Read lumasaaba Yeremiya 33 Bible Online

Yeremiya 33 - lumasaaba bible

Yeremiya 33

¹Ilomo y'Omukasya yeetsa isi Yeremiya kumuluundi kwe khaabili, nga niye ashiili umubowe mu bunyala bwe baaliindi mu lubili, nga iloma iri,

²“Umukasya umweene uwabuumba likulu ni shibala, khuubawo biilo ni biilo, aloma ari, ‘Umukasya nilyo lisiina lyeewe.’

³Aloma ari, ‘Nimuntsikhuunge, ni nase kane imbeelemo, luundi imbaboolele bibiindu bye kamaani, luundi bibikhamanyikhana ta, byeesi abe mukhaamanyakho nakhari ta.’

⁴Lwekhuuba ise Umukasya Wele wa Isiraeli, inganikha bibiwaamba khu tsintsu tsitsiili mu shiriimba shino sha Yerusalemu, ni biifwo bye lubili bye mu Yuda, byeesi baasalanisaka lwe khukhwibwakalibwa khukhwabawo ni lurima.

⁵Ba Babulooni bakheetse basoolane ni nabo, baryo betsuse tsiintsu tsaabwe ni kimilaambo kyaabo beesi intsya khukhoonya lwe lirima lyase ni buurafu bwase. Intsya khwiibisa khu shiriimba shino, mbaawo ukhaambonekho ta lwe bubwoonaki bwaabwe.

⁶Lwanyuma imbuka ikhoole isi ise Umukasya samweene ikhaawonesile shiriimba shino, babaandu baamwo babe buulayi. Ikhaabawonese, nio bekhoyele mu lukoosi lulukhawawo ta.

⁷Ikhaakobose babaandu ba Yuda ni ba Isiraeli khukhwaama mu bubowe, imbeseyo imbombekhe bushaakha, babe nga ni baaba makiboole.

⁸Ikhaabasiinge imbakhosese khukhwaama mu bubwoonaki bwaabwe bweesi baakhola isi ise, indyo ikheyakhile bibyoonako byaabwe ni bumiinyi bwaabwe isi ise.

⁹Nio lwanyuma shiriimba shino Yerusalemu shireerere babaandu baamwo kumwikhoyo, shiriifwa ni khuuba buulayi. Ni babaandu be mu buli linaambo bakhaabe ni khuurya khuukali, banikine nga baawuliile khu biilayi byeesi babaandu be mu Yerusalemu bali nabyo, ni lukoosi lweesi imbawa.”

¹⁰Umukasya aloma luundi ari, “Inywe babaandu muloma muri shiifwo shino shili kumubiimbi mbaamo biilayi ta, nga mbaamo babaandu namwe bisolo ta. Ate nga mu biriimba bya Yuda, ni mu nguudo tse mu Yerusalemu, mwaalekhebwa busa nga mbaamo muundu namwe bisolo ta. Ne lwanyuma, mukhaawulile luundi nga

¹¹iliyo khukhwiimba khwe kumwikhoyo ni sangaalo, lwekhuuba ikhaabeyo umusaani n'umweeha weewe, nga waatubaasilemo ni naabo babareera biwaanwa bye khuusiima mu Lisaayilo likhulu nga baloma bari, Ni muwaaneyo khuusiima khweenywe isi Umukasya unyala byoosi, lwekhuuba Umukasya niye ali umulayi, khuukana khweewe khubawo biilo ni biilo. Ise samweene ikhaakhole shiibala shino shibe shiyiindifu nga ni shaba makiboole. Ise Umukasya samweene niye ushikanikhile.”

¹²Umukasya umunyali wa byoosi aloma ari, “Mu shibala shino shishiili shishoomu busa, nga mbaamo babaandu ni bisolo ta, shikhekyele kamaayilo isi kamasheese kanyoolela khuulya buulayi.

¹³Mu biriimba bye shibala she mu ngoongo, ni biriimba bye shibala sha Shefela, ni mu biriimba bye mu shibala she mwaalo sha Negevu, mu shisiintsa sha Benyamini, mu byaalo bibibotokheleele Yerusalemu, ni mu biriimba bya Yuda, babaayi bakheeleyo luundi khuubala kamasheese kaabwe. Ise Umukasya samweene niye ukuukuula bibiindu bino.”

¹⁴Umukasya aloma luundi ari, “Imbuka ikhoole isi ikhoolelesile bisuubiso byase byeesi nakholela babaandu ba Isiraeli ni ba Yuda.

¹⁵Imbuka iyo nga yeetsile khwoola, ni musaawa inyene, ikhaareerewo umuyiinga ukuundi, khukhwaama mu shikuuka sha Dawudi. Umuyiinga uyo, akhaabe ukhola byaŋali ni bye bubweela mu shibala.

¹⁶Khu mbuka iyo babaandu ba Yuda bakhaabe buulayi, ni Yerusalemu shikhaabe shiriimba she lukoosi. Babaandu bakhaashilaangatsake bari, ‘Umukasya niye ureera bukwalaafu.’

¹⁷Ise Umukasya samweene ishilaangilila nga isuubisa ndi buli mbuka, ikhaabatsakewo umuyiinga wa Isiraeli uuli mutweela khu betsukhulu ba Dawudi.

¹⁸Ni basaayi babaama mu luruungo lwe ba Levi sibakhaataambekho luundi umuundu utsya khuwaanayo tsisaayilo tsintsoshe nga umusaayi ta, ni khukhwoosha biwaanwa bye bilime bibulunguule, ni khuureera tsisaayilo ta.”

¹⁹Umukasya waalomela Yeremiya luundi ari,

²⁰“Sheesi ise Umukasya inoma nisho shino ndi, ise naakhola indakaano yase ni kumuusi atweela ni shiilo, nisho shishiikila byeetsila khu mbuka yabyo nga biloondekhana busa. Inywe simunyala khuufuniaaka indakaano iyo isi ise nakhola ni nabyo ta.

²¹Ni musaambo niyo ndweela, inywe simunyala khuufuniaaka indakaano yase isi nakhola n'umwakaanisi wase Dawudi, ni be muungo mweewe ta, ni ndakaano isi nakhola ni basaayi be luruungo lwa Levi, iye khuuba nga nibo babaakaanisa khu sheeso shase ta.

²²Ise samweene ikhaakhole babetsukhulu ba Dawudi, umwakaanisi wase, atweela ni ba Levi babaantsakaanisa ise sheeso shase, babe baakali babaakhabalikha ta, nga n'ubona tsinieenieesi tse mwikulu, namwe babe babaakhapimikha ta, nga n'ubona kumuyekhe kwe khu ndulo khwe nyaantsa.”

²³Umukasya waalomela Yeremiya luundi ari,

²⁴“Iwe waakhushiwulilakho nga babaandu banaambo ni bali khuuloma bari, ise Umukasya narobora buyiinga bubili: bwa Isiraeli ni Yuda, ne ari naabashuukhilekho naabekaanile ta? Ari shisheene isho nisho shishikila nibo baalekelesa babaandu baase, balekha khubayila nga linaambo ta.

²⁵Ne ari sheesi ise Umukasya samweene inoma nisho shino ndi, ise nakhola indakaano yase isi ni kumuusi ni shiilo isi ikhanyala naafuniaaka ta, naluundi naarawo biilakilo bibiwaambiliila shibala ni likulu byarama nga bili mu shifwo shabyo.

²⁶Nashiryo, nga ni nakhola bino byafwaana biryo, indyo kane iname nga intsiila khu ndakaano yase isi nakhola ni babetsukhulu ba Yakobo, atweela ni Dawudi umwakaanisi wase. Ise samweene ikhaafukiilise mutweela khu betsukhulu ba Dawudi abe nga umuwuli we lisaaye lye babetsukhulu ba Iburayimu, Isaaka ni Yakobo. Ise samweene ikhaabawaambile shiisa, imbeesilewo bibyonekha, babe buulayi luundi.”