Read lumasaaba Yeremiya 37 Bible Online

Yeremiya 37 - lumasaaba bible

Yeremiya 37

¹Umuyiinga Nebukaduneeza uwa Babulooni waarawo Zedekiya umusooleli wa Yosiya khuuba umuyiinga wa Yuda, mu shifwo sha Koniya, umusooleli wa Yehoyakimu.

²Ne Zedekiya umweene, ni baakhulu beewe babaandi bekaana khuwuuliilisa biilomo by'Omukasya byeesi aawa umuŋoosi Yeremiya khuukanikha.

³Lwanyumakho umuyiinga Zedekiya waarumana Yehukali umusooleli wa Shelemiya, n'umusaayi Zefaniya umusooleli wa Maaseya, khuutsya khuyilila umuŋoosi Yeremiya buurume buno: “Khuloombele ifwe isi Umukasya Wele weefwe.”

⁴Khu mbuka nyene iyo, Yeremiya aaba nga ashiili umulekhuule mu baandu beewe, nga bashiili khuumubowa mu mapuusu ta.

⁵Liiye lye ba Babulooni lyaba nga lishibwakala Yerusalemu, ne ni baawulila bari liiye lya Faraawo wa Misiri lilikho likhuumba litsya, nga lyaamalile khaale khuukhalisa lulwaakha, nibo ba Babulooni baakhalawo khuururayo mu Yerusalemu.

⁶Lwanyuma kila Umukasya akanikha isi Yeremiya ilomo yeewe ari,

⁷“Iseese Umukasya Wele wa Isiraeli, tsya uboolele Zedekiya umuyiinga wa Yuda uwakhuurumaane khukhwiitsa khukhuuntsireebakho uri, ‘Liiye lya Faraawo lilikho liitsa khuukhuyeetakho busa, ne likheeleyo mu shibala shaabwe she Misiri.’

⁸Ne lwanyuma ba Babulooni bakheetse bebwakale shiriimba shino, bashiwaambe, bashooshe ni kumulilo.

⁹Ne ise Umukasya samweene ndi khuubareewula ndi, ‘Mukhewoombesa mwabeene nga mwambaasa muri ba Babulooni sibakhaakobole luundi ta. Ilala bakheetse luundi.

¹⁰Ne abe mwanganyalisa khuuwula liiye lye ba Babulooni lyoosi, yaaramayo babaawonelekho bakyeekhe bari, nga bali mu masari kaabwe, babeene abo banyalisa khukhwiitsa, boosha shiriimba shino baashimalila aasi khwiloba.’ ”

¹¹Liryo liiye lye ba Babulooni lyashuukha lyelayo lyaalekha khwibwakala Yerusalemu ta, lwekhuuba liiye lya Faraawo wa Misiri lyaba lilikho liitsa.

¹²Yeremiya wahaamba lukyeendo lweewe, waarura mu shiriimba Yerusalemu, khuutsya mu shibala sha Benyamini, eyilile shisiintsa she buusikha bweewe mu shikuuka sheewe.

¹³Ne n'amala khukhwoola khu shilibwa sheesi balaanga bari Benyamini, umukhulu we baaliindi, isi abe balaanga bari Irija, umusooleli wa Shelemiya, uwe mu lulyo lwa Hananiya, waamwiimisa, nga amulomela ari, “Iwe ulikho wiilukha, utsya khwitubaasa khu ba Babulooni.”

¹⁴Yeremiya naye waamwilamwo ari, “Isho sishili sha ŋali ta. Iseese siindikho intsya isi ba Babulooni ta.” Ne Irija niye waalekha khukana ni khuuwuliilisa sheesi Yeremiya amulomela ta. Aryo waamuwaamba, waamureera isi baakhulu be mu lubili.

¹⁵Baryo baakhulu baaba nga baarafuyile naabi, kila balakila baselikhale khuukhupaka Yeremiya. Lwanyuma baamuyila, baamwikalila mu ntsu ya Yonasani, uwaba umuroni, lwekhuuba intsu iyo abe baakikyelisa lipuusu.

¹⁶Musaambo iyo, Yeremiya baamura mwipuusu lilyaba aasi e lipuusu ilyo, mweesi aamenya khuumala imbuka indeeyikho.

¹⁷Lwanyuma umuyiinga Zedekiya waamurumanisa khukhwiitsa, kila bamureera mu lubili lweewe. Umuyiinga waamureebelesa mu shimoonyo busa ari, “Manya iliwo buurume bwoosi bubwaamile isi Umukasya?” Yeremiya naye waamwiilamo ari, “Eee, buliwo. Iweewe batsya khuukhuwaamba, bakhuwaaneyo isi umuyiinga wa Babulooni.”

¹⁸Lwanyuma ndi kila Yeremiya areeba Zedekiya ari, “Musaango shiina kweesi ise nakhukholile iwe, namwe kweesi nakholile isi baakhulu boowo, namwe isi babaandu bano, kukwakilile baambowa ise mu mapuusu?

¹⁹Baŋoosi boowo be bubeeyi babeetsa baakhuwoombesa iwe bari umuyiinga wa Babulooni s'akhaanyalise khukhwiitsa khukhwibwakala iwe namwe shiibala shino, bali waheena?

²⁰Ne ari ikhwikoontselela iwe, O Umuyiinga we lukoosi, undekeerese ise. Ikhuloomba unjeete, ukhaantsisayo luundi mu lipuusu lye ntsu ya Yonasani iyo ta. Siinga untsisayo, inyala naafwiilayo.”

²¹Isho shaakila umuyiinga Zedekiya waalakila ari bayile Yeremiya, bamubowele mu lwaanyi lwe baaliindi. Nga ali mu bweene imwo, bamuwaatsakekho buli shiifukhu kumukaati mutweela, nga bakwaamisa isi bakiteekhela, khukhwoolesa kimikaati kyoosi mu shiriimba ni kyoola khuuwawo. Aryo Yeremiya waarama nga umubowe mu lwaanyi lwe mu lubili ilwo.