Read lumasaaba Yeremiya 34 Bible Online

Yeremiya 34 - lumasaaba bible

Yeremiya 34

¹Umukasya waakanikha isi Yeremiya luundi. Khu mbuka iyo Nebukaduneeza umuyiinga wa Babulooni, ni liiye lyeewe, atweela ni kamahe ke kamanaambo ni bikuuka bye babaandu beesi aaba nga awula, beetsa bebwakala Yerusalemu ni biriimba bibibotokhelelewo byoosi.

²Umukasya Wele wa Isiraeli waamulomela ari, “Tsya isi Zedekiya umuyiinga wa Isiraeli umulomele uri, sheesi Umukasya aloma nisho shino ari: ‘Ise Umukasya indi aambi khuuwaanayo shiriimba shino isi umuyiinga wa Babulooni, ni naye akheetse ashooshe ni kumulilo, shoosi shiweele aasi.

³Iweewe wamweene s'ukhaanyale khuutitukha khuubaruramo ta, bakhaakhuwaambe, bakhuwaaneyo isi umuyiinga wa Babulooni. Iwe ukhaabone umuyiinga wa Babulooni uyo, ni tsimoni tsoowo tsinyene, ukanikhane ni naye imoni khu moni. Lwanyuma bakhaakhuyile i Babulooni.

⁴Ne abe byakhaba biryo, iwe Zedekiya, ise Umukasya akhusuubisa ndi, s'ukhaafwiile mu busoolo ta.

⁵Iwe ukhaafwe mu lukoosi. Nga babaandu ni baakholatsaka bibyeeso, bookhelakho bubaane, nga basiikha bakuuka boowo, bayiinga babaakhunyoowa iwe, musaambo niyo ndweela nawe bakhaakhureerewo shisheeso nga bakhushebulila iwe mu mutaambo kumukali. Bakhaabe nga baantsuwa, nga belootsa bari, “O yaaya, iwe umuyiinga weefwe waafwa!” Ise Umukasya samweene niye uuli khuukhola shisuubiso, naluundi ise samweene niye ushikanikhile.’ ”

⁶Lwanyuma umuŋoosi Yeremiya waatsya waakanikha biilomo bino byoosi isi umuyiinga Zedekiya uwa Yuda mu Yerusalemu.

⁷Aabikanikha aryo nga umuyiinga wa Babulooni alikho ebwakala shiriimba Yerusalemu, atweela ni biriimba bibiindi bye mu Yuda bibibotokhelelewo nga Lakishi ni Azeka. Bino byaba biriimba byonyene bibyaba byaaramawo mu Yuda, bibyabakho tsimako tse kamatikiiyi.

⁸Umukasya waakanikha ilomo yeewe luundi isi Yeremiya, nga umuyiinga Zedekiya waamala khaale khuukhola ni babaandu be mu Yerusalemu indakaano, khuulekhuula baakulwa boosi bafune lukoosi.

⁹Yaba ndi buli muundu abe ali ni khuulekhuula baakulwa ba Heburaniya boosi, mumwabamo bakhasi ni basaani, ilekhe khuubawo umuundu yeesi uramisa umu Heburaniya washeewe mu bubowe ta.

¹⁰Baryo babaandu boosi atweela ni baakhulu baabwe baafukiilisana baakhola indakaano yino, khuulekhuula baakulwa boosi: basaani ni bakhasi, ni khuulekha khwiilayo luundi khuubakhola babe baakulwa ta. Baryo baafukiilisana baabalekhuula.

¹¹Ne lwanyuma lwe mbuka ifwiiti iri, baashuusakho bibyambaaso byaabwe, baatsya baawaambaka luundi baakulwa beesi baaba balekhuulile, baabakobosa babeesa mu bubowe luundi.

¹²Umukasya waakanikha luundi ilomo yeewe isi Yeremiya,

¹³Nga amulomela ari, “Ise Umukasya Wele wa Isiraeli inoma ndi: Ise nakhola indakaano yase ni baakuuka beenywe khu mbuka isi nabarusilayo i Misiri, naabalekhuula mu bukulwa, mwaaba balekhuule. Iseese samweene nabalomela ndi,

¹⁴‘Lwanyuma lwe kimiiko musaafu nga kyaweelekho, buli mutweela khusiinywe aakha khuulekhuula umu Heburaniya washeewe isi aakula. Lwanyuma lwe khuukhwakaanisa iwe khuumala kimiiko kisesaba, waakha khuumulekhuula abe umulekhuule.’ Ne bakuuka beenywe baalekha khuwuliilisa sheesi ise nabalomela ta.

¹⁵Imbuka ikhali iye aleeyi ta, mwebiyiisa, mwashuusakho bibyambaaso byeenywe, mwakhola shishiindu shishasangaasa ise. Muryo mweesi mwafukiilisana khuulekhuula ba Isiraeli basheenywe khuufuna lukoosi. Mwelooselayo mwaakhola indakaano khuukhwoomisa shishiindu shino, nga mukikholela mu Lisaayilo lyase Likhulu.

¹⁶Ne lwanyuma mwakyelawo mwashuukhakho luundi mwaakhoomyaasa lisiina lyase; nga buli mutweela khusiinywe waashuukhilekho waakobosile umukulwa weewe uwe saani n'uwe khasi abe isi aalekhuula khuutsya isi akana yoosi. Bona inywe mwaabahaanyiinya khukhwikyela baakulwa beenywe indi luundi.

¹⁷Nashiryo sheesi ise Umukasya inoma nisho shino indi, inywe mwaayimiinyaalila ise, mwaloba khuuwa ba Isiraeli basheenywe lukoosi lwaabwe. Ni nase Umukasya, indyo ari inaangilila khuukaangululibwa khweenywe, nga nikhwo khuukaangululibwa khwe khuufwa ni lurima mu busoolo, buulwaale ni ntsala. Intsya khureera shiriiso shiikali naabi mu buyiinga bwoosi bwe mu shibala khulweenywe.

¹⁸Babaandu boosi babaafuniaaka indakaano isi baakholela mu moni tsase, balekha khwoolelesa bibikanibwa bibyakironebwamo ta, kane imbafwaanise nga imoosi isi bakhalamo bisiintsa bibili, eyi ni neeyi, lwanyuma baakyeenda baabirira akari e bisiintsa ibyo.

¹⁹Baakhulu be mu shibala sha Yuda ni mu Yerusalemu, baakhulu be lubili lw'omuyiinga, basaayi atweela ni babaandu boosi babaakyeendela akari e bisiintsa bye moosi isi baakhalakamwo iyo,

²⁰intsya khubawaanayo isi baasiku baabwe be mu manaambo, nga nibo babaakana naabi khuubahesa. Nashiryo kimilaambo kyaabwe kikhekyele bye khuulya isi binywiinywi bye mu ngaaki, ni isi bisolo bibikyeendela khu shibala.

²¹Naluundi intsya khuwaanayo Zedekiya umuyiinga wa Yuda, atweela ni baakhulu be mu lubili lweewe isi baasiku baabwe, babaakana khuubahesa. Ilala intsya khubawaanayo isi liiye lye ba Babulooni, lilibeele nga abe lyaayakamisa busoolo isi muli.

²²Ise nga Umukasya, ntsya khuwa shiilakilo, baasiku abo bakobole mu shiriimba shino, bashisoolanise, bashiyile, bashirekho kumulilo bashooshe shikwe aasi.”