Read lumasaaba Yeremiya 36 Bible Online

Yeremiya 36 - lumasaaba bible

Yeremiya 36

¹Mu mwiiko kwe khaane kwe buyiinga bwa Yehoyakimu, nga umusooleli wa Yosiya, nga niye umuyiinga wa Yuda, Umukasya waakanikha isi Yeremiya ilomo yeewe, nga amulomela ari,

²“Bukula shitabo uronemwo biilomo byoosi byeesi ise samweene nakhukanikhayo bibiwaamba khu Isiraeli ni khu Yuda, atweela ni kamanaambo koosi. Rona biilomo byoosi byeesi nakhukanikhayo, khukhwaamila ilala khu mbuka ya Yosiya isi aabeela umuyiinga khukhwoolesa ni shaleelo shino.

³Shibe shiryo, manya winyoola luukanile babaandu ba Yuda kane bawuliilise bibiwaamba khu khuhela khweesi intsya khuubareerera bashuusekho, nio buli muundu arure mu ntsambaasa yeewe imbi. Nio lwanyuma nase imbeyakhile bubwoonaki bwaabwe ni buubi bwaabwe.”

⁴Aryo Yeremiya waalaanga Baruki, umusooleli wa Neriya, waaba nga amusomela biilomo bino byoosi byeesi Umukasya aamulomela. Baruki niye waaba nga abirona byoosi mu shitabo.

⁵Lwanyuma kila Yeremiya alomela Baruki ari, “Ise ari baayikhaanga sinyalisa khuutsya mu Lisaayilo Likhulu ly'Omukasya ta.

⁶Ne ari iwe n'utsye mu Lisaayilo Likhulu khu shifukhu khweesi babaandu bakhaabe nga balikho babuya intsala, uryo ubasomele biilomo bino byeesi Umukasya aandakila ise, ni nase naabikhusomela iwe, waabirona mu shitabo. Shino uli ni khuushikholela isi buli mutweela anyala khuukhuwulila buulayi, nga mulimo ni babaandu ba Yuda boosi babaama mu biriimba byaabwe khuubuusanila atweela.

⁷Nio manya luukanile babaandu bano baloomba tsisaala tsaabwe isi Umukasya, luundi bashuukha khurura mu bwoonaki bwaabwe, shinyalise Umukasya khuubeyakhila buukosi bweesi aalaangilila ari anyala waabareera ni lirima liikali ni buurafu buukali.”

⁸Aryo Baruki umusooleli wa Neriya, waatsya waakhola buli shiindu shoosi sheesi umuŋoosi Yeremiya aamulakila khuukhola; waatsya waasomela biilomo ibyo khu Lisaayilo Likhulu.

⁹Mu mweesi kwe shisheenda, kwe mu mwiiko kwe kharaano, kwe buyiinga bwa Yehoyakimu umusooleli wa Yosiya, umuyiinga wa Yuda, babaandu boosi beetsa khuubuya intsala nio bafune bubweela bw'Omukasya. Babaandu be mu shiriimba Yerusalemu, ni babaandi khukhwaama mu biriimba bibiindi bye mu Yuda, boosi beetsa mu khubuya intsala khuno.

¹⁰Baryo boosi nibaaba nga bareekeresile buulayi, Baruki weemikha waasoma khukhwaama mu shitabo, biilomo byoosi byeesi Yeremiya aamulakila khuusoma. Biilomo bino aabisomela mu Lisaayilo Likhulu, nga ali mu shiseenge sha Gemariya, umusooleli wa Shafani, uwaba nga niye umuroni. Shiseenge sheewe shaba khu ngaaki khwe lulwaanyi, abwinjililo bwe Shilibwa Shishaakha she Lisaayilo Likhulu.

¹¹Umusooleli wa Gemariya isi baalaanga bari Mikaaya naye aabawo, waawuliilisa buulayi biilomo by'Omukasya bino byeesi Baruki aasoma khukhwaama mu shitabo.

¹²Kila enyukha waatsya mu lubili lw'omuyiinga, waatsya burereefu mu shiseenge sh'omuroni, isi baakhulu babaandi baaba nga bekhaale. Mu nibo mwabamwo Elishama, uwaba umuroni we lubili, Delaya umusooleli wa Shemaya, Elinasani umusooleli wa Akubori, Gemariya umusooleli wa Shafani, Zedekiya umusooleli wa Hananiya, atweela ni baakhulu babaandi babaabawo.

¹³Aryo Mikaya waababoolela byoosi byeesi aawulila Baruki nga asoma khukhwaama mu shitabo.

¹⁴Isho shaakila nibo baarumana Yehudi umusooleli wa Nesaniya umwitsukhulu wa Shelemiya, uwe mu lulyo lwa Kuushi, khuutsya aboolele Baruki asute shiitabo sheesi aasomamwo biilomo ibyo isi babaandu, ashireere isi bali. Aryo Baruki umusooleli wa Neriya waasuta shiitabo weetsa ni nasho.

¹⁵Kila nga woolile baamulomela bari, “Yikhala aasi, ukhusomele shiitabo isho khubone.” Aryo Baruki waashibasomela.

¹⁶Nabo ni baamala khuuwuliilisa byoosi byeesi Baruki, baashuukha baalolana bonyene na bonyene nga beyaanga, kila bamulomela bari, “Khwaakha khuutsya khuboolelekho umuyiinga ilomo yino.”

¹⁷Kila bareeba Baruki bari, “Khuboolele khubone, waanyalisile uryeena khuurona bibiindu bino? Yeremiya niye uwabikhusomeele nio iwe waabirona?”

¹⁸Baruki waabeelamwo ari, “Eeee, niye uwabisomeele, nio nase naabirona ni bwiino mu shitabo shino.”

¹⁹Kila baakhulu bano balomela Baruki bari, “Iweewe ni Yeremiya mwaakha khuutsya mwiibise, ikhabawo umuundu yeesi umanya eena isi muli ta.”

²⁰Baakhulu bano baabukula shiitabo isho baashira mu shiseenge sha Elishama umuroni, lwanyuma benyukha baatsya mu lwaanyi lw'omuyiinga, baamuboolela byoosi nga ni bibeele.

²¹Kila umuyiinga arumana Yehudi khuutsya areere shiitabo isho. Naye aryo waatsya waashirusa mu shiseenge sha Elishama, waashireera, waashisomela umuyiinga atweela ni baakhulu babaandi abo babaaba nga beemikhile awo baamwibotokheleele.

²²Imbuka iyo yaba mu mweesi kwe shisheenda, kwe bunyifu buukali, nga umuyiinga wekhaale asheeso she kumulilo kwe mu lubili nga ali khuufunakho bukhafu.

²³Abe buli lweesi Yehudi asomelakho tsimbapula tsitaru namwe tsine tse mu shitabo isho, umuyiinga aatsikhalakho ni kumubano, naatsituuma mu mulilo. Aryo waaba nga ashikhola musaambo iyo, khukhwoolesa shitabo shoosi ni shashiila mu mulilo shaweelela.

²⁴Umuyiinga atweela ni baakhulu beewe babaaba aambi ni naye, baalekha khwookesanisakho khuurya khwoosi, namwe khukhwookesanisakho bari kumutaambo kwaabawaambile nga boonuulaka tsingubo tsaabwe ta.

²⁵Shino shaba shiryo abe yakhaba nga Elinasani, Delaya ni Gemariya baakhakakho naabi khuureesa umuyiinga alekhe khukhwoosha shitabo isho. Ne niye waalekha khubawuliilisa ta.

²⁶Lwanyuma kila umuyiinga alakila umusooleli weewe Yerahimeeli, nga ali ni Seraya umusooleli wa Aziriyeli, ni Shelemiya umusooleli wa Abudeeli, khuutsya bawaambe Baruki umuroni n'umuŋoosi Yeremiya. Ne Umukasya umweene aaba nga waababisile.

²⁷Lwanyuma lw'omuyiinga Yehoyakimu khukhwoosha shiitabo shishanyoowa isho shishabamo biilomo byeesi Baruki aarona nga Yeremiya abimusomela, Umukasya waakanikha luundi isi Yeremiya ilomo yeewe, nga amulomela ari,

²⁸bukulayo shiitabo shishiindi, uronemo tsilomo tsoosi tsitsaba mu shiitabo shishanyoowa, sheesi umuyiinga Yehoyakimu oosha ni kumulilo.

²⁹Ne bibiwaamba khu Yehoyakimu, umuyiinga wa Yuda, umuboolela sheesi ise Umukasya inoma uri, “Iwe woosha shiitabo shino nga ureeba Yeremiya uri lwashiina aarona ari umuyiinga wa Babulooni atsya khwiitsa oonakise shiibala shino, naluundi akhoonyake babaandu boosi ni bisolo byeene.

³⁰Ni nashiryo ise Umukasya samweene indi khuukhuboolela iwe umuyiinga Yehoyakimu, umuyiinga wa Yuda ndi: Niye akhataambe umuundu na mutweela ukhekhale khu shitsoloŋo sha Dawudi awule nga umuyiinga. Kumulaambo kweewe bakhaakusute bakutuume ibulafu isi kumuumu kukhaakwooshele kumuusi, ni lunyire luukali mu shilo.

³¹Intsya khumuwa niye shitaambiso atweela ni babaana beewe, ni babetsukhulu beewe boosi, lwe bubwoonaki bwoosi bweesi bakholile. Ise samweene intsya khureera ni khu nibo nga baaraangilisi atweela ni babaandu boosi babaamenya mu Yerusalemu, ni babaandu be mu Yuda mwoosi, buukosi bwoosi bweesi nakanikhakho khaale indi butsya khwiitsa. Shinaba shiryo lwekhuuba nibo sibakana khuuwulila ta.”

³²Aryo kila Yeremiya abukula shiitabo shishiindi, waashiwa Baruki umusooleli wa Neriya, uwaba umuroni, waaba nga arona biilomo byoosi byeesi Yeremiya aaba nga amusomela, nga nibyo bibyeene byeesi umuyiinga Yehoyakimu ooshela mu mulilo. Khu biilomo bino, aabawo ni bibiindi bibifwaana biryo byeesi aalooselamwo.