baryo baalekha khukhola nga iwe niwabalakila ta. Isho shaakila waabareerakho buwaangafu buno bwoosi.

²⁴“Bonakho shiriimba shoosi ba Babulooni baashibotokheleele, balikho bashibwakala, bakana khushiyila. Lwe busoolo buukali, intsala atweela ni buulwaale, shiriimba Yerusalemu shitsya khukwa mu makhono ke baasiku. Ilala, iwe ushibonela ilala uri byeesi waloma byooleleele.

²⁵Ate nga iwe Umukasya umunyali wa byoosi wamweene, niye uwandakila ise khuukula liiswa lino mu moni tse bajulisi, abe yakhaba nga shiriimba shino shitsya khuwaambibwa ni Babulooni.”

²⁶Lwanyuma Umukasya waakanikha isi Yeremiya ari,

²⁷“Iseese niye Umukasya Wele uwula babaandu be mu shibala shoosi. Wambaasa uri iliwo shishiindu sheesi ise ikhanyala khuukhola ta?

²⁸Shaŋali ndi ise Umukasya samweene, intsya khuwaanayo shiriimba shino isi ba Babulooni, ni isi Nebukaduneeza, umuyiinga wa Babulooni; kane beetse bashibwakale bashiwaambe.

²⁹Ba Babulooni kane beetse bashisoolanise, lwanyuma bashiwaambisekho kumulilo, bashooshe shoosi shiweele aasi, atweela ni tsiintsu tsoosi: khu bisuli khwatso khweesi babaandu baakhalasila ise, nga ni bookha bubaane isi Bayaali, naluundi nga bareerera ba wele babaandi biwaanwa bye khuunywa.

³⁰Khukhwaamila ilala khaalekho, mu byaamayo bye babaandu ba Isiraeli ni ba Yuda, babaandu bano boosi batsya nga bakhola bibiindu biibi bibiikhasangaasa ise, nga Umukasya ta, shaakila naakhalala naabi lweebyo byeesi bakhola ni kamakhono kaabwe.

³¹Khukhwaamila ilala khu mbuka isi shoombekhebwa, khukhwoolesa ni shaleelo shino, shiriimba shino shaaba nga shisuluusa lirima lyase ni buurafu bwase. Shikila naakhalilewo khuushihesa shiwewo mu moni tsase.

³²Babaandu ba Isiraeli atweela ni ba Yuda baatsya nga basuluusa lirima lyase lwe buubi bwaabwe bweesi bakhola; babaandu babeene atweela ni bayiinga ni baaraangilisi baabwe, ni basaayi atweela ni baŋoosi beene.

³³Baryo baashuukha baakhupa ise kumukoongo, baaloba khukhuungobolayo isiise ta. Abe yakhaba nga kimiluundi swa busa, samweene natsya nga imbaleekela, ne nibo baalekha khukana khukhuundekeeresa ise ta, namwe khuuwaamba byeesi imbaleekela ta.

³⁴Ni shishiindi baatsya baara bifwaani bye ba wele babaandi mu Lisaayilo lyase Likhulu, lililaangibwa lisiina lyase, baalyoonakisa.

³⁵Naluundi boombekhela Bayaali bibyeeso mu litila lya Beni Hinomu, khweesi baatsya bawaanilakho basooleli ni bakhaana baabwe nga tsisaayilo isi wele Moleki. Ise samweene sinabalakilakho khuukhola shishiindu nga shino ta, namwe abe shaakhwiitsatsakakho mu byambaaso byase ndi banyala baakholayo shishiindu she mbikho nga shino, khuukila babaandu ba Yuda boonakisa ta.”

³⁶Umukasya Wele wa Isiraeli waanganikhayo luundi ari, “Yeremiya, byeesi ukanikha bili byaŋali. Ilala babaandu be mu Yerusalemu balikho babonabona lwe buusoolo, intsala ni buulwaale, bibikhaakile umuyiinga wa Babulooni eetse ashiwaambe khaangu naabi. Ne ari reekeresa sheesi ise Umukasya samweene inganikha.

³⁷Iseese samweene intsya khubuusilisa babaandu bano imbaruse mu manaambo isi nabasalanisila lwe lirima ni buurafu buukali; Ilala ikhaabakobose mu shifwo shino, imbalekhe bamenyemwo ni lukoosi luukali.

³⁸Abweene awo nibo bakhaabe babaandu baase, ni nase samweene ikhaabe Wele waabwe.

³⁹Ise ikhaabawe nibo kumwoyo mutweela ni kumukhoosi mutweela, nio babe nga bali ni khuurya lisiina lyase ni khukhuuntsisamwo ise lukoosi, lwe buulayi bwaabwe, ni lwe buulayi bwe babaana baabwe.

⁴⁰Ise ikhaakhole ni nabo indakaano iye biilo ni biilo. Ise sikhaakamise luundi khuubakholela biilayi ta, ikhaabaremo kumwoyo kwe khuurya lisiina lyase, nio balekhe khuborokha luundi khukhuundurakho nakhakyeekhe khoosi ta.

⁴¹Ise ikhasangaale naabi nga indikho imbakholela nibo bibiindu biilayi byonyene, naluundi ikhaabareere ni kumwoyo mutweela, imbare mu shibala shino, bashimenyelemo ilala biilo ni biilo.

⁴²“Nga ise Umukasya samweene ninareera buukosi buno khuukwa khu baandu bano, indyo samweene ikhaabareerere buyiindifu bweesi nabasuubisa.

⁴³Ukhaabone babaandu bakulaka kamaswa luundi keesi iwe uli khuuloma uri ‘kamaswa kaayonekha, kaawamo kumukaso, simulimo babaandu namwe bisolo ta, lwekhuuba kaweebwayo isi ba Babulooni.’

⁴⁴Luliba lutweela, babaandu baraambise ifeetsa khuukulaka kamaswa buli aandu oosi, luundi babe nga beesakho kimikhono khu ndakaano tse khuukulaana, batsibowekho buulayi, nga iliwo bujulisi mu shibala sha Benyamini shoosi, mu byaalo bibibotokheleele Yerusalemu, ni mu biriimba bye mu Yuda, ni mu biriimba bye mu shibala she mu ngoongo, ni mu biriimba bye mu shibala she mwaalo. Ise ikhaakobosele babaandu liiswa lyaabwe. Ise Umukasya samweene niye ulomile bibiindu bino.”