Read lumasaaba Yeremiya 35 Bible Online

Yeremiya 35 - lumasaaba bible

Yeremiya 35

¹Umukasya waakanikha ilomo yeewe isi Yeremiya, mu biseela bye buwuuli bw'omuyiinga Yehoyakimu, umusooleli wa Yosiya, nga niye umuyiinga wa Yuda. Waamulomela ari,

²“Tsya isi babaandu be mu ntsu ya Rekabu, ubalaange beetse mu bitweela khu biseenge bye mu Lisaayilo lyase Likhulu bye mukari. Nga boolele, benjile mukari ubawe she khuunywa she iviini banywe.”

³Nio nase indyo naayila Yaazaniya, umusooleli wa Yeremiya, uwaba umusooleli wa Habaziniya, atweela ni babandaaye, ni babaana beewe boosi, nga nisho shikuuka she ntsu ya Rekabu shoosi.

⁴Babaandu bano naabareera mu Lisaayilo ly'Omukasya Likhulu. Naabayila mu shiseenge she mukari shishaba she baalekelwa b'omuŋoosi Hanani, umusooleli wa Igidaliya. Shiseenge shino shaba khu ngaaki khwe shiseenge sha Maaseya, umusooleli wa Shalumu, uwabatsaka umuundu umukhulu uwaliindatsaka khu mulyaango.

⁵Indyo naabarengekhela bikhopo ni biitoho abe bibyetsuulemo iviini, naabalomela ndi, “Nimunywekho iviini.”

⁶Ne nabo baantsilamo bari, “Ifwe sikhuunywa iviini ta, lwekhuuba kuuka weefwe Yonadabu, umusooleli wa Rekabu aakhuwa shiilakilo shino ari, ‘Mukhanywaatsakakho iviini yoosi ta: Inywe namwe babaana beenywe babaakheele mu bikyele byeenywe biilo ni biilo.

⁷Ni shishiindi, mukhoombekhatsakakho intsu, namwe mwaamiitsa bumiitso mwiloba, namwe mwabyaala kimikuunda, namwe bari mukuleyo na shitweela ta. Muli ni khuumenyatsaka mu masari, nio mubatsakewo imbuka indeeyi mu shibala isi mumenya nga bakyeendaani busa.’

⁸Musaambo iyo, ifwe khutsiila khu shilakilo isho shonyene sheesi kuuka weefwe Yonadabu aakhulakila ifwe. Ifwe fabeene sikhunywa ta, ni bakhasi beefwe sibanywa ta, ni basooleli ni bakhaana beefwe nabo, sibanywatsakakho iviini yoosi ta.

⁹Naluundi mbaawo umuundu na mutweela khusiifwe uwoombekha intsu waakonamwo, namwe waalima kimikuunda wabyaalamwo biilime ta.

¹⁰Ifwe khumenyatsaka mu masari konyene, shookesanisa shiri khwaayiwaanilayo ilala khuuloondelela, ni khuukhola buli shiindu shoosi sheesi kuuka weefwe Yonadabu aakhulakila khuukhola.

¹¹Ne Nebukaduneeza umuyiinga wa Babulooni nga neetsa webwakala shibala shino, ifwe khwakhalawo khukhwiitsa i Yerusalemu, nio khube nga khwatitukhile khu mahe ke ba Babulooni ni ba Siriya. Isho nisho shishikila khumenya ano mu Yerusalemu khuri.”

¹²Lwanyuma Umukasya waakanikha ilomo isi Yeremiya luundi ari,

¹³“Ise Umukasya Wele wa Isiraeli, Umunyali wa byoosi, inganikha isi babaandu ba Yuda ni be mu Yerusalemu boosi indi: tsya muboolele babaandu ba Yuda, ni naabo babaamenya mu Yerusalemu, luundi mubareebe muri, inywe singene mubekho ni sheesi mwiyika ta, namwe khuuloondelela biilakilo byase nga Umukasya ta?

¹⁴Bona babetsukhulu ba Yonadabu, baawuliilisa shiilakilo sha kuuka waabwe she khuulekha khuunywakho iviini yoosi ta, ate baashiloondelela buulayi naabi. Ni khukhwoolesa khu shifukhu she shaleelo shino, mbaawo na mutweela khu nibo unywakho iviini yoosi ta. Ne bona ise samweene inganikhatsaka isi muli buli lwaweele, ne nga mwaayikanila ilala khuuloondelela byeesi ise imbaboolela.

¹⁵Ise samweene naabuya imbasiindikhila babaakaanisi baase baŋoosi isi muli, nabo baabuya bababoolela bari mulekhe tsintsila tseenywe tsiimbi, muŋoone buraambi bweenywe, mukhole biilayi. Nibo baabarewula khuulekha khuuloondelela ba wele babaandi khuubakaanisa ta, nio munyale khukhwiloosela khuumenya mu shibala shino sheesi nawa bakuuka beenywe. Ne inywe mwaayikaanila ilala khukhuundekeeresa ise byeesi inoma, namwe mwaabiloondelela ta.

¹⁶Babetsukhulu ba Yonadabu, be mu shikuuka sha Rekabu baayiwaanayo khutsiila khu shilakilo sheesi bakuuka baabwe baabalekhela, ne babaandu bano baalobela ilala khukhuunoondelela ise.

¹⁷Ni nashiryo sheesi ise Umukasya Wele Umunyali wa byoosi, Wele wa Isiraeli inoma nisho shino ndi, ‘Intsya khureera khu baandu ba Yuda, ne naabo babaamenya mu Yerusalemu boosi bukosi bwe khuhela bweesi nakanikhakho. Iseese samweene nabakanikhayo buli lwaweele, ne nibo bekaana khurekeeresa; samweene nabalaanga, ne nibo bekaana khuufukila.’ ”

¹⁸Ne isi babaandu be mu ntsu ya Rekabu, Yeremiya waatsya waabalomela byoosi byeesi Umukasya Umunyali wa byoosi, Wele wa Isiraeli aamulomela ari, “Inywe mwaaloondelela buulayi biilakilo bya kuuka weenywe Yonadabu, naluundi mwaaba nga muloondelela luundi mwakhola byoosi byeesi aabalakila khuukhola.

¹⁹Shikila ise Umukasya umunyali wa byoosi, Wele wa Isiraeli, imbalomela ndi, ‘Yonadabu umwitsukhulu wa Rekabu, s'alitaambayo umuundu ukhaalekhe khukhuuntsakaanisa ise ta.’ ”